ޒޫނާއަށް ރައީސްގެ ތަސައްލީ ވިލިމާލޭ މޫދަށް އެރޭ ސަރަހައްދު ހިމާޔަތްކޮށްދޭނަން
އަންހެން ޑައިވަރު, އަދި ޓްރެއިނަރު ޒުނާ ނަސީމް އެދިލެއްވި ފަދައިން ވިލިމާލޭ މޫދަށް އެރޭ ސަރަހައްދު ހިމާާޔަތްކޮށްދެއްވާނެ ކަމުގެ ޔަގީންކަން ރައީސް ޑރ. މުހައްމަދު މުއިއްޒު ދެއްވައިފިއެވެ.
އާންމުންގެ ސުވާލުތަކަށް ޖަވާބު ދެއްވުމަށް "ރައީސްގެ ޖަވާބު" ނަމުގައި ސޯޝަލް މީޑިއާ މެދުވެރިކޮށް ކުރިއަށްގެންދާ ޕްރޮގްރާމްގައި, "މޫދު ބުޅާ ޑައިވް ސެންޓަރު"ގެ ކޯ ފައުންޑަރު ޒޫނާ ވަނީ ދެ ސުވާލެއް ކުރައްވައިފައެވެ.
އެއް ކަމަކީ ވިލިމާލޭ މޫދަށް އެރެން އޮތް ސަރަހައްދު ހިމާޔަތްކޮށްދިނުމެވެ.
"އެ ތަނުން ބޯޓު ފަހަރު އެބަ ދަތުރުކުރޭ. ކުޑަކުދިން އެރި އޮއްވާ މަސް ހިފާ މީޙުން ދަގަނޑާ އެކީ އެ ހުރިހާ ކަމެއް އެބަ ކުރޭ. ހިމާޔަތް ކޮށްދީފިއްޔާ ވަރަށް ގިނަ ކުޑަކުދިންނާއި ބޮޑެތި މީހުންނަށް ވެސް މޫދަށް އެރިލަން ފަސޭހަ ވާނެ," ޒޫނާ ބުނެފައިވެއެވެ.
އެ ސުވާލަށް ރައީސް ވިދާޅުވީ, މާލެ ސަރަހައްދުގައި މޫދަށް އެރިލާނެ މާ ގިނަ ތަންތަން ނެތް ކަމަށާއި ޒޫނާ ފާހަގަކުރިގޮތަށް އެ ސަރަހައްދު ހިމާޔަތް ކުރެވިގެން ދިއުމަކީ މުހިންމު ކަމެއް ކަމަށެވެ.
ސަރުކާރުގެ ޕްލޭން އެކަމަށް ގެންގުޅޭ ކަން ފާހަގަކޮށް ރައީސް ވަނީ އެކަން ވަރަށް އަވަހަށް ކުރައްވާނެ ކަމަށް ވިދާޅުވެފައެވެ.
ދެ ވަނަ ކަމަކަށް ޒޫނާ އެދިލެއްވީ ދިވެހިންނަށް ހުނަރު ދަސްކޮށްދޭ ފަދަ ތަންތަން ހުޅުމާލޭގައި ވެސް ހެޔޮ އަގުގައި ދިގު މުއްދަތަށް ކުއްޔަށް ދޫކޮށްފައިވާއިރު އެ އިންތިޒާމް ވިލިމާލެއިން ވެސް ހަމަޖައްސައިދިނުމެވެ.
އެ ސުވާލަށް ޖަވާބުދެއްވަމުން ރައީސް ވިދާޅުވީ ހަމަޖެހިފައި އޮންނަ އުސޫލުގެ ތެރެއިން ދިވެހިންނަށް ފުރުސަތުތައް ވިލިމާލޭގައި ވެސް ހަމަޖައްސައިދޭނެ ކަމަށެވެ.
