ފަތުރުވެރިންނަށް އެންމެ ރައްކާތެރި މަންޒިލަކީ ދިވެހިރާއްޖެ : ރައީސް
ރާއްޖޭގެ ރަށްތަކަށް އާބާދީ ބެހިފައިވާ ގޮތަށާއި، ފަތުރުވެރިކަމުގެ ސިނާއަތު ތަރައްގީކުރެވިފައި އޮތް ގޮތަށް ބަލާއިރު، ޗުއްޓީ ހޭދަކުރާ މީހުންނަށް، އެންމެ އަމާން އެންމެ ރައްކާތެރި އެއް މަންޒިލަކީ ދިވެހިރާއްޖެ ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
"ކޮވިޑް ހުއްޓުވާނީ އަހަރެން" ގެ ނަމުގައި ދިވެހި މީޑިއާތަކުން އިސްނަގައިގެން ރޭ ފެށި ކެމްޕެއިން އިފްތިތާޙް ކޮށްދެއްވާ ވާހަކަފުޅު ދައްކަވަމުން ރައީސް ވިދާޅުވީ ކޮވިޑް-19އާ ގުޅޭގޮތުން ރާއްޖޭގެ ހަޤީޤީ މަންޒަރު އަދިވެސް ގިނަ ބަޔަކަށް ނޭނގޭކަމަށާ، ރާއްޖޭގެ ޙާލަތު އަދިވެސް ރަނގަޅަށް ބުނެ ނުދެވޭކަމަށެވެ.
"ފަތުރުވެރިން ޗުއްޓީ ހޭދަކުރާ ރިސޯޓްތަކާއި މީހުން ދިރިއުޅޭ ރަށްތައް މިއޮންނަނީ މުޅިން ވަކިން. މި މެސެޖް އަދިވެސް ބޭރު ދުނިޔެއަށް ރަނގަޅަކަށް ނުދެވޭ. މިއީ ރާއްޖެ އަންނަން ބޭނުންވެފައި ތިބި ފަތުރުވެރިންނަށް ވަރަށް ރަނގަޅަށް ސާފުކޮށް ދޭންޖެހޭ ކަމެއް. ވަކިން ޚާއްޞަކޮށް އޮކްޓޫބަރު 15 ވަނަ ދުވަހު، ގެސްޓް ހައުސްތައް ހުޅުވައިލުމަށް ތައްޔާރުވަމުން އަންނައިރު، ބޭރު ދުނިޔެއަށް މި މެސެޖް ވަރަށް ރަނގަޅަށް ފޯރު ކޮށްދޭން އެބަޖެހޭ." ރައީސް ވިދާޅުވިއެވެ.
ރައީސް ގެ ވާހަކަފުޅުގައި ވަނީ ރާއްޖެއިން މިބަލީގައި މިހާތަނަށް 29 މީހަކު ނިޔާވެފައިވާކަން ފާހަގަކުރައްވައި އޭގެތެރެއިން ގިނަ މީހުންނަކީ ޢުމުރުން ދުވަސްވީ އިސްރަށްވެހިން ކަމަށާއި، މިއީ އެމީހުންގެ އާއިލާތަކަށާއި، މުޅި ޤައުމަށް ވެސް ލިބިގެންދިޔަ ވަރަށް ބޮޑު ހިތާމައެއްގެ ގޮތުގައި ސިފަކުރައްވާފައެވެ.
އަދި ރާއްޖޭގައި ބަލިޖެހޭ މީހުންގެ ޢަދަދު މަދު ނުކުރެވިއްޖެނަމަ ރާއްޖޭގެ ސިއްޙީ ނިޒާމަށް އޮބި ނޯންނަ ޙާލަތަށް ކަންކަން ހިނގައިދާނެ ކަމަށާއި ފަރުވާ ކުރެވޭނެ ވަޞީލަތްތަކާއި، އާލާތްތައް ހޮސްޕިޓަލުތަކުގައި ހުއްޓަސް ފަރުވާ ދޭންތިބި ޑޮކްޓަރުންނާއި ނަރުހުންނަށް ނުކަތާވަރަށް ބަލި މީހުން އިތުރުވެއްޖެނަމަ ގިނަ ބައެއްގެ ފުރާނަ ގެއްލުމުގެ ބިރު އޮތްކަމުގެ ކަންބޮޑުވުން ރައީސް ފާޅުކުރެއްވިއެވެ.
ރާއްޖޭގެ އޮންލައިން ނޫސްތަކާއި ޓީވީ، އަދި ރޭޑިއޯގެ އިތުރުން ނިއު މީޑިއާ ގުޅިގެން ކޮވިޑާ ގުޅޭ ގޮތުން ހޭލުންތެރިކަން އިތުރުކުރުމުގެ ގޮތުން ފެށުނު މިޚާއްސަ ކެމްޕެއިނަކީ ރާއްޖޭގެ ކޮވިޑްގެ ހާލަތަށް އެދެވޭ ހެޔޮ ބަދަލެއް ގެނައުމަށް މީޑިއާތައް ގުޅިގެން ކުރެވިދާނެ ކަންތައްތަކެއް ފާހަގަ ކޮށް އެ މަގަށް މަސައްކަތް ކުރުމަށް ހިންގޭ ހަރަކާތެކެވެ. އެގޮތުން ކޮވިޑާ ގުޅޭ ހަބަރާ މައުލޫމާތު، މީޑިއާތަކުން މިހާރު ގެނެސްދޭ މިންވަރަށް ވުރެ ފުޅާކޮށް، ހުރިހާ މީޑިއާއެއްގައި އެއް ބާވަތެއްގެ މެސެޖުތަކެއް ދެވޭނެ ގޮތަކަށް މަސައްކަތް ކުރުމަކީ މި ހާއްސަ ކެމްޕޭނުގެ އަމާޒެކެވެ.
ކޮވިޑާ ގުޅޭ މިހާއްސަ މަސައްކަތް ކުރިއަށް ގެންދާނެ ގޮތްތަކާއި އިސްކަންދޭނެ ހަބަރާއި މައުލޫމާތާ ގުޅޭ ގޮތުން ހެލްތު އިމަޖެންސީ އޮޕަރޭޝަން ސެންޓަރުގެ އިސް ބޭފުޅުންނާއެކު މީޑިއާތަކުން ވަނީ މީގެ ކުރިން ބައްދަލުކޮށް، މަޝްވަރާ ކޮށްފައެވެ. އަދި މި މަޝްވަރާތަކުގެ އަލީގައި މި ހާއްސަ ކެމްޕޭނު ކުރިއަށް ގެންދާނެ ގޮތް ރާވާ އިންތިޒާމުކޮށް ހެދުމުގައި އެކިއެކި މީޑިއާތައް ހިމެނޭ ގޮތުން ސްޓިއަރިން ކޮމެޓީއެއް ވަނީ އެކުލަވާލެވިފައެވެ.
