މިނިސްޓަރުންނަށް ރުހުން ދިނުން މާދަމާގެ ޖަލްސާ އަށް އެޖެންޑާ ކޮށްފި
ރައީސް ޑރ، މުހައްމަދު މުޢިއްޒުގެ ސަރުކާރުން އައްޔަނުކޮށްފައިވާ މިނިސްޓަރުންނަށް ރުހުން ދިނުމުގެ މައްސަލަ ރައްޔިތުންގެ މަޖިލީހުގެ މާދަމާގެ ޖަލްސާ އަށް އެޖެންޑާ ކޮށްފިއެވެ.
މި ސަރުކާރުން އައްޔަނުކޮށްފައިވާ 22 ވަޒީރުންނަށް ރުހުން ހޯދުމަށް މިދިޔަ މަހުގެ 20ވަނަ ދުވަހު ސަރުކާރުން ވަނީ މަޖިލީހަށް ހުށަހަޅައިފައެވެ.
މި ސަރުކާރަށް މަހެއްވެފައިވާއިރު، މިއަދާ ހަމައަށް ވެސް ވަޒީރުންނަށް ރުހުން ދިނުމުގެ މައްސަލަ މަޖިލީހުގެ އެއްވެސް ޖަލްސާއަކަށް އެޖެންޑާކޮށްފައެއް ނުވެއެވެ.
ނަމަވެސް މާދަމާ އޮންނަ މި ދައުރުގެ އެންމެ ފަހު ޖަލްސާއަށް ވަނީ ސަރުކާރުގެ މަސްއޫލިއްޔަތު އަދާކުރާ ކޮމިޓީން ވަޒީރުންނާ ގުޅޭގޮތުން އޮތް މައްސަލަ ދިރާސާކޮށް ތައްޔާރުކޮށްފައިވާ ރިޕޯޓު ހުށަހެޅުމަށް އެޖެންޑާކޮށްފައެވެ.
އެގޮތުން މައްސޫލިއްޔަތު އަދާ ކުރާ ކޮމިޓީން ވަނީ ޤާނޫނު އަސާސީގައި ބުނާ ޝަރުތު ހަމަވާކަމަށް ކަނޑައަޅައި، އެ ވަޒީރުންނަށް ރުހުންދޭން ވަކިވަކިން ރައްޔިތުންގެ މަޖިލީހުގައި ވޯޓަށް އަހަން ނިންމާފައެވެ.
މީގެ އިތުރުން ރައިސުލްޖުމްހޫރިއްޔާ އާއި އެ މަނިކުފާނުގެ ނައިބު ވަކިކުރެވޭ ގޮތަށް އެމްޑީޕީ އާއި ޑިމޮކްރެޓްސް އިން މަޖިލީހުގެ ގަވައިދަށް ހުށަހަޅާފައިވާ އިސްލާހުތަކާ ގުޅޭ މައްސަލަ ވެސް ވަނީ މާދަމާގެ ޖަލްސާގެ އެޖެންޑާގައި ހިމަނާފައެވެ.
