މަޖިލިސް އިންތިޚާބު ފަސް ކުރަން ޕީޕީއެމް ޕީއެންސީން ދެކޮޅު
ރައްޔިތުންގެ މަޖިލިސް އިންތިޚާބު ރޯދަ މަހަށް ފަސްކުރަން ޕީޕީއެމް ޕިއެންސީން ދެކޮޅު ހަދައިފިއެވެ.
މަޖިލިސް އިންތިޚާބު ފަސް ކުރަން ނިންމާފައި ވަނީ އިންތިހާބުތަކާ ބެހޭ ގާނޫނަށް ހުށަހެޅި އިސްލާހު ކޮމިޓީ އަށް ފޮނުވަން ފާސްކޮށްފައިއެވެ.
މި އިންތިޚާބު ބާއްވަން މިހާރު އިލެކްޝަންސް ކޮމިޝަންސް- އީސީއިން ނިންމާފައި ވަނީ މާޗް 17 ވަނަ ދުވަހުއެވެ. މިއީ ރޯދަ މަހުގެ ފުރަތަމަ ހަފްތާއެވެ.
ނަމަވެސް މަޖިލީހަށް ހުށަހެޅުނު އިސްލާހެއްގެ ސަބަބުން ވަނީ ރޯދަމަހު އެއްވެސް އިންތިޚާބެއް ނުބޭއްވޭގޮތަށް ފާސްކޮށްފައިއެވެ. އަދި ރޯދަމަހަށް ފަހު ބޭއްވޭ އިންތިޚާބެއް ބޭއްވޭނީ ރޯދަމަސް ނިމުމަށް ފަހު 10 ދުވަސް ފަހުގައި ކަމަށްވެސް އެ އިސްލާހުގައި ވަނީ ބަޔާންކޮށްފައިއެވެ.
މި އިސްލާހާއި ގުޅެގޮތުން މަޖިލީހުގެ ތަޅުމުގައި ވާހަކަ ދެއްކި އިރު އެމްޑީޕީ އާއި ޑިމޮކްރެޓްސް އާއި ޖޭޕީ އަދި އެމްޑީއޭ މެންބަރު ވަނީ ބިލަށް ތާއީދުކޮށްފައިއެވެ.
އެ ބިލާ ގުޅޭ ގޮތުން ޕީޕީއެމްގެ މެންބަރަކު ވާހަކަ ދައްކާފައި ނުވާއިރުު، ޕީއެންސީގެ ފަރާތުން ވާހަކަ ދެއްކެވީ އެ ޕާޓީ އާ އަލަށް ގުޅިވަޑައިގަތް ދެ މެންބަރެވެ. އެ ދެ މެންބަރުން ވެސް އެ ބިލަށް ތާއީދު ކުރައްވާ ކަމަށް ވިދާޅުވެފައި ނުވާކަން ފާހަގަކޮށްލެވެއެވެ.
