މިނިސްޓަރު ޝަހީމްގެ ތަޖުރިބާއާއެކު ހަލުވި ދުވެލީގައި އިސްލާމިކް މިނިސްޓްރީ ސަރުކާރުގެ އެންމެ ކުރީގައި

މި ސަރުކާރުގެ އެންމެ ހަލުވި ދުވެލީގައި ކުރިޔަށް ދާ އެއް މިނިސްޓްރީއަކީ އިސްލާމިކް މިނިސްޓްރީއޭ ދެންނެވިޔަސް އެކަން ދޮގު ކުރާނެ މީހަކު ހުންނާނެ ހެނެއް ހިއެއް ނުވެއެވެ. މިނިސްޓަރު ކަމަށް ޢައްޔަން ކުރެވުނު ރޭ، މީސްމީޑިއާއަށް ބީރައްޓެހި މިނިސްޓްރީތައް, މީސްމީޑިއާ ހިޞޯރުކޮށްލިތަން ފެނިގެން ދިޔައެވެ. ރާވާފައިވާ ޕްރޮޖެކްޓްތަކާއި, ކުރިޔަށް ހުރި މަޝްރޫއުތަކުގެ ވާހަކަތަކުން މުޅި ފީޑް ފުރާލިއެވެ. ފެށި ނުނިމި ހުރި ޕްރޮޖެކްޓް ތަކުގެ ދުވެލި ބާރުކޮށް, އައު ޕްރޮޖެކްޓްތައް ފައްޓަވާ އިސްލާމިކް މިނިސްޓްރީގެ ހުންގާނުގައި, ޑރ. ޝަހީމް އަލީ ސަޢީދު, ހިއްޕެވީ ވަރަށް ބޮޑު އުންމީދަކާއެކުގައެވެ.

އެއީ ރާއްޖޭގެ ވެރިކަމާ މިމަހު 16 ވަނަ ދުވަހު ހަވާލުވެ ވަޑައިގެންނެވި ރައީސް ޑރ. މުޙައްމަދު މުޢިއްޒު ކުރެއްސެވި އިސްލާމީ ދިވެހި މުޖުތަމަޢުގައި ކުލަ ޖައްސަވައިދެއްވުމުގެ އުންމީދުގައެވެ.

މިއަދު "ދެން"ގެ ޓީމާއެކު ޑރ. ޝަހީމު ވަނީ އެމަނިކުފާނުގެ ވުޒާރާއިން ކުރިޔަށް އޮތް 100 ދުވަހުގެ ތެރޭގައި ކުރައްވަން ނިންމަވާފައިވާ ބައެއް ކަންކަމާއި, އެމަނިކުފާނުގެ ތަޞައްވަރާ ގުޅޭ ގޮތުން މަޝްވަރާ ކުރައްވާފައެވެ.

މިސްކިތްތަކާ ގުޅޭ ޤައުމީ މަޖިލީހެއް

ސަރުކާރުގެ އިޙްމާލުން ބައެއް މިސްކިތްތައް ވަރަށް ބޮޑަށް ވީރާނާވަމުން ދިޔަ މަންޒަރު މިދޭތެރެއިން ފެނިގެން ދިޔައެވެ. މިސްކިތްތަކުގެ އާބާތުރަ ފިލުވާނެ ބަޖެޓް ނެތި, ފަންޑެއް ޤާއިމްކުރިތަން ވެސް ފެނިގެން ދިިޔައެވެ. މި ސަރުކާރު އައީ އެކަން ނިމުމަކަށް ގެނައުމުގެ ވަޢުދާއެކުގައެވެ.

ޑރ. ޝަހީމް ވިދާޅުވި ގޮތުގައި އެ މިސްކިތެއްގެ ކަންކަން އެންމެ ބޮޑަށް އިނގޭނީ އެ މިސްކިތެއްގެ އިމާމަކަށެވެ. އެހެންވެ, ސަރުކާރުގެ ވިސްނުމަކަށްވީ މިސްކިތްތަކާ ގުޅޭ ޤައުމީ މަޖިލީހެއް އުފައްދަވާށެވެ. އެއީ ސަރުކާރުގެ 100 ދުވަހުގެ ވަޢުދުގެ ތެރެއިން މެދުނުކެނޑި މިސްކިތްތަކުގެ ޙާލަތު ދެނެގަނެވޭނެ ނިޒާމެއް ޤާއިމުކުރުމުގެ މަސައްކަތުގެ ތެރެއިން ކުރެވިގެންދާ ކަމަށެވެ.

ޑރ. ޝަހީމް ވިދާޅުވި ގޮތުގައި އެ މަޖިލިސް ވެެގެންދާނީ އިސްލާމިކް މިނިސްޓްރީއަށް ލަފާ ދޭ މަޖިލީހަކަށެވެ. މަޖިލީސް ޗެއަރ ކުރައްވާނީ އިސްލާމީ މަރުކަޒުގެ މައި އިމާމެވެ. ރައީސް ޑރ. މުޢިއްޒުގެ ވަޢުދުފުޅުތައް އަކުރުން އަކުރަށް، ވީހާވެސް އަވަހަށް ފުއްދުމަށް ޑރ. ޝަހީމުގެ ޓީމު އޮތީ ތައްޔާރަށެވެ.

"ރައީސް ޑރ. މުޢިއްޒުގެ މެނިފެސްޓޯގައި އެބަހުރި އިސްލާމްދީނުގެ ކަންކަން ހަރުދަނާ ކުރުމަށް ވަރަށް ގިނަ މައުޟޫޢުތައް ބަޔާންކޮށްފައި. ރައީސް މުޢިއްޒުގެ އަމާޒާ އެއްގޮތަށް އެކަންކަން ކުރުމަށް މި ވުޒާރާއިން މިދަނީ ފިޔަވަޅުތައް އަޅަމުން. އަދި ވަރަށް ބާރު މިނުުގައި, ވަރަށް އަވަސް މިނުގައި ކުރިޔަށް ދޭތޯ މިދަނީ މަސައްކަތް ކުރަމުން."

ވަޤްފް ޕްރޮޖެކްޓްތައް އިތުރު ކުރުން

އިސްލާމިކް މިނިސްޓްރީން އެންމެ މުހިންމު ކަމެއް ދީގެން މިވަގުތު ކުރަމުންދާ ދެވަނަ މަސައްކަތަކީ ވަޤްފް ޕްރޮޖެކްޓްތައް އިތުރު ކުރުމެވެ. އެއީ މިސްކިތުގެ އާބާތުރަ ފިލުވުން ފަދަ ކަންކަމަށް ޚަރަދު ކުރާނެ ފައިސާ ހޯދުމަށް ކުރިޔަށް ގެންދާ ޕްރޮޖެކްޓެވެ.

ރާއްޖޭގައި ފުރަތަމަ އިމާރާތް ކުރި ވަޤްފު ބިލްޑިން، ދާރުލްއީމާންއަކީ 2017 ވަނަ އަހަރު ޑރ. ޝަހީމުގެ އިސްލާމިކް މިނިސްޓަރު ކަމުގައި ބިނާ ކުރެވުނު ތަނެކެވެ. އެއީ ބޭރުގެ ފަރާތެއްގެ ދީލަތި އެހީއާއެކު ބިނާކުރެވުނު އިމާރާތެކެވެ. އެތަން މިހާރު ހުންނަނީ ބައެއް އޮފީސްތަކަށް ކުއްޔަށް ދީފައެވެ.

ޑރ. ޝަހީމް ވިދާޅުވީ ދާރުލްއީމާންގެ ކުލީގެ ގޮތުގައި އަހަރެއްގެ މައްޗަށް ހަ މިލިޔަން ރުފިޔާ ލިބޭ ކަމަށެވެ. މިހާރު އެ ފައިސާ ބޭނުން ކުރަނީ މިސްކިތު ފަންޑަށް ކަމަށް ވެސް ވިދާޅުވިއެވެ.

މިސްކިތު ފަންޑު ތަރައްގީކޮށް ވަޤްފު އިމާރާތްތައް އިތުރު ކުރުމަށް ރައީސް ޑރ. މުޢިއްޒު ވެފައިވާ ވައުދުގެ ދަށުން ދެވަނަ ވަޤުުފު އިމާރާތެއްގެ ބިންގާ މިއަންނަ ޖެނުއަރީ މަހު އެޅިގެންދާނެ ކަމަށް ވެސް ޑރ. ޝަހީމް ވިދާޅުވިއެވެ.

ޒަކާތް ހައުސް އުފެއްދުން

ޒަކާތާ ގުޅޭ އެންމެހައި ކަންތައްތައް ތަރުތީބު ކުރުމަށް ޚާއްސަ  އޮފީހެއް "ޒަކާތު ހައުސް"ގެ ނަމުގައި ޤާއިމް ކުރުމަކީ ވެސް މިހާރު އިސްލާމިކް މިނިސްޓްރީން ކުރަމުން އަންނަ މަސައްކަތެކެވެ.

ރާއްޖޭގައި 1984ވަނަ އަހަރުގައި ޒަކާތާއި ގުޅޭ ޚާއްސަ އިދާރާއެއް ވަނީ އުފައްދާފައެެވެ. ފަހުން އެ އިދާރާ ބަދަލުކޮށްފައިވަނީ މިނިސްޓްރީ އޮފް ޖަސްޓިސް އެންޑް އިސްލާމިކް އޮފީހުގެ ދަށަށެވެ. އޭގެ ފަހުން 1996ވަނަ އަހަރު އިސްލާމީ ކަންތައްތަކާ ބެހޭ އެންމެ މަތީ މަޖިލިސް އުފެއްދުމަށް ފަހު އެ އޮފީސް ބަދަލުވީ އެ މަޖިލީހުގެ ޑިޕާޓްމަންޓަކަށެވެ.

އޭގެ ފަހުން އެތަން ހިންގަމުން އަންނަނީ އިސްލާމިކް މިނިސްޓްރީގެ ޔުނިޓެއްގެ ގޮތުގައެވެ.

"ޒަކާތާ ބެހޭ އޮފީސް ވަކި އިދާރާއެއްގެ ގޮތުގައި މިއަދާ ހަމައަށް ދެމިގެން އައި ނަމަ އެއީ ވަރަށް ބޮޑު ހެވެއް މިޤައުމަށް އަންނާނެ" އެފަދަ އޮފީހެއް އޮތުމުގެ މުހިންމު ކަން އިޝާރާތް ކުރައްވާ ޑރ. ޝަހީމް ވިދާޅުވިއެވެ.

ޑރ. ޝަހީމުގެ ވިސްނުން ހުރީ ޒަކާތް ހައުސް އުފައްދާ, ޒަކާތުގެ ގޮތުގައި ލިބޭ ފައިސާ ޤާނޫނީ އިމުގެ ތެރެއިން އިންވެސްޓްކޮށްގެން އެއިން ނަފާ ހޯދާށެވެ. އޭރުން ޒަކާތުގެ ބެހެނިވެރިންނަށް ޒަކާތުން ލިބޭ ފައިދާ އެތައް ގުނައެއް އިތުރުވެގެންދާނެ ކަމަށް ޝަހީމް ވިދާޅުވިއެވެ.

"މެލޭޝިއާ, ބުރުނާއި, އިންޑޮނޭޝިއާ, އަދި ވަރަށް ގިނަ އިސްލާމީ ޤައުމުތަކުގެ ޒަކާތުގެ ޑިޕާޓްމެންޓްސްތައް މިއަދު މިވަނީ ޒަމާނީ ކުރެވިފައި. އަޅުގަނޑުމެންގެ ދިވެހިރާއްޖެ ކީއްވެގެންތޯ ފަހަތުގައި އޮންނަންވީ؟" ރާއްޖޭގައި އެކަމަށް ޤާބިލު މީހުން ތިބިކަމަށް އިޝާރާތް ކުރައްވަމުން ޝަހީމް ވިދާޅުވިއެވެ.

ދައުލަތުގެ ޚަރަދުގައި 1000 މީހުން ޙައްޖަށް ފޮނުވުން

އިސްލާމިކް މިނިސްޓްރީން މަސައްކަތް ކުރަމުން އަންނަ މުހިންމު ކަންތައްތަކުގެ ތެރެއިން ހަތަރު ވަނަ ކަމަކީ ދައުލަތުގެ ޚަރަދުގައި 1000 މީހުން ޙައްޖަށް ފޮނުވުމެވެ. އެކަން ކުރުމަށް ވާން ޖެހޭ ތައްޔާރީތައް މިހާރު އެ ވުޒާރާއިން ދަނީ ކުރަމުންނެވެ.

ޙައްޖު ކޯޕަރޭޝަން ހަރުދަނާކޮށް ޙައްޖުގެ އަގު ހެޔޮކުރުމުގެ އިތުރުން، ފަސް އަހަރު ތެރޭގައި 1،000 ފަގީރުން ހިލޭ ޙައްޖުގެ އަޅުކަމަށް ފޮނުވުމަކީ ރައީސް ޑރ. މުޢިއްޒުގެ ރިޔާސީ ވަޢުދެކެވެ.

އެ ވައުދުފުޅާ އެއްގޮތަށް މިއަހަރުގެ ޙައްޖުގައި, ސަރުކާރުގެ ޚަރަދުގައި ބަޔަކު ހައްޖަށް ދާނެ ކަމުގެ ޔަޤީންކަން ޑރ. ޝަހީމް މިއަދު ދެއްވިއެވެ.

ޝަހީމް ވިދާޅުވީ, ޙައްޖަށް ފޮނުވާ މީހުންގެ އަދަދު ކަނޑައަޅާނީ ކޯޓާ ލިބޭ މިންވަރަކަށް ބަލައިގެން ކަމަށެވެ. ނަމަވެސް ހިލޭ ޙައްޖަށްދާ މީހުންގެ ފުރަތަމަ ބެޗް މިއަހަރު ދާނެ ކަމުގެ ޔަޤީންކަން އެމަނިކުފާނު ދެއްވިއެވެ.