ޔާމީން ވަށައިގެން މިހާރު ތިބީ އަގެއް ނެތް މީހުން އެކަނި: އަބްދުއްރަހީމް
ކުރީގެ ރައީސް އަބްދުﷲ ޔާމީން އަރިހުގައި ތިއްބެވި ސިޔާސީ ބޭފުޅުންނަކީ ރައްޔިތުންގެ ކުރިމަތީގައި އަގުވެއްޓި، މިހާރު އެއްވެސް ބަޔަކު ބަލައިނުގަންނަ މީހުން ކަމަށް ވިދާޅުވެ ޕީއެންސީގެ ޗެއާޕާސަން އަބްދުއްރަހީމް އަބްދުﷲ މިއަދު ވަރަށް ބޮޑަށް ފާޑު ވިދާޅުވެއްޖެއެވެ.
ރިޔާސީ އިންތިހާބު ތެރޭގައި ލީޑާޝިޕްގެ ތެރޭގައި އުފެދުނު ހިޔާލު ތަފާތުވުންތަކާއެކު ޔާމީން ވަނީ ޕީޕިއެމްއާ ފެޔަށް ޖެހިވަޑައިގެންފައެވެ. މަސައްކަތް ކުރައްވަމުން ގެންދަވަނީ އާ ޕާޓީއެއް ވުޖޫދަށް ގެނައުމަށެވެ.
މި މަހުގެ 21 ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިހާބަށް ސަރުކާރު ހިންގާ ޕީއެންސީ/ޕީީީީޕީއެމް އިން ކުރަމުންދާ މަސައްކަތާއި އަދި ސިޔާސީ މަޝްރަހުގައި ހިނގާފައިވާ ކަންތައްތަކާއި ގުޅޭ ގޮތުން ހާއްސަ ޕެނަލް ޑިސްކަޝަނެއް މިއަދު ވަނީ ބާއްވާފައެވެ.
އެ ޕެނަލްގައި އަބްދުއްރަހީމް، ފިޝަރީޒް މިނިސްޓަރު އަހުމަދު ޝިޔާމް، ލޯކަލް ގަވަމަންޓު މިނިސްޓަރު އާދަމް ޝަރީފު، އެޗްޑީސީގެ އެމްޑީ އިބްރާހިމް ފަޒުލް ރަޝީދު އަދި މާލެ ސިޓީ ކައުންސިލަރު އިބްރާހިމް ޝުޖާއުގެ އިތުރުން އޭދަފުށީ ދާއިރާގެ މެންބަރު އަހުމަދު ސަލީމް ބައިވެރިވެވަޑައިގެންނެވިއެވެ. ޕެނަލް މޮޑަރޭޓް ކުރެއްވީ ޕީއެންސީގެ ތަރުޖަމާނު އަދި އެންސްޕާގެ ސީއީއޯ ހީނާ ވަލީދުއެވެ.
އެ ޕެނަލް ޑިސްކަޝަން ގައި އަބްދުއްރަހީމްގެ ވާހަކަ މައިގަނޑު ގޮތެއްގައި ބިނާކުރެއްވީ ގޭ ބަންދުގައި ހުންނެވި ކުރީގެ ރައީސް އަބްދުﷲ ޔާމީންގެ އެންމެ އަރިހުގައި މިހާރު ތިބި ބޭފުޅުންނަށެވެ. ވިދާޅުވީ ޔާމީނަށް އަދިވެސް ''މީހުން ދަސްނުވާ'' ކަމަށެވެ. މިސާލެއްގެ ގޮތުގައި ނެންގެވީ ކުރީގެ ކޮމިޝަނާ އޮފް ޕޮލިސް ހުސެއިން ވަހީދާ، ކުރީގެ ކޮމިއުނިކޭޝަން މިނިސްޓަރު މަލީހު ޖަމާލް އަދި ކުރީގެ ނައިބް ރައީސް ޑރ މުހައްމަދު ޖަމީލެވެ. އެއީ މިހާރު ޔާމީންގެ އެންމެ އަރިސް ބޭފުޅުންނެވެ.
ޔާމީންގެ ސަރުކާރުގައި ޕޮލިސް ކޮމިޝަނަރު ކަމުން ހުސައިން ވަހީދު ވަކިވެވަޑައިގަތީ ރިޔާސީ ލޯންޗުކޮޅުގައި އެއްޗެއް ގޮއްވާލި ހާދިސާ އަށް ފަހު 2015 ގައެވެ. އޭގެ ފަހުން އެ ސަރުކާރުގައި ހައުސިން މިނިސްޓްރީގެ ސްޓޭޓްކަމުގެ މަގާމު އަދާކުރެއްވި ހުސެއިނަށް އިޝާރާތް ކުރައްވާ އަބްދުއްރަހީމް ވިދާޅުވީ ޔާމީން މިނިވަންކުރަން ގޮވާލާ މިދިޔަ ފަސް އަހަރު އޭރު އިދިކޮޅުގައި އޮތް ޕީޕީއެމުން ސިިލްސިލާކޮށް ބޭއްވި މުޒާހަރާތަކުގެ ތެރެއިން އެއްވެސް މުޒާހަރާއެއްގައި ހުސެއިން ބައިވެރިވެވަޑައިނުގަންނަވާ ކަމަށެވެ. އަދި މާލޭ މޭޔަރު ކަމަށް މުއިއްޒު ނިކުމެވަޑައިގަންނަވަން ނިންމެވި ހިސާބުން އެކަމާއި ދެކޮޅަށް އެންމެ ބޮޑަށް ވާހަކަ ދެއްކެވި އެއް ބޭފުޅަކީ ހުސެއިން ވަހީދު ކަމަށް ވިދާޅުވިއެވެ.
''ކަނޑައެޅިގެން އެކަމާއި ދެކޮޅަށް މަސައްކަތްކުރެއްވި ބޭފުޅެއް ހުސެއިން ވަހީދަކީ، ވިދާޅުވީ ގޯނިބޭ ކުޑަ އަލީއަށް ވޯޓު ދިނަސް މުއިއްޒަކަށް ނުދޭނަމޭ، ނުދެޔޭ، ވޯޓު ދޭންވެސް ނުދަނީ'' ރައީސްގެ ހާއްސަ އެޑްވައިޒަރުގެ މަގާމުވެސް ފުރުއްވަމުން ގެންދަވާ އަބްދުއްރަހީމް ވިދާޅުވިއެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ކޮމިއުނިކޭޝަން މިނިސްޓަރުކަމުގެ މަގާމު އަދާކުރެއްވި އަދި މިހާރު ޕީޕަލް ނެޝަނަލް ފްރޮންޓް (ޕީއެންއެފް) އުފެއްދުމުގައި އިސްކޮށް ހަރަކާތްތެރިވާ މަލީހުއަށް ފާޑުކިޔަމުން އަބްދުއްރަހީމް ވިދާޅުވީ ޔާމީންގެ ހައްގުގައި ވަކާލާތުކުރަން އެންމެ މުޒާހަރާއެއްގައި މަލީހުވެސް ބައިވެރިވެވަޑައި ނުގަންނަވާ ކަމަށެވެ.
''އަޅުގަނޑުމެން މާލޭގައި އެންމެން އެއްތަނަކަށް އެއްވާ ދުވަހެއްވެއްޖެއްޔާ ފޮޓޯ ނަގަނީ މި ނޫންތޯ ކަންތައް ކުރި ގޮތަކީ، އެހެންވީމަ އިހުލާސްތެރިކަމުގެ ވާހަކަ ނުދައްކާ'' އަބްދުއްރަހީމް ވިދާޅުވިއެވެ.
ސިޔާސީ ލީޑަރުން ޖަލަށް ގެންދިޔުމުން މިނިވަންކުރަން ގޮވާލާ އެ ބޭފުޅުންގެ އަނބިކަނބަލުން ނިކުމެ ވަޑައިގަންނަވާ ކަމަށާއި ނަމަވެސް ޔާމީންގެ ހައްގުގައި، އެއްވުންތަކުގައި އަނބިކަނބަލުން ފާތިމަތު އިބްރާހިމް ބައިވެރިވެވަޑައިނުގަންނަވީ ކީއްވެގެންތޯ ކަމަށް ވިދާޅުވެ އަބްދުއްރަހީމް ސުވާލު އުފެއްދެވިއެވެ. އަދި ޔާމީންގެ ދަރިކަލުން ޒޭން ޔާމީންވެސް މުޒާހަރާއެއްގައި ބައިވެރިވެވަޑައިނުގަންނަވާ ކަމަށް ވިދާޅުވިއެވެ.
ކީއްވެގެންތޯ ރައީސް ޔާމީން އެހާ ގިނަ ދުވަސް ޖަލުގައި އޮންނެވިއިރު މެޑަމް ފާތުމަ އެއްވެސް މުޒާހަރާއަކަށް ވަޑައިނުގެންނެވީ، ޒޭން އެއްވެސް މުޒާހަރާއަކަށް ވަޑައިނުގެންނެވީ، ކޮން ފާޑެއްތޯ އަޅުގަނޑުމެންނަށް ކިޔޭނީ
އަބްދުއްރަހީމް ވިދާޅުވީ ފާއިތުވެދިޔަ ފަސް އަހަރަކީ ޔާމީން، ޖަލުގައި އޮންނަން ޖެހިވަޑައިގެންނެވުމުން ވަރަށް ހިތްދަތި ދުވަސްތަކެއް ތަހައްމަލު ކުރި އަހަރުތަކެއް ކަމަށެވެ. ޔާމީންގެ ހައްގުގައި އެތައް ގުރުބާނީތަކެއް ވެވަޑައިގެންނެވި ކަމަށްވެސް ވިދާޅުވިއެވެ. އެކަމަކު މިއަދު އޭގެ ބަދަލުގައި ޔާމީން ގެންދަވަނީ އޭރު އެމަނިކުފާނަށް އެންމެ އިހުލާސްތެރި ބޭފުޅުން ބަދުނާމުކުރަމުން ކަމަށް ތުހުމަތު ކުރެއްވިއެވެ.
މި މަސައްކަތް ކުރީމަ އޭގެ އަގަކީ މުޅި ރައްޔިތުން ކުރިމަތީގައި އަޅުގަނޑުމެން ބަދުނާމު ކުރުންތޯ. އެހެންވެގެން އަސަރުކޮށްގެން މިއުޅެނީ، އިހުލާސްތެރި މަސައްކަތްކުރީމަ އޭގެ އަގުވަޒަން ނުކުރީމަ، މީހުން އަދިވެސް ދަސްނުވާތީ، ނޭދެން ޔާމީނަކީ މި ގައުމުގެ މީހުން ކުރިމަތީގައި ޖަމީލާ މަލީހާ ހުސޭން ވަހީދުގެ އަގުވެއްޓިގެން ދިޔަ ގޮތަށް އަގުވެއްޓިގެންދާ ބޭފުޅަކަށް ވާކަށެއް.
އަބްދުއްރަހީމް ވިދާޅުވި ގޮތުގައި އޮޅުވާލުމުގެ ތެރެއިން ޖަމީލު މެދުވެރިވެގެން ރައީސް މުއިއްޒާ މެދުވެސް ކަންތައް ކުރެއްވީ ވަރަށް އިހާނެތިކޮށް ކަމަށެވެ.
ޓިނޭ އަގު އެނގޭނީ އަގެއް ހުރި މީހަކަށް! އަބުރު ގެއްލިފައި ހުރި މީހަކަށް ނޭގޭނޭ!!!
ކޮންކަމެއްވާނީ 4 މަސްވަނީ އެތައް އޮފީހެއް ވަންނާނެ ތަނެއް ނުލިބިފާ. ހިދުމަތް ނުދެވިފަ. ޓިނުބޭ ތިނުންވިޔަސް ހަދާބަލަ