ކަންގްނާ ބޭނުންވަނީ ރަންބީރް ކަޕޫރާއި، ރަންވީރް ސިންގް އަދި ވިކީ މަސްތުވާ ތަކެއްޗަށް ޓެސްޓު ކުރަން
ބޮލީވުޑްގެ ތަރިންނަށް ބަލާއިރު، ކަންގްނާ ރަނާވަތު އަބަދުވެސް ފާހަގަ ކުރެވެނީ އެއްވެސް ޖެހިލުމެއް ނެތި، އަދި ވަކި މީހެއްގެ މޫނަށް ބެލުމެއްނެތި އޭނާ ބުނަން ބޭނުންވާ އެއްޗެއް ބުނެލާ ތަރިއެއްގެ ގޮތުގައެވެ.
އެގޮތުން އޭނާ މީގެ ކުރިން ވަނީ ބޮލީވުޑްގައި ތަފާތު ކުރުން ވަރަށް ގިނަ ކަމަށް ބުނެ، ނަން މަޝްހޫރު ތަރިންނާއި ޕްރޮޑިއުސަރުންްގެ ދަރިންނަށް، ބޮލީވުޑްގައި އަބަދުވެސް އިސްކަން ދެމުން އަންނަކަން ވެސް ފާހަގަ ކޮށްފައެވެ.
ސުޝާންތު ސިންގް ރާޖްޕޫތު މަރުވުމުން އެކަމާއި ގުޅިގެން ވެސް އެމައުޟޫއަށް އަޑު އުފުލުމަށްފަހު، މިހާރު ކަންގްނާ ވަނީ އެހެން ވާހަކައެއް ވެސް ފަށާފައެވެ.
މަސްތުވާ ތަކެތީގެ ވަބާގައި ސުޝާންތު ޖެހުނުކަމަށް ބުނެ ފެށުނު ވާހަކައިގެ ތެރެއިން ބައެއް މީހުން ވަނީ، ބޮލީވުޑްގެ އެކްޓަރުންް މަސްތުވާ ތަކެތި ބޭނުން ކުރޭތޯ ޓެސްޓު ކުރުމަށް ގޮވާލާފައެވެ.އެއްވެސް މީހަކު ފާޅުގައި އެހެން އެއްވެސް މީހެއްގެ ނަން ގަނެފައި ނުވާއިރު، ކަންގްނާ މިވަނީ އެގޮތުން ހަތަރު މީހެއްގެ ނަން ފާހަގަ ކޮށްފައެވެ.
ކަންގްނާ ބުނެފައިވަނީ ބޮލީވުޑްގެ ތިން އެކްޓަރެއް ކަަމަށްވާ އާޔަންް މުކަރްޖީ، ވިކީ ކޯޝަލް، ރަންބީރް ކަޕޫރު އަދި ރަންވީރް ސިންގް މަސްތުވާ ތަކެއްޗަށް ޓެސްޓު ކުރުމަށް ގޮވާލާފައެވެ.މީގެ އިތުރުން ކަންގްނާ ބުނެފައިވަނީ ބޮލީވުޑްގެ އެކްޓަރުންގެ ތެރެއިން 99% މީހުންނަކީ އެވަބާގައި ޖެހިފައިތިބި މީހުން ކަމަށެވެ.
"ހުރިހާ ކަމެއް ވެސް އެންމެ ފުރަތަމަ ފެށެނީ ބުއިމަކުން. ބޮޑެތި މީހުންނާއި އެމީހުންގެ ދަރިންް ޕާޓީތަކަށް ގޮސް އެއްޗެހި ބޮއެ، ދެން ފެންނަނީ މަސްތުވާތަކެތީގެ ކޮންމެވެސް އެއްޗެއް ބޭނުންކުރާތަން. އަހަރެން އޭގެން އެކަކާއެކު ލޯބީގެ ގޮތުން ގުޅިގެން ވެސްް އުޅުނިން. މިމީހުންގެ ޓެސްޓު ހަދަން ޖެހޭ. އަހަރެން ސަރުކާރަށް ގޮވާލަން އާޔަން މުކަރްޖީ އާއި، ވިކީ ކޯޝަލް، ރަންބީރް ކަޕޫރު އަދި ރަންވީރް ސިންގް މަސްތުވާ ތަކެއްޗަށް ޓެސްޓު ކުރަންް" ކަންގްނާ ބުނެފައިވެއެވެ.
ކަންގްނާގެ މިތުހުމަތުތަކާއި ގުޅިގެން ތުހުމަތު ކުރެވުނު އެއްވެސް މީހަކު އެއްވެސް ފިޔަވަޅެއް އަޅާފައެއް ނުވެއެވެ.
