ރަސްމާލެ ތަރައްޤީ ކުރާނީ ބައިނަލްއަޤްވާމީ މިންގަނޑުން ރައްކާތެރި ރަށެއްގެ ގޮތުގައި: ރައީސް މުޢިއްޒު
ފުށިދިއްގަރުފަޅު, ރަސްމާލެ ތަރައްޤީ ކުރައްވާނީ ބައިނަލްއަޤްވާމީ މިންގަނޑުން ރައްކާތެރި ރަށެއްގެ ގޮތުގައި ކަމަށް ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިހެން ވިދާޅުވީ ފުށިދިއްގަރުފަޅު ހިއްކުމުގެ މަޝްރޫޢު ފައްޓަވައި ދެއްވަން އެ ފަޅުގައި އޮތް ބާޖެއްގައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
އެގޮތުން ރައީސް މުޢިއްޒު ފާހަގަކުރެއްވި ގޮތުގައި ކ. ފުށިދިއްގަރުފަޅު ހިއްކުމަކީ ރާއްޖޭގެ ތާރިހުގައި ހިންގޭ ބިން ހިއްކުމުގެ އެންމެ ބިޔަ މަޝްރޫޢު ކަމަށެވެ.
ހަމަ އެހެންމެ "ރަސްމާލެ" ގެ ނަމުގައި އެތަނުގައި ތަރައްގީ ކުރެވޭ ޒަމާނީ ސިޓީ އާ އެކު، މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލަ ދާއިމީކޮށް ހައްލުވެގެންދާނެ ކަމަށް ރައީސް މުޢިއްޒު ވަނީ ވިދާޅުވެފައެވެ.
ރައީސް މުޢިއްޒު ވިދާޅުވީ ރަސްމާލެއަކީ ޒީރޯ ކާބަން ސިޓީއަކަށް ވާނެ ކަމަށާއި އެ ރަށް ތަރައްޤީ ކުރާނީ ބައިނަލްއަޤްވާމީ މިންގަނޑުން ރައްކާތެރި ރަށެއްގެ ގޮތުގައި ކަމަށާއި އެ ރަށުގެ އުސްމިނުގައި ތިން މީޓަރާއި ދެ މީޓަރު ހުންނާނެ ކަމަށެވެ.
މިއީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓަރަކްޝަން ކުންފުންޏާއި ހަވާލުކޮށްގެން ކުރިއަށް ގެންދާ މަޝްރޫޢުއެކެވެ.
ރައީސް މުޢިއްޒުގެ ރިޔާސީ މެނިފެސްޓޯގައި ހާމަކުރައްވާފައިވާ ގޮތުން ފުށިދިއްގަރުފަޅުގައި ގޯއްޗާއި ފްލެޓު ހިމެނޭ ގޮތަށް 65،000 ހައުސިން ޔުނިޓު ޤާއިމުކުރެވޭނެއެވެ.
