ސަރުކާރު ސްކޫލުތަކުގެ ކްލާސް ރޫމްތައް އޭސީކުރަނީ

ސަރުކާރުން ހިންގަމުންދާ ސްކޫލްތަކުގެ ހުރިހާ ކްލާސްރޫމުތަކެއް އޭސީ ކުރުމުގެ މަސައްކަތް ފަށާނެ ކަމަށާއި، އެ މަސައްކަތް ދެ އަހަރު ތެރޭގައި ނިންމާލެވޭނެ ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު މިއަދު ވިދާޅުވެއްޖެއެވެ.

Ads by STELCO

މިނިސްޓަރު އެހެން ވިދާޅުވީ، މި ފެށޭ ދިރާސީ އަހަރާއެކު ތައުލީމީ ނިޒާމަށް ހެޔޮ ބަދަލުތަކެއް ގެނައުމަށް ނިންމާ، އެ މައުލޫމާތު ހިއްސާކުރުމަށް ފޭސްބުކްގައި ކުރެއްވި ޕޯސްޓެއްގައެވެ. އެ ޕޯސްޓުގައި ޝަފީއު ވިދާޅުވީ، ސަރުކާރުން ހިންގަމުންދާ ހުރިހާ ސްކޫލްތަކެއް އޭސީ ކުރުމުގެ މަސައްކަތް މި މަހުގެ ފަހު ހަފްތާގައި ފެށިގެންދާނެ ކަމަށެވެ. އަދި އެ މަސައްކަތް ކުރުމަށް ނިންމާފައިވަނީ ކޮމިއުނިޓީ އެހީތެރިކަމާއެކުކަން ވެސް މިނިސްޓަރ ފާހަގަކުރެއްވިއެވެ.

"ސަރުކާރުގެ ހުރިހާ ސްކޫލެއް އޭސީ ކުރުމުގެ ޕްރޮޖެކްޓް ފެށުން. އިރާދަކުރެއްވިއްޔާ، 2 އަހަރު ތެރޭގައި ކޮމިއުނިޓީގެ އެހީތެރިކަމާއެކު ސަރުކާރުގެ ހުރިހާ ސްކޫލެއް އޭސީ ކޮށް ނިންމާނަން. ރައީސްގެ ލަފާފުޅާއެކު ފެށުމަށް ހަމަޖެހިފައިވާ މި ޕްރޮޖެކްޓުގެ އަމަލީ މަސައްކަތް މި މޭ މަހުގެ ފަހު ހަފްތާގައި އިފްތިތާހު ކުރާނަން،" މިނިސްޓަރ ވިދާޅުވިއެވެ.

ކްލާސްރޫމުތައް ހޫނު ގަދަވުމުގެ ސަބަބުން ކިޔަވާ ކުދިންނަށް ދަތިވުމުގެ ކަންބޮޑުވުންތަކުގެ ވާހަކަ އަބަދުވެސް ދެކެވެއެވެ. ކްލާސްރޫމުތައް ހޫނުގަދަ ވުމުގެ ޝަކުވާ ދަރިވަރުން ވެސް ކުރެއެވެ. ނަމަވެސް އޭސީ ކުރުމަކީ ބޮޑު ހަރަދެއް ހިނގާނެ ކަމެއް ކަމުން މިހާތަނަށް ވެސް އެ ކަން ނުކޮށް އޮތީ ދޫކޮށްލައިފައެވެ.

އެ ޕޯސްޓުގައި މިނިސްޓަރު ވިދާޅުވީ، މި ފެށޭ ދިރާސީ އަހަރާއެކު މުދައްރިސުން ތަމްރީނު ކުރުމުގެ ގައުމީ ޕްރޮގްރާމް ވެސް ފެށިގެން ދާނެ ކަމަށެވެ. މި ޕްރޮގްރާމާއެކު މުދައްރިސުންނަކީ ގަދަރުވެރި ބައެއްކަމުގައި ހެދުމުގެ އަމަލީ މަސައްކަތް ފެށޭނެ ކަމަށެވެ.

މީގެއިތުރުން މިނިސްޓަރު ވަނީ މުދައްރިސުންގެ އެންމެ ބޮޑު އެއް ޝަކުވާ ކަމަށްވާ، ރަސްމީ މަސައްކަތު ވަގުތުގެ ބޭރުން ސްކޫލުގައި މާ ގިނަ ވަގުތު ހޭދަކުރަންޖެހުމުގެ މައްސަލައަށް އަލިއަޅުވާލައްފާއެވެ. ޝަފީއު ވިދާޅުވީ މި މައްސަލަ ހައްލުކޮށްދެއްވުމަށް، ސްކޫލްތަކުގައި މުދައްރިސުން ހޭދަކުރާ ވަގުތު މަދުކުރުމަށް އެކަށީގެންވާ ފިޔަވަޅުތަކެއް ވެސް އެޅިގެންދާނެ ކަމަށެވެ.