ރޯދަމަހު ކާބޯތަކެތީގެ އަގު ހެޔޮވާނެކަމުގެ ޔަގީންކަން ރައީސް ދެއްވައިފި
ރަމަޟާން މަހު ކާބޯތަކެތީގެ ބާވަތްތައް ހެޔޮ އަގެއްގައި ރައްޔިތުންނަށް ލިބޭނެ އިންތިޒާމް ހަމަޖެއްސުމަށް މަސައްކަތްކުރައްވަމުންދާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސް މުއިއްޒު އެކަން ވިދާޅުވީ އާންމުންނަށް، ރައީސާ ސުވާލުކުރެވޭ ގޮތަށް ކުރިއަށް ގެންދާ ރައީސް އޮފީހުން ސިލްސިލާކޮށް ކުރިއަށްގެންދާ ''ރައީސްގެ ޖަވާބު'' ގައި މީހަކު ކުރި ސުވާލެއްގެ ޖަވާބުގައެވެ.
މިފަހަރު ރައީސްގެ އަރިހުން މީހަކު އެދުނީ ކުރިއަށް ރޯދަ މަސް އޮތުމާ އެކު ކާބޯތަކެތި އަގު ހެޔޮކޮށް ދިނުމަށެވެ.
އެ މީހާގެ ސުވާލަށް ޖަވާބުދެއްވަމުން ކަމާއި ރައީސް ވިދާޅުވީ ކާބޯތަކެތީގެ އަގުތައް ހެޔޮ ކުރުމަކީ ސަރުކާރުން އިސްކަންދޭ ކަމެއް ކަމަށެވެ. ބައެއް ތަކެތީގެ އަގު މިހާރު ހެޔޮކޮށްފައިވާކަމަށާއި އަދި އިތުރު ބާވަތްތަކުގެ އަގުވެސް ހެޔޮކުރުމުގެ މަސައްކަތް ކުރަމުން އަންނަކަމަށް ރައީސް މުއިއްޒު ވިދާޅުވިއެވެ.
"އަސާސީ ހުރިހާ ބަވަތެއް އެސްޓީއޯ މެދުވެރިކޮށް ގެނެވި, އަގުހެޔޮ ކުރުމުގެ މަސައްކަތް މިހާރުވެސް ކުރިޔަށް އެބަދޭ. މިހާރުވެސް އަގުހެޔޮކޮށް ވިއްކަން ފަށާފައިވަނީ ، އަދިވެސް އިތުރު މަސައްކަތްތައް ކުރާނަން ކާބޯތަކެތީގެ އަގުތައް ހެޔޮކުރުމަށްޓަކައި،" ރައީސް ވިދާޅުވިއެވެ.
އެމަނިކުފާނު ވިދާޅުވީ ސަރުކާރުން ގެންގުޅޭ މެދު ރާސްތާ އަދި ދުރު ރާސްތާގެ ޕްލޭން އަކީ ރާއްޖޭގައި އުފެއްދޭ ހުރިހާ ބާވަތެއް ރާއްޖޭގައި އުފެއްދޭގޮތް ގާއިމްކޮށް، ފުޑް ސެކިއުރިޓީ ޔަގީންކުރުން ކަމަށެވެ. މިއާއެކު ކާބޯތަކެތީގެ އަގު ވަރަށް ބޮޑަށް ހެޔޮވާނެ ކަމަށް ރައީސް މުއިއްޒު ވިދާޅުވިއެވެ.
ރައީސް މިފަދައިން ވިދާޅުވެފައިވާއިރު ބާޒާރުގައި ލުނބޯ, ފިޔާ, އަލުވި އަދި ބިހުގެ އަގު ބޮޑުވެގެން ދިއުމާ ގުޅިގެން, އެސްޓީއޯއިން އެތަކެތި އެތެރެކޮށް އަގުހެޔޮކޮށް ވިއްކަން ފަށައިފައިވެއެވެ.
ރަމަޟާން މަހަކީ ތަކެތީގެ އަގުތައް އުފުލިގެންދާ، އަދި ވަކިން ހާއްސަކޮށް ބާޒާރުގައި ވިއްކާ ތަކެއްޗަށް ޑިމާންޑު ބޮޑު ދުވަސްވަރެކެވެ.
