ކައުންސިލުތަކަށް ހުރި ގޮންޖެހުންތައް ޙައްލު ކުރަން، މުއައްސަސާތައް ގުޅިގެން މަސައްކަތް ކުރަން ޖެހޭ: މިނިސްޓަރު

ކައުންސިލުތަކަށްހުރި ގޮންޖެހުންތައް ޙައްލު ކުރުމަށް މުއައްސަސާތައް ގުޅިގެން މަސައްކަތް ކުރަންޖެހޭ ކަމަށް މިނިސްޓަރ އޮފް ސިޓީީސް، ލޯކަލް ގަވަމެންޓް އެންޑް ޕަބްލިކް ވޯކްސް، އާދަމް ޝަރީފު އުމަރު ވިދާޅުވެއްޖެއެވެ.

Ads by STELCO

މިނިސްޓަރު އާދަމް ޝަރީފު އެކްސްގައި ކުރެއްވި ޕޯސްޓެއްގައި ވިދާޅުވީ، އެމަނިކުފާނު ގއ.އަތޮޅު ކައުންސިލުގެ މެމްބަރުންނާއި ބައްދަލުކުރައްވައިފައިވާ ކަމަށެވެ. މި ބައްދަލުވުމުގައި އަތޮޅު، އަދި ރަށު ކައުންސިލުތައް ހިންގުމަށް ހުރި ދަތިތައް މިނިސްޓަރާއި ވަނީ ހިއްސާ ކުރައްވައިފައި ކަމަށް ވިދާޅުވިއެވެ.

މި ބައްދަލުވުމުގައި، ކައުންސިލުތައް ބާރުވެރި ކުރުވުމަށް ސަރުކާރުގެ ހުރިހައި މުއައްސަސާތަކުގެ އެއްބާރުލުން، ކުރިއަށްވުރެ ބޮޑަށް ލިބޭނެ ގޮތެއް އޮންނަން ޖެހޭކަން ކައުންސިލަރުން ފާހަގަކުރެއްވި ކަމަށް މިނިސްޓަރު ވިދާޅުވިއެވެ.

"ކައުންސިލުތަކަށް ދިމާވާ ގޮންޖެހުންތައް ޙައްލު ކުރުމަށް، ހުރިހާ މުއައްސަސާތަކުން ގުޅިގެން މަސައްކަތް ކުރުމުގެ ރޫޙު ވަރުގަދަ ކުރަންޖެހޭ." އާދަމް ޝަރީފު ކުރެއްވި ޕޯސްޓުގައިވެއެވެ.

މިނިސްޓަރު އާދަމް ޝަރީފު ގެންދަވަނީ، އެކި އަތޮޅުތަކާއި ރަށްތަކުގެ ކައުންސިލަރުންނާއި ބައްދަލުކުރައްވައި، ކައުންސިލަރުންގެ ކަންބޮޑުވުންތަކުގެ އަޑު އައްސަވަމުންނެވެ.