ކޮރަޕްޝަން ހުއްޓުުވުމަށް އިސްލާމިކް މިނިސްޓްރީއާ އޭސީސީއާ ދެމެދު ފަހުމުނާމާއެއްގައި ސޮއިކޮށްފި
ކޮރަަޕްޝަނަށް މަގުފަހިވާ ކަންކަން ވިޔަ ނުދިނުމަށް ކުރެވޭނެ މަސައްކަތްތައް ދެނެގަނެ، އެ މަގްސަދު ހާސިލްކުރުމަށް ކުރެވޭނެ މަސައްކަތްތައް ކަނޑައެޅުމަށް އިސްލާމީ ކަންތައްތަކާ ބެހޭ ވުޒާރާ އާއި އެންޓި ކޮރަޕްޝަން ކޮމިޝަން އާއި ދެމެދު ފަހުމުނާމާއެއްގައި އިއްޔެ ސޮއިކޮށްފިއެވެ.
އެ ފަހުމުނާމާގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދުއެވެ. އަދި އެންޓި ކޮރަޕްޝަން ކޮމިޝަންގެ ފަރާތުން ސޮއިކުރެއްވީ އެ ކޮމިޝަންގެ ރައީސް އާދަމް ޝާމިލްއެވެ.
އިސްލާމިކް މިނިސްޓްރީން ބުނީ މި ފަހުމުނާމާގެ ސަބަބުން ކޮރަޕްޝަން ވިޔަ ނުދިނުމަށް އަޅަންޖެހޭ ފިޔަވަޅުގަކުގެ މައްޗަށް އެންޓި ކޮރަޕްޝަން ކޮމިޝަނުންދޭ ލަފަޔާއި އިރުޝާދު ތަންފީޒުކުރުމަށް ދެފަރާތުން ގުޅިގެން ކުރާނެ މަސައްކަތްތައް ކަނޑައެޅިގެން ދާނެ ކަމަަށެވެ.
އެ ފަހުމުނާމާގެ މަގުސަދުތަކުގެ ކޮރަޕްޝަން ހުއްޓުވަން އޭސީސީއާއި މިނިސްޓްރީ ގުޅިގެން ކުރެވޭނެ މަސައްކަތްތައް ދެނެގަނެ، އެ މަގުސަދު ހާސިލުކުރެވޭނެ ގޮތެއްގެ މަތިން ކުރާނެ މަސައްކަތްތައް ކަނޑައެޅުމާއި، ކޮރަޕްޝަން ހުއްޓުވަން އަޅަންޖެހޭ ފިޔަވަޅުތަކުގެ މައްޗަށް ކޮމިޝަނުން ދޭ ލަފައާއި އިރުޝާދު ތަންފީޒު ކުރުމުގައި ދެ ފަރާތުން ގުޅިގެން ކުރާނެ މަސައްކަތްތައް ކަނޑައެޅުން އަދި މިނިސްޓްރީއާ އޭސީސީއާ ދެމެދުގައި ފަންނީ އެހީތެރިކަން ބަދަލުކުރުމުގައާއި މައްސަލަތަކާ ގުޅިގެން ދިމާވާ ކަންކަމުގައި ފީޑްބެކް ޕްރޮސެސް އެއް ގާއިމުކޮށް އަމަލުކުރާނެ ގޮތްތަކެއް ކަނޑައެޅުން ހިމެނެއެވެ.
އެ ރަސްމިއްޔާތުގައި ޝަހީމް ވިދާޅުވީ، ކޮރަޕްޝަން ހިންގުމަކީ އިސްލާމްދީނުގައި ނަހީކުރައްވާފައިވާ ކަމެއްކަމަށެވެ. އަދި ކޮރަޕްޝަންގެ އަމަލެއް ހިންގުމަށް ފުރުސަތު ދީގެން ނުވާނެކަމަށް މިނިސްޓަރު ވިދާޅުވިއެވެ.
އޭސީސީއާ އިސްލާމިކް މިނިސްޓްރީން ކޮރަޕްޝަން ހުއްޓުވުމާއި ގުޅޭ ފަހުމުނާމާއެއްގައި ސޮއިކޮށްފައިވާއިރު، މި ސަރުކާރު ކޮރަޕްޓްނުވެ ހިންގާނެ ކަމުގެ ޔަގީންކަން ރައީސް ޑރ މުހައްމަދު މުއިއްޒު ވަނީ ދެއްވާފައެވެ. ސަރުކާރުގެ އެއްވެސް ފަރާތެއް ކޮރަޕްޝަންގެ އަމަލެއް ހިންގާކަން ސާބިތުވެއްޖެ ހާލަތެއްގައި އެފަރާތަކާމެދު އަޅަންޖެހޭ ގާނޫނީ ފިޔަވަޅު ފަސްޖެހުމެއްނެތި އަޅުއްވާނެކަމުގައި މި އަހަރުގެ އެންޓި ކޮރަޕްޝަން ދުވަހުގެ ޖަލްސާގައި ރައީސް ވިދާޅުވެފައިވެއެވެ.
ތިގޮތަށް ފެނަކައިން ވެސް ވަރަށް ކަންކަން ކުރި