މިނިސްޓްރީތަކުން ބޭރަށް ކުރާ ދަތުރުތައް ހުއްޓާލަން ރައީސް އަންގަވައިފި
ސަރުކާރުގެ ހަރަދުތައް ކުޑަކުރުމުގެ ގޮތުން މިނިސްޓްރީތަކުން ބޭރަށްކުރާ ދަތުރުތައް ހުއްޓާލުމަށް ރައީސް ޑރ މުހައްމަދު މުއިއްޒު އަންގަވައިފިއެވެ.
ގއ ފަރެސްމާތޮޑާގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، ވެރިކަމާއި ހަވާލުވެވަޑައިގެންނެވި ނިމިދިޔަ ސަރުކާރުން ކުންފުނިތަކުން ކޮށްފައިވާ މަސައްކަތްތަކަށް ނުވަ ބިލިއަން ރުފިޔާ އޮތް ކަމަށެވެ.
''ނުވަ ބިލިއަން ރުފިޔާގެ ދަރަނި ސަރުކާރު ކުންފުނިތަކުން އާއްމު ރައްޔިތުންނަށް ދައްކަން ޖެހޭ'' ރައީސް ވިދާޅުވިއެވެ. އޭގެ ތެރޭގައި ސަރުކާރުގެ ވުޒާރާތަކާއި ސަރުކާރު ހިއްސާވާ ކުންފުނިތަކުން ދައްކަން ޖެހޭ ފައިސާ ހިމެނޭ ކަމަށް އެމަނިކުފާނު ވިދާޅުވިއެވެ. ރާއްޖޭއިން ބޭރުގެ ދަރަނި އޮތީ 120 ބިލިއަން ރުފިޔާއެވެ. މި ސަރުކާރަށް މިވީ ތިން މަސް ތެރޭގައި އެ ފައިސާތައް ދައްކަން ފަށާފައިވާ ކަމަށާއި، އެ އަދަދުތައް ދައްކާނީ އިތުރަށް ފައިސާ ޗާޕުނުކޮށް ކަމަށް ރައީސް ވިދާޅުވިއެވެ.
އެއަށް ފަހު ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރަށް ރައީސް ވަނީ ވަރަށް ބޮޑަށް ފާޑުވިދާޅުވެފައެވެ. އެމަނިކުފާނު ވިދާޅުވީ ކުރީ ސަރުކާރުން މިއިން ދުވަހަކު ޗާޕުނުކުރާ މިންވަރަށް ފައިސާ ޗާޕުކުރުމުން ފައިސާގެ އަގުވެއްޓިފައިވާ ކަމަށެވެ.
''... އެކަން ކުރީމަ ފައިސާގެ އަގު ވެއްޓުނީ އެތައް ކަމެއް އެތައް ގޮތަކުން އިގްތިސޯދު އަނދަވަޅަކަށް ވެއްޓިގެން މިދިޔައީ، އަދި އޭގެ އިތުރަށް ދައްކަން ޖަމާކޮށްފައި ސޮވެރިން ޑިވޮލޮޕްމެންޓް ފަންޑުގައި ހުރި ޑޮލަރުވެސް މާރުކުރީ'' ރައީސް ވިދާޅުވީ ކުރިއަށް އޮތް ދެ އަހަރު ދައްކަން ހުރި ލޯނުތަކަށް ފައިސާ ދައްކަން އެސްޑީއެފް އަށް ޑޮލަރު ޖަމާކުރަން ފަށާފައިވާ ކަމަށެވެ.
ރައީސް ވިދާޅުވި ގޮތުގައި ކުރިއަށް އޮތް ތަނުގައި އިގްތިސާދު ހަރުދަނާކޮށް އިގުތިސޯދަށް ފައިސާ ވަންނާނެ ދޮރުތައް ހުޅުވަމުން ކުރިއަށްދާނަމަ ދެން ފެންނާނީ ތިޔާގި ދުވަސްތަކެއް ކަމަށެވެ. އެއާޕޯޓުތައް ހެދުމާއި ރިސޯޓުތައް ހެދުމާއި ރާއްޖެއަށް ބޮޑެތި އިންވެސްޓުމެންޓުތައް ހޯދުން އިގްތިސާދު ހަރުދާނުކުރުމުގެ ތެރޭގައި ހިމެނޭކަން ރައީސް ފާހަގަކުރެއްވިއެވެ. ޒަރުރީ ހަރަދުތައް
މީގެން ފެންނާނީ ކުރިއަށް އޮތް ދުވަސްތަކުގައި، މި އަހަރު ތެރެއިން ފެށިގެން ކުރިއަށް އޮތް އަހަރުތަކުގައި ރައްޔިތުން މުއްސަނދިވާތަން
ރައީސް ވިދާޅުވީ ސަރުކާރުގެ ހަރަދުތައް ކުޑަކުރުމުގެ ގޮތުން ޒަރޫރީ ހަރަދުތައް ނޫން ހަރަދުތައް ނުކުރަން އަންގަވާފައިވާނެ ކަމަށެވެ.
''މިސާލަކަށް ދަތުރުތައް ރާއްޖެއިން ބޭރަށް ކުރުން ކަހަލަ ކަންތައް ވިޔަސް ހުއްޓާލަން އަންގާފައި އޮންނާނެ'' ރައީސް ވިދާޅުވީ ރަށްތަކަށްކުރާ ދަތަރުތަކުގެ ހަރަދުތައްވެސް ކުޑަކުރައްވާނެ ކަމަށެވެ.
މަސްވެރިންނާ ގުޅޭ ގޮތުން ވާހަކަފުޅު ދައްކަވަމުން ރައީސް ވިދާޅުވީ ގޮތުގައި މަސްވެރިންނަށް ނުދެއްކި ހުރި 440 މިލިއަން ރުފިޔާ މި ސަރުކާރުން ވަނީ ދައްކާފައެވެ. އަދިވެސް އިތުރަށް 300 އެއްހާ މިލިއަން މަސްވެރިންނަށް ދައްކަން ޖެހޭ ފައިސާވެސް ވަރަށް އަވަހަށް ދައްކައި ނިންމާލާނެ ކަމަށް ވިދާޅުވިއެވެ. އެއަށް ފަހު އެމަނިކުފާނު ވައުދުވެވަޑައިގެންނެވި ގޮތަށް މަސްވެރިންނަށް 48 ގަޑިއިރުތެރޭގައި މަސްވެރިންނަށް ފައިސާ ލިބޭނެ ގޮތް ހަމަޖެހިގެންދާނެ ކަމަށް ވިދާޅުވިއެވެ.
