އަލީ ވަހީދުގެ މައްސަލައިގެ ތަހުގީގުތައް ނިމި ދައުވާކުރަން ފޮނުވަނީ
މިސަރުކާރުގެ ފުރަތަމަ ޓޫރިޒަމް މިނިސްޓަރު އަލީ ވަހީދު ގެ މައްޗަށް ކޮށްފައިވާ ތުހުމަތުތަކުގެ ތަހުގީގު ނިމެމުންދާ ކަމަށާއި ދައުވާކުރަން ވަރަށް އަވަހަށް ފޮނުވާނެ ކަމަށް ފުލުހުން ވިދާޅުވެއްޖެއެވެ.
އަލީ ވަހީދުގެ މައްޗަށް ކޮށްފައިވަނީ، ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާ ކުރިކަމުގެ ތުހުމަތުތަކެކެވެ.
"ޕީއެސްއެމް" ގެ ޕްރޮގްރާމެއްގައި ވާހަކަފުޅު ދައްކަވަމުން ކޮމިޝަނަރ އޮފް ޕޮލިސް މުޙައްމަދު ހަމީދު ރޭގައި ވިދާޅުވީ އަލީ ވަހީދަށް ކޮށްފައިވާ ތުހުމަތުތަކުގެ މައްސަލައިގައި އަދި އެއްވެސް މީހަކު ހައްޔަރު ކޮށްފައިނުވާ ކަމަށެވެ. ނަމަވެސް އެމައްސަލައިގެ ތަހުގީގު މިހާރު ނިމުމަކާއި ގާތްވެފައިވާ ކަމަށާއި ދައުވާ ކުރަން ފޮނުވުމުގެ ކުރިން ޕީޖީ އޮފީހާއެކު މަޝްވަރާ ކުރައްވަމުންދާ ކަމަށް ވެސް ސީޕީ ހަމީދު ވިދާޅުވިއެވެ.
"އެމައްސަލާގައި އެއްވެސް ފަރާތެއް ހައްޔަރުކޮށްފައި ނުވާތީވެ އަޅުގަނޑުމެންނަށް ވަކި ބައިންޑިންގ ޓައިމް ފްރޭމެއް ތައިމް ޕީރިއަޑެއް ނުއެއް އޮންނާނެ. އެހެންނަމަވެސް ތަޙްޤީޤް ވަރަށް ބޮޑަށް ކުރެވި ޕްރޮސެކިއުޓަރ ޖެނެރަލް އޮފީހުގެ ޑިއުޓީ ޕްރޮސެކިއުޝަންއާއެކު މަޝްވަރާތަކެއް ކުރެވެމުންދާކަމުގެ ވާހަކަތަކެއް އަޅުގަނޑަށް އެނގިފައޮތީ. އޭގެމާނައަކީ ޕްރޮސެކިއުޝަންއަށް ވެއްދުމަށް ވަރަށް ގާތްވެފައިއޮތީ މިހާރު." އެޕްރޮގްރާމުގައި ކޮމިޝަނަރ އޮފް ޕޮލިސް ވިދާޅުވިއެވެ.
އަލީ ވަހީދަށް ކޮށްފައިވާ ތުހުމަތުތަކުގެ ތަހުގީގުގެ ތެރެއިން އޭނާގެ ގެ ފުލުހުން ބަލައި ފާސް ކޮށްފައިވާއިރު، މި މައްސަލައާއި ގުޅިގެން މިހާތަނަށް 15 މީހެއްގެ ބަޔާން ނަގާފައިވާ ކަމަށް ވެސް ފުލުހުން ވިދާޅުވެފައި ވެއެވެ.
Ads by STO
