ރާއްޖޭގައި ފަސް މިލިއަން ގަސް އިންދުމުގެ މަޝްރޫޢެއް ހިންގާނަން: ރައީސް މުޢިއްޒު

ރާއްޖޭގައި ފަސް މިލިއަން ގަސް އިންދުމުގެ މަޝްރޫޢެއް ހިންގުމަށް ނިންމާފައި ވާކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.

Ads by STELCO

ރައީސް މުޢިއްޒު މިހެން ވިދާޅުވެފައި ވަނީ އެކުވެރި އަރަބި އިމާރާތުގައި ކުރިއަށްދާ 28 ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ކޮޕް28) ގެ ވަރލްޑް ލީޑަރސް ސަމިޓުގައި މިއަދު ތަގުރީރު ކުރައްވަމުންނެވެ.

އެގޮތުން ރައީސް މުޢިއްޒުގެ ތަގުރީރުގައި ވިދާޅުވީ އަވަސް އަވަހަށާ ލަސްލަހުންވެސް، މި ނާޒުކު ވެށްޓަށް ލިބެމުންދާ ކޮންމެ ގެއްލުމަކުން އަރައިގަތުމަށްޓަކައި އެހީތެރިކަން ރާއްޖެއިން ބޭނުންވާ ކަމަށެވެ.

ދިވެހިރާއްޖޭގެ ކުދި ޖަޒީރާ ރަށްތައް ވިލުންތެރި، ސާފު ފެހި މާޙައުލަކަށް ހެދުމަކީ އެ މަނިކުފާނުގެ ސަރުކާރުން ނުހަނު އިސްކަމެއްދޭ ކަމެއް ކަމަށް ރައީސް މުޢިއްޒުގެ ތަގުރީރުގައި ވަނީ ވިދާޅުވެފައެވެ.

އެހެން ކަމުން މުޅި ރާއްޖޭގައި ފަސް މިލިއަން ގަސް އިންދުމުގެ މަޝްރޫޢެއް ހިންގުމަށް ވަޢުދުވާ ކަމަށް އެ މަނިކުފާނު ވަނީ ވިދާޅުވެފައެވެ.

މީގެ އިތުރުންވެސް ހުރިހާ އެންމެންގެވެސް ދިރިތިބުމަށާ، ދިރިއުޅުން ބިނާކުރުމަށްވެސް، މި ނާޒުކު ތިމާވެށި ރައްކާތެރިކަމާއެކު ދަމަހައްޓަން ބޭނުންވާ ކަމަށް ރައީސް މުޢިއްޒު ވަނީ ވިދާޅުވެފައެވެ.

މޫސުމަށް އަންނަބަދަލުތަކުން ލިބޭ ގެއްލުން ތަކުން އަރައިގަތުމަށް އެހީތެރިވާ، 'ލޮސް އެންޑް ޑޭމަޖް ފަންޑު' ގެ ބޭނުން ހިފަން ފަށައިގަތުމަށް، ނިންމި ނިންމުމާމެދު އުފާކުރައްވާ ރައީސް މުޢިއްޒު ވަނީ އެ ކަމަށް ތާއީދުކޮށް އެއްބާރުލުން ދެއްވި ޤައުމުތަކަށް ޝުކުރު އަދާ ކުރައްވާފައެވެ.