ސަލާހުއްދީން ސްކޫލްގެ ކިޔެވުން ދެ ދަންފަޅިއަށް ބަދަލުކުރަނީ
ކުރިއަށް އޮތް ދިރާސީ އާ އަހަރާ އެކު، ހުޅުމާލެ 2 ގެ ސަލާހުއްދީން ސްކޫލްގެ ކިޔެވުން ދެ ދަންފަޅި އަށް ބަދަލުކުރަން އެޑިއުކެޝަން މިނިސްޓްރީން ނިންމައިފިއެވެ.
ސަލާހުއްދީން ސްކޫލުގެ ޕްރިންސިޕަލް ނާސިހާ އިދުރީސް މިއަދު ވިދާޅުވީ، އަންނަ ދިރާސީ އާ އަހަރު އެ ސްކޫލުގައި ދެ ދަންފަޅި އަށް ކިޔަވައިދޭން ފަށާނެކަން މިނިސްޓްރީން ރަސްމީކޮށް އަންގާފައިވާ ކަމަށެވެ.
އެގޮތަށް ނިންމުމުން ގިނަ ދަރިވަރުންނަށް އެ ސްކޫލުން ފުރުސަތު ލިބޭނެ ކަމަށް އޭނާ ވިދާޅުވިއެވެ.
އެކަމާ ގުޅޭގޮތުން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިދިޔަ ބުދަ ދުވަހު ވިދާޅުވީ ދެވަނަ ފިޔަވަހިން ސްކޫލް ޖާގައަށް އެދި 800 އަށް ވުރެ ގިނަ ރިކުއެސްޓް ލިބިފައިވާ ކަމަށާއި މި ހިނގާ ދިރާސީ އަހަރު ނިމޭއިރު މި އަދަދު 1000 އަށްވުރެ އިތުރުވާނެކަމަށް ބެލެވޭ ކަމަށެވެ.
ސަލާހުއްދީން ސްކޫލްގައި ކިޔަވައިދޭން ފެށީ އޮގަސްޓް 2022 ގައެވެ.
Ads by STO
