ވިހެއުމަށްފަހު ކުއްޖާ އެއްލައިލި މައްސަލައިގައި ބިދޭސީއަކު ހައްޔަރު ކުރަން މަސައްކަތް ކުރަނީ
އދ.ދިގުރަށުގައި ވިހެއުމަށްފަހު ތުއްތު ކުއްޖަކު އެއްލައިލި މައްސަލައިގައި ބިދޭސީ އަންހެނަކު ހައްޔަރުކުރަން ފުލުހުން މަސައްކަތް ކުރަމުންދާ ކަމަށް ބުނެފިއެވެ.
ދިގުރަށުގައި، ކޮތަޅަކަށްލައި ކުނިގޮނޑަކަށް ތުއްތު ކުއްޖަކު އެއްލައިލައިފައި އޮތް މައްސަލަ ފުލުހުންނަށް ރިޕޯޓު ކުރީ މިއަދު ހެނދުނު 9:20 ހާއިރުއެވެ.
ފުލުހުން ކުރިން ވިދާޅުވީ މި މައްސަލައިގައި އުމުރުން 30 އަހަރުގެ ސްރީލަންކާގެ އަންހެނެއް ހައްޔަރުކޮށްފައިވާ ކަމަށެވެ. ފުލުހުން އޭނާ އަތުލައިގަތީ، ފުރަން މާލެ އައިސް، ވެލާނާ އިންޓަރނޭޝަނަލް އެއާޕޯޓަށް ގޮސް ހުއްޓައި ކަމަށް ވެސް ފުލުހުންގެ މީޑިއާ އޮފިޝަލު ކުރިން މި ނޫހަށް ވިދާޅުވިއެވެ. ނަމަވެސް ފަހުން ވިދާޅުވީ، އެއީ ރަނގަޅު މަޢުލޫމާތެއް ނޫން ކަމަށާއި، އެ މީހާ ހައްޔަރު ކުރުމަށް މަސައްކަތް ކުރަމުންދާ ކަމަށެވެ.
ހައްޔަރު ކުރަން އުޅެނީ، އެ ރަށު ގެސްޓްހައުސްއެއްގައި މަސައްކަތް ކުރާ އަންހެނެއްކަން އެނގިފައިވެއެވެ. އެނގިފައިވާ ގޮތުގައި މި މައްސަލައިގައި، މަރުވި ކުއްޖާގެ ފޫޅުވެސް އޮތީ ނުކަނޑައެވެ.
މިކަން ބެލުމަށް ފުލުހުންގެ ޓީމެއް އަންނަނީ ދިގުރަށުގައި ހަރަކާތްތެރިވަމުންނެވެ.
ނޯޓް: ފަހުން ލިބުނު މަޢުލޫމާތަކާއި ގުޅިގެން، މި ޚަބަރަށް ވަނީ ބަދަލު ގެނެވިފައެވެ.
