ބޭރުގެ ސިފައިން ތިބޭގޮތަކަށް އެއްވެސް ސިޔާސަތެއް ނުގެންގުޅޭނަން: ރައީސް
ރާއްޖޭގައި ބޭރުގެ ސިފައިން ތިބޭނެގޮތަކަށް އެއްވެސް ސިޔާސަތެއް ނުގެންގުޅޭނެކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް އެހެން ވިދާޅުވީ އާންމުންނަށް ރައީސްއާ ސުވާލުކުރެވޭ ގޮތަށް ރައީސް އޮފީހުން ސިލްސިލާކޮށް ކުރިއަށް ގެންދާ ''ރައީސްގެ ޖަވާބު'' ޕްރޮގްރާމުގައި އާއްމުންގެ މީހަކު ކުރި ސުވާލުތަކަށް ޖަވާބުދެއްވަމުންނެވެ.
ރާއްޖޭގެ ސަރަޙައްދު ބެލެހެއްޓުމަށް އަލަށް ގެނައި ޑްރޯންތައް ދުއްވުމާ އޮޕަރޭޓްކުރުމުގެ ކަންކަމުގައި ބޭރުގެ ސިފައިން ރާއްޖޭގައި ތިބޭނެތޯ ކުރެއްވި ސުވާލުގެ ޖަވާބުގައި ރައީސް ވިދާޅުވީ ބޭރުގެ ސިފައިން ރާއްޖޭގައި ތިބޭގޮތަކަށް އެއްވެސް ސިޔާސަތެއް މި ސަރުކާރުން ނުގެންގުޅޭނެ ކަމަށެވެ. އަދި ޑްރޯންތައް ދުއްވުމުގައި ބޭރުގެ ސިފައިން ނުތިބޭނެ ކަމަށާއި، އެއްވެސް ގައުމެއްގެ ސިފައިންނެއް އެކަމުގައި އެހީތެރިވުމަށް ނުތިބޭނެ ކަމަށެވެ.
"ތުރުކީއަށް ސިފައިން ގޮސް އެތަނުން ތަމްރީން ހޯދައިގެން އައިސް ދިވެހި ސިފައިން ޔޫއޭވީތަކުގަ އެ އުޅެނީ. އަދި ކުރިޔަށްއޮތްތާ އިތުރު ބެޗްތައް ޓްރެއިނިންގ ހޯދައިގެން އަންނާނެ" ރައީސް ވިދާޅުވިއެވެ.
ނިންމަވައިލައްވަމުން ރައީސް ދެއްވި ޔަގީންކަމަކީ ޑްރޯނުތައް އޮޕަރޭޓުކުރުމާއި އުދުހުމުގައި ކުރަންޖެހޭ ހުރިހާ ކަމެއް ކުރާނީ ދިވެހި ސިފައިން ކަމުގެ ޔަގީންކަމެވެ.
