ފެނަކައިގެ މުވައްޒަފުން ވަކި ކުރާކަމަށްބުނެ މަޖިލީހަށް ކުއްލި މައްސަލައެއް ހުށަހަޅައިފި
ރައީސް ޑރ. މުހައްމަދު މުޢިއްޒުގެ ސަރުކާރުން ފެނަކަ ކޯޕަރޭޝަން ލިމިޓެޑްގެ މުވައްޒަފުން ވަޒީފާ އިން ވަކި ކުރަމުން އަންނަ ކަމަށް ބުނެ، ރައްޔިތުންގެ މަޖިލިހަށް މިއަދު ކުއްލި މައްސަލައެއް ހުށަހަޅައިފިއެވެ.
މި މައްސަލަ ހުށަހަޅުއްވާފައި ވަނީ ފުވައްމުލަކު މެދު ދާއިރާގެ އެމްޑީޕީގެ މެމްބަރު ހުސެއިން މުހައްމަދު ދީދީ އެވެ.
މި މައްސަލަ ބަލައިގަތީ ވޯޓުގައި ބައިވެރިވެ ވަޑައިގެންނެވި 33 މެމްބަރުންގެ އިއްތިފާގުންނެވެ.
މި މައްސަލައިގައި ބުނީ ރައީސް މުޢިއްޒުގެ ސަރުކާރުން ރާއްޖޭގެ އެކި ރަށްރަށުގައި ކަރަންޓާއި އައިސް ޕްލާންޓާއި ނަރުދަމާ އާއި ފެން އަދި ބޮޓްލިންގެ ޚިދުމަތް ރައްޔިތުންނަށް ފޯރުކޮށްދޭ ފެނަކައިގެ މުވައްޒަފުން އަނިޔާވެރިކަމާއި ބޭއިންސާފުން ބަދަލު ހިފުމުގެ ރޫހެއްގައި ވަޒީފާ އިން ވަކި ކުރަމުން އަންނަ ކަމަށެވެ.
އެހެންކަމުން، ފެނަކައިގެ މުވައްޒަފުން ވަޒީފާ އިން ވަކި ކުރުން މިހާރުން މިހާރަށް ހުއްޓާލުމަށް ވެސް މި މައްސަލައިގައި ގޮވާލާފައި ވެއެވެ.
މި މައްސަލައިގެ ބަހުސްގައި ވާހަކަދައްކަވަމުން ހުސެއިން ވިދާޅުވީ ރައީސް މުޢިއްޒުގެ ސަރުކާރުން ފުވައްމުލަކު ފެނަކައިގެ މުވައްޒަފުންތަކެއް ވަޒީފާއިން ވަކިކޮށްފައިވާ ކަމަށެވެ.
އަދި މިހާތަނަށް ވަޒީފާއިން ވަކިކޮށްފައި ވަނީ އެމްޑީޕީ އަށް ތާއީދު ކުރާ މުވައްޒަފުން ކަމަށާއި ކޮންމެ ފަހަރަކު ސަރުކާރެއް ބަދަލުވާ އިރަށް މިގޮތަށް ފެނަކަ މުވައްޒަފުންނަށް އަނިޔާ ކުރަން ނުވާނެ ކަމަށްވެސް ހުސެއިން ވިދާޅުވެފައި ވެއެވެ.
މީގެ އިތުރުން ސިޔާސީ މަންފާއަކަށްޓަކައި އެމްޑީޕީއަށް ނިސްބަތްވާ މުވައްޒަފުން ވަޒީފާއިން ވަކިކުރާކަން ފާހަގަކުރައްވާ އޭނާ ވަނީ މިހާރުން މިހާރަށް މިކަން ހުއްޓާލައި އެ މުވައްޒަފުން ބޭނުންކޮށްގެން ޕްރޮޖެކްޓުތައް ފުރިހަމަ ކުރުމަށް ގޮވާލާފައެވެ.
ވަޒީފާއިން ކެނޑިއަސް އަތް ޖަހާނެ. މަ ހަމަ ހިނިއަންނަނީ ހަހަ