ސެން ޓީޗަރުންނަށް ރިސްކު އެލަވެންސް ހަމަޖައްސައިދޭނަން: ރައީސް
ނުކުޅެދުންތެރިކަން ހުންނަ ކުދިންނަށް ކިޔަވައިދޭ، ސެން ޓީޗަރުންނަށް ރިސްކް އެލަވަންސް ހަމަޖައްސަވައިދެއްވާނެ ކަމަށް ރައީސް ޑރ. މުހައްމަދު މުއިއްޒު ވައުދުވެވަޑައިގެންފިއެވެ.
ރައީސް މުއިއްޒު އެކަމަށް ވައުދުވެވަޑައިގެންނެވީ އާއްމުންނަށް، ރައީސާ ސުވާލުކުރެވޭ ގޮތަށް ރައީސް އޮފީހުން ސިލްސިލާކޮށް ކުރިއަށްގެންދާ "ރައީސްގެ ޖަވާބު" ގެ މިއަަދުގެ ސެގްމެންޓުގައެވެ.
ސެން ކިޔަވައިގެން ތިބޭ ޓީޗަރުން މަދުކަން، ރައީސްއާ ސުވާލުކުރި މ. މުލަކުގެ ސްކޫލުގެ ޓީޗަރަކު ވަނީ ފާހަގަކޮށްފައެވެ.
ސަރުކާރުގެ ރަސްމީ 'އެކްސް' އެކައުންޓުން އާއްމުކޮށްފައިވާ އެ ވީޑިއޯގައި ޓީޗަރު ބުނީ ކުދިންގެ އަދަދު އިތުރުވަމުން އަންނައިރު ސެން ޓީޗަރުން ހޯދުން ދަތިކަމަކަށްވެފައިވާ ކަމަށެވެ.
އެހެންވެ މީގެ ކުރިން ދެމުން އައި ރިސްކު އެލެވަންސް އަލުން ލިބޭނެ ގޮތް ހަމަޖައްސައިދޭން އެ ޓީޗަރު ރައީސް ގާތު އެދުނެވެ.
އެ ސުވާލުގެ ޖަވާބުގައި ރައީސް ވިދާޅުވީ ނުކުޅެދުންތެރިކަން ހުންނަ ކުދިންނަށް ކިޔަވައިދޭ ޓީޗަރުން ތަމްރީނު ކުރުމަކީ ސަރުކާރުގެ ވަރަށް މުހިންމު ސިޔާސަތެއް ކަމަށެވެ. މި އަހަރުގެ މެދުތެރޭގައި ޓީޗަރުން މަދުކޮށް ތިބި ދާއިރާތަކުން އިތުރު ޓީޗަރުންގެ ހޯދުމާއި ތަމްރީނު ކުރުމުގެ މަސައްކަތް ފެށިިގެންދާނެކަން ރައީސް ހާމަކުރެއްވިއެވެ.
އެއަށްވުރެ ކުރިންވެސް މިހާރުން މިހާރަށްވެސް އެ ދާއިރާގެ ޓީޗަރުން ލިބެންހުރި ވަރެއް ބަލާ ޓީޗަރުން އިތުރު ކުރުމުގެ މަސައްކަތް ކުރާނަން
ރައީސް މުއިއްޒު ވިދާޅުވި ގޮތުގައި ރިސްކް އެލަވަންސް އަށް ބަދަލު އައީ މިދިޔަ ސަރުކާރުން ފެށިގެން އަމަލުކުރަމުންދާ ޕޭ ފްރޭމްވާކްގެ ސަބަބުންނެވެ.
