ސަރުކާރުގެ ވިސްނުމުގެ މަޖިލީހެއް އޮންނަން ޖެހޭ: ރައީސް
އަލަށް އިންތިހާބުވާ ރައްޔިތުންގެ މަޖިލީހަކީ ސަރުކާރުގެ މެޖޯރިޓީ އޮންނަ މަޖިލީހަކަށްވާން ޖެހޭ ކަމަށް ރައީސް ޑރ މުހައްމަދު މުއިއްޒު މިރޭ ވިދާޅުވެއްޖެއެވެ.
ބޮޑު ތިލަދުންމައްޗަށް ކުރައްވަމުން ގެންދަވާ ދަތުރުފުޅުގެ ތެރެއިން ހދ. އިހަވަންދޫ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނު ވެވަޑައިގެންފައިވާ ވައުދުތައް ފުއްދެވުމަށް ކުރަން ޖެހޭ ގިނަ މަސައްކަތްތަކެއް އެބަހުރި ކަމަށެވެ.
''ބޮޑެތި ބިޔަ މަޝްރޫއުތައް ހިންގަން ޖެހޭ'' ރައީސް ވިދާޅުވި ގޮތުގައި ގާނޫނީ ނިޒާމު ރޭވިފައި އޮންނަ ގޮތުން އެ ހުރިހާ ކަމެއް ކުރުމުގައި ރައްޔިތުންގެ މަޖިލީހުގެ ދައުރު މުހިއްމެވެ.
މަޖިލީހަށް މެމްބަރުން ހޮވަނީ ރައްޔިތުންގެ ވޯޓަކުން ކަމަށްވާތީވެ ސަރުކާރުން ބޭނުންވާ ކަންތައް ކޮށްދޭނެ މެންބަރުންތަކެއް ތިބޭ މަޖިލީހަށް ވާން ޖެހޭ ކަމަށް އެމަނިކުފާނު ވިދާޅުވިއެވެ.
ސަރުކާރުގެ ކިބައިން ކަންތައްތައް ކޮށްދިނުމުގައި އެހީތެރިކަންދޭ އެއް ވިސްނުމުގައި މަސައްކަތްކުރާ ރައްޔިތުންނަށްޓަކައި ކަންތައްކޮށްދނެ މަޖިލީހެއް އޮންނަން ޖެހޭ
ރައީސް ވިދާޅުވީ ސަރުކާރުގެ ވިސްނުމުގައި ތިބޭ 'ބަޔަކު' މަޖިލީހަށް އިންތިހާބުކުރުން ވާނީ މަޝްރުއޫތައް ބާރު ސްޕީޑުގައި ކުރިއަށް ގެންދިޔުމަށް އެޅޭ ފިޔަވަޅަކަށެވެ.
އެއަށް ފަހު ވިދާޅުވީ ރައްޔިތުންގެ ކުރިމަތީގައި އޮތީ ދެ ''ޗޮއިސް'' ކަމަށެވެ. އެއީ ކޮންމެ ހާލެއްގައި ކަމެއް ކުރެވިގެން ދިޔުންތޯ ނުވަތަ އެމަނިކުފާނު ވައުދުވެވަޑައިގެންފައިވާ ގޮތަށް، ކަންތައްތައް ފުރިހަމަގޮތުގައި ބާރު ސްޕީޑުގައި ގެންގޮސް ނިންމުންތޯ ކަމަށެވެ.
''ދެ ޗޮއިސް އޮތީ، ރައްޔިތުން ނިންމަވާ ގޮތަކުން ސަރުކާރު ކުރިއަށްދާނެ މަގު ކަނޑައެޅިގެންދާނީ . އެއީ ރައްޔިތުންގެ މަޖިލީހުގެ ދައުރު ގާނޫނީ ނިޒާމުގައި އޮންނަ ގޮތުން'' ރައީސް ވިދާޅުވިއެވެ.
އެ ޖަލްސާގައި ރައީސް ވަނީ އެމަނިކުފާނު އިހަވަންދޫއަށް ވެވަޑައިގެންފައިވާ ވައުދުތައް ފުއްދައިދެއްވާނެ ކަމުގެ ޔަގީންކަން އެ ރަށު ރައްޔިތުންނަށް އަރުވާފައެވެ.
Ads by STO
