ގެއްލުނު ދޯނި ޑްރޯނުން ހޯދަނީ
މ. މަޑުއްވަރިން 2 މީހުންނާއެކު މަހަށް ނުކުމެ އުޅުނު "ފަރިހި 2" ދޯނި ހޯދުމުގެ މަސައްކަތް ވައިގެ މަގުން ފަށައިފިއެވެ.
އެމްއެންޑީއެފުން ބުނީ މ. ރަތްމަންދޫ ބޭރުން ފަރުމަސް ބާނަން ނުކުތް ޑައިވިން ދޯންޏެއްގެ ހަބަރެއް ނުވެގެން އެމްއެންޑީއެފް ސެންޓްރަލް އޭރިއާ ކޮމާންޑް، ކޯސްޓްގާޑް ތާޑް ސްކޮޑްރަންއިން، އެ ދޯނި ހޯދުމުގެ މަސައްކަތް ފަށައިފައިވާ ކަމަށެވެ.
މަޑުއްވަރީ ކައުންސިލުގެ ނައިބް ރައީސް އިބްރާހިމް ނިޝާން ''ދެން'' އަށް ވިދާޅުވީ އެއީ މަޑުއްވަރީ މީހެއްގެ ދޯންޏެއް ކަމަށްވިޔަސް މަހަށް ދިޔައީ އެހެން ރަށަކުން އައި ދެ ފިރިހެނުން ކަމަށެވެ. އެ މީހުންނާ ގުޅޭ އިތުރު މައުލޫމާތެއް އެނގިފައިނުވާ ކަމަށް ނިޝާން ވިދާޅުވިއެވެ.
އެމްއެންޑީއެފުން ބުނީ މ. މުލީގައި އޮންނަ ކޯސްޓްގާޑް ހާބާކްރާފްޓް 114 މިރޭގެ 23:20 އިން ފެށިގެން ދޯނި ހޯދުމުގެ މަސައްކަތްކުރަމުންދާ ކަމަށެވެ.
''އެމްއެންޑީއެފް ވައި ބާރުން ވަނީ މިހާރު ދޯނި ހޯދުމަށްޓަކައި " ޔޫއޭވީ" އެ ސަރަހައްދަށް އުދުއްސާލައިފައި'' އެމްއެންޑީއެފުން ބުންޏެވެ.
ފުލުހުން ބުނީ, ހަބަރެއްނުވެ ވީނުވީއެއް ނޭނގި ގެއްލިފައިވާކަމުގެ މައުލޫމާތު މިރޭ 22:06 އެހާކަންހާއިރު ލިބިފައިވާ ކަމަށެވެ.
އެ ދޯންޏާއި އެ މީހުންނާ ބެހޭ އެއްވެސް މައުލޫމާތެއް ލިބިފައިވާނަމަ ފުލުހުންގެ އެމަޖެންސީ ނަންބަރު 119 އަށް ނުވަތަ ކޯސްޓްގާޑަށް ގުޅުއްވައި އެ މައުލޫމާތެއް ހިއްސާކުރަން ފުލުހުން އެދެއެވެ.
Ads by STO
