ކުންފުނިތަކުގެ ދަރަނި ދައްކަން ބޭންކުތަކާ މަޝްވަރާކުރަނީ
ބޭންކުތަކާ ވާހަކަ ދައްކައިގެން ސަރުކާރު ކުންފުނިތަކުގެ ދަރަނިތައް ދެއްކުމުގެ މަސައްކަތް ކުރަމުންދާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
އާންމުންގެ ސުވާލުތަކަށް ޖަވާބުދެއްވުމަށް ކުރިއަށްގެންދާ "ރައީސްގެ ޖަވާބު" ޕްރޮގްރާމުގައި އާންމުންގެ މީހަކު ވަނީ މި ސަރުކާރުން ވެރިކަން ހިންގުމާ ހަވާލުވިއިރު ސަރުކާރު ކުންފުނިތަކުގައި ހުރި ބޮޑެތި ދަރަނިތައް އަދާކުރުމަށް ރާވާފައިވާ ޕްލޭނާ މެދު ސުވާލުކޮށްފައެވެ.
އެ ސުވާލުގެ ޖަވާބުގައި ރައީސް ވިދާޅުވީ މިދިޔަ ސަރުކާރު ނިމުނުއިރު، ސަރުކާރު ކުންފުނިތައް ހުރީ ނަހަމަ ގޮތުގައި ބޭނުންކޮށްފައި ކަމަށެވެ. އަދި މަސައްކަތްކޮށްފައި ވަނީ ކުންފުނިތަކުގެ އުސޫލާއި ހިލާފަށް ކަމަށާއި ބައެއް ކުންފުނިތަކުން ސިޔާސީ ބޭނުމަށް ހިދުމަތްތައް ހޯދައި، ހިދުމަތްދީފައި ކަމަށް ވިދާޅުވިއެވެ.
" ދައުރު ނިމުނު އިރުގަ.. ކުންފުނިތަކުގެ އޮންނަ އުސޫލާ ހިލާފަށް، ކުންފުނިތަކުގެ ބޭނުން ސިޔާސީ ގޮތުން ކުރުމުގެ ސަބަބުން ކުންފުނިތައް އޮތީ ހަލާކުގެ ތެރޭގައި. ވަރަށް ގިނަ ކުންފުނިތައް ބަނގުރޫޓުވުމާ ހަމައަށް ގޮސްފަ އޮތީ. ބޮޑެތި ދެތިން ކުންފުނި ފިޔަވައި، ފައިދާވާ އެއްވެސް ކުންފުންޏެއް ނެތި އޮތީ" ރައީސް ވިދާޅުވިއެވެ.
އެހެންކަމުން މިހާރު ކުރަމުންދާ މަސައްކަތަކީ ބޭންކުތަކާ ވާހަކަ ދައްކައިގެން ލޯނުތަކަށް ރަނގަޅު ބަދަލެއް ގެނައުމުގެ މަަސައްކަތް ކަމަށް ރައީސް މުއިއްޒު ވިދާޅުވިއެވެ.
ރައީސް ވިދާޅުވީ މި ސަރުކާރު ވެރިކަމާއި ހަވާލުވިއިރު ރާއްޖޭގެ އިގްތިސާދު އޮތީ ވަރަށް ހާލުގައި ކަމަށެވެ. އެކި ފަރާތްތަކަށް ކުންފުނިތަކުން ދޭން ޖެހޭ ފައިސާ ދެއްކުމުގެ ކަންތައްތައް ރޭވިގެން ކުރިއަށްދާ ކަމަށް ވިދާޅުވިއެވެ. ސީދާ އެއީ ކޮންބޭންކުތަކެއް ކަމެއް ރައީސް ވިދާޅެއް ނުވެއެވެ.
މިނިސްޓްރީތަކާއި ސަރުކާރު ކުންފުނިތަކުން އަމިއްލަ ފަރާތްތަކަށް ދައްކަން ޖެހޭ ނުވަ ބިލިއަން ރުފިޔާ އެބަ އޮތް ކަމަށް އެކި ޕޯޑިއަމްތަކުގައި ރައީސް ވަނީ ވިދާޅުވެފައެވެ.
