ބައެއްގެ އަގު ވައްޓާލަން ކޮންމެ މީހަކަށްވެސް ވާހަކަ ދެއްކިދާނެ، އަންހެނެއް ގަޔަކު ނުޖަހަން: ފަރަޝްގެ ކޮއްކޮ ޝިއުޒް

މޯލްޑިވިއަން އައިޑޮލް ސީޒަން 2 ގެ ބައިވެރިއެއް ކަމަށްވާ އަޙުމަދު ފަރަޝް މުޙައްމަދު ރޭ ދަންވަރު 1:00 ހާއިރު ޏ. ފުވައްމުލަކުގައި ހިންގި މާރާމާރީއެއްގައި، ދެ އަންހެނަކަށް އަނިޔާކުރި ކަމަށް ބުނެ ފަތުރާފައިވާ ވާހަކަ ފަރަޝްގެ އާއިލާގެ ފަރާތުން ދޮގު ކޮށްފިއެވެ.

Ads by STELCO

ފަރަޝް އާއެކު މިމާރާމާރީގައި ބައިވެރިވި ކަމަށް ބުނެފައިވާ، އޭނާގެ ކޮއްކޮ އިބްރާހިމް ޝިއުޒް މުޙައްމަދު "ދެން" އަށް މައުލޫމާތު ދެމުން ބުނީ، ރޭ ދަންވަރު އެބުނާ ގެއެއް ކައިރިއަށް ދިޔައީ ޖެހުނު މައްސަލައެއް ސުލްޙަވެރިކަމާއެކު ހައްލު ކުރުމަށް ކަމަށާއި ފުރަތަމަ ޖެހީ ވެސް އެބުނާ އާއިލާއިން ކަމަށެވެ.

"އަޅުގަނޑުގެ އަންހެން ކޮއްކޮގެ އަލަތު ކައިވެނީގެ ރޭ އެރެއަކީ، އެފިރިހެންމީހާ ކޮއްކޮއަށް ގުޅަނީ. ކޮއްކޮ އަށް މެސެންޖަރ އިން ވަރަށް ގުޅީމަ ވެސް ކޮއްކޮ އޭނަގެ ފޯނެއް ނުނަގާ، އަހަރެންގެ ނަންބަރު ހޯދަންށޭ ފަރަޝްގެ ނަންބަރު ހޯދަންށޭ ބުނީމަ ނަންބަރ ދީފަވެސް ކޮއްކޮ ބުނި ތިމަންނައަށް ދެން ނުގުޅައްޗޭ. އެވަރުންވެސް ގުޅީމަ ކޮއްކޮގެ ފިރިމީހާ ފޯނު ނަގާފަ ވާހަކަ ދެއްކީ. ދެން ފިރިހެންމީހާގެ ބޭބެވެސް ގުޅީމަ އަހަރެން ބުނިން އެބަދަމޭ ވާހަކަ ދައްކަން." ޝިއުޒް ބުންޏެވެ.

ޝިއުޒް ބުނިގޮތުގައި ފަރަޝް އާއި ޝިއުޒް އެގޭ ކައިރިއަށް ގޮސް އެފިރިހެންމީހާ (ފަރަޝްގެ އަންހެން ކޮއްކޮއަށް ގުޅިމީހާ) ސައިކަލަށް އަރުވާފައި، ވާހަކަ ދައްކަން ހިނގާށޭ ބުންޏެވެ. ނަމަވެސް އެމީހާ ދާން އިދިކޮޅު ހަދާ، ފަރަޝް ގައިގާ ޖަހަން އުޅުނުކަމަށް ބުންޏެވެ. އަދި "ޖަހައިފިއްޔާ ޖަހާނެ ކަމަށް" ފަރަޝް ބުނި ކަމަށްވެއެވެ.

ޝިއުޒް ބުނީ ފުރަތަމަ ޖެހީވެސް އެފިރިހެން މީހާ ކަމަށާއި، ފަރަޝް އާއި އެފިރިހެން މީހާއާއި "ހިފައިގަތްތަނުން" އެތަނަށް ދިޔައީ އެމީހާގެ ބޭބެ ކަމަށެވެ. ޝިއުޒް އާއި ފަރަޝް ތެޅީ ސެލްފް ޑިފެންޑް ކުރުމުގެ ގޮތުގައި ކަމަށް ވެސް ބުންޏެވެ.
"އޭނަގެ ބޭބެ އައިސް ކައިރިވީމަ ވެސް ދުރުކުރީ އަހަރެން. ބުނިން ތަޅާނެ ކަމެއް ނެތޭ. އެކަމަކު ވެސް އޭނަ ހަމަ ހުރެގެން ހައިޕާ ވަނީ. ކޮންމެ ފަހަރަކު އަހަރުމެން ސައިކަލަށް އަރާއިރަށް ތަޅަނީ. ދެން އަހަރުމެންވެސް ނުތިބޭނެދޯ ތަޅަން ދީގެނެއް. އެހެންވެ ތަޅަން ފެށީ. އޭނަ ވެއްޓި އަނިޔާވީމަ އޭނަގެ ދައްތަ އަޒުފާ އެމީހުންގެ މަންމައަށް ގޮވަނީ މިއޮށް ކޮއްކޮ މަރާލަނީ އޭ ކިޔާފަ. އެގޭގައި އިންނާނީ ވަރަށް ކުޑަ ފާރެއް ރާނާފައި. ފާރުގައި އަޅައިގަނެފަ އޭނަ މަންމަ ވެއްޓެނީ. އޭނަ މަންމަ ވެއްޓުނު ގަޑީގައި އަޒުފާ އެތަނުން ރުކުފަނުގެ ބުޑުބުރިއެއް ހިފައިގެން އައީ ބޭބެ (ފަރަޝް) ގައިގަ ޖަހަން. ޖަހަން އައިމަ އަަހަރެން އަޒުފާ ގެ ކުރިމައްޗަށް އެރީ. އަހަރެންގެ އަތުގައި އަޒުފާ ޖެހިތަން ކަނޑައިގެން ވެސް ގޮސްފައި އެބަހުރި. އޭނަ ޖެހިހައި އެއްޗެއް ޖެހީ އަހަރެން ގައިގަ. އަހަރެން ރުޅިއެއް ނާދޭ. އެއީ އަންހެނެއް" ޝިއުޒް ބުންޏެވެ.

މިހިސާބަށް ވާހަކަ ދިޔުމުން، އެއަންހެން މީހާގެ މޭމަތީގައި ޖެހިކަމަށް ބުނެފައިވާ ކަމަށާއި، އޭގެ ހަގީގަތަކީ ކޮބައިތޯ އެހުމުން ޝިއުޒް ބުނީ "ބައެއްގެ އަގުވައްޓާލަން ވާހަކަ ދައްކާއިރު ކޮންމެފަދަ ވާހަކައެއް ވެސް ދައްކާފާނެ!" ކަމަށެވެ.

މިމައްސަލައާއި ގުޅޭގޮތުން ކުރިން ފަރަޝް މެންގެ ފަރާތުން ބަހެއް ނުގެނެސްދެވުނީ ފަރަޝް އާއިވެސް އަދި އެއާއިލާއިން މީހަކާވެސް ކުރިން ގުޅޭނެ ގޮތް ނުވުނުންނެވެ.

ނަމަވެސް "ދެން" އިން ބޭނުންވީ މިކަމާއި ގުޅޭގޮތުން ދެފަރާތުގެ ބަސް ވެސް ހިމަނާލާށެވެ. އެހެންކަމުން އާއިލާއާއި ގުޅޭގޮތްވުމުން ކަންވީގޮތް އެފަރާތުންވެސް އޮޅުންފިލުވާލީމެވެ.

ފުލުހުން އަދިވެސް މިމައްސަލައާއި ގުޅޭގޮތުން އެއްޗެއް ވިދާޅެއް ނުވެއެވެ.