ރައީސްގެ ޗައިނާގެ ދަތުރުފުޅު: އިންޑިއާއިން ބުނީ ރާއްޖޭގެ ރައީސް ދަތުރު ކުރައްވާ ތަނެއް އިނގޭނީ ރާއްޖެއަށް ކަމަށް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަންނަ އާދީއްތަ ދުވަހު ޗައިނާއަށް ކުރައްވާ ދަތުރުފުޅާ ގުޅޭ ގޮތުން ކޮމެންޓެއް ނެތް ކަމަށް އިންޑިއާއިން ބުނެފިއެވެ.

Ads by STELCO

ރާއްޖޭގައި މިހާތަނަށް ރައީސްކަން ކުރެއްވި ހުރިހާ ބޭފުޅުން ވެސް ރަސްމީ ފުރަތަމަ ދަތުރުފުޅު ކުރައްވަނީ އިންޑިއާއަށެވެ. ނަމަވެސް ރައީސް މުޢިއްޒު ވެގެންދާނީ އިންޑިއާއަށް ވަޑައިނުގަނެ, ޗައިނާއަށް ވަޑައިގަންނަވާ ފުރަތަމަ ރައީސް އަށެވެ.

އިންޑިއާގެ އެކްޓާނަލް މިނިސްޓްރީގެ ތަރުޖަމާނު ޝްރި ރާންދިރް ޖައިސްވާލްއާ މިކަމާ ގުޅޭ ގޮތުން އިންޑިއާ ނޫސްވެރިން ވަނީ ސުވާލުކޮށްފައެވެ.

ޖައިސްވާލް ވިދާޅުވީ, ރާއްޖޭގައި ރައީސްކަން ކުރައްވާ ބޭފުޅަކު ދަތުރު ކުރައްވާނެ މަންޒިލަކާއި, ޚާރިޖީ ގުޅުންތައް ބައްޓަން ކުއްވާނެ ގޮތް އިނގޭނީ ރާއްޖެއަށް ކަމަށެވެ. އަދި އިންޑިއާއަށްވުރެ ކުރިން ޗައިނާއަށް ދަތުރު ކުރެއްވުމަކީ ރާއްޖޭގެ ނިންމުމެއް ކަމަށާއި, އެކަމަށް އިންޑިއާއިން ކޮމެންޓް ކުރައްވަން ބޭނުންފުޅު ނުވާ ކަމަށް ވިދާޅުވިއެވެ.

އޭގެ އިތުރުން ނޫސްވެރިން ވަނީ އިންޑިއާގެ ސިފައިން ރާއްޖެއިން ފޭބުމަށް އަންގާފައިވާތީ އެކަމުގެ އަދާހަމަ އައްސަވާފައެވެ. އެ ސުވާލުގެ ޖަވާބުގައި ޖައިސްވާލް ވިދާޅުވީ އަދި އެކަމުގެ އަޕްޑޭޓެއް ނެތް ކަމަށެވެ.

ޗައިނާގެ ރައީސް ޝީ ޖިން ޕިންގެ ރަސްމީ. ދައުވަތަކަށް ރައީސް ޑރ. މުޙައްމަދު މުޢިއްޒު މިމަހުގެ 7 އިން 12 އަށް ޗައިނާއަށް ވަޑައިގަންނަވާނެއެވެ.