ދެގައުމުގެ ގުޅުން އަނެއްކާވެސް އެބަ ރަނގަޅުވޭ: ޖައިޝަންކަރު
އިންޑިއާ އާއި ރާއްޖެއާއި ދެމެދު އޮތް ސިޔާސީ ހަލަބޮލިކަން މިހާރު ރަނގަޅުވަމުންދާ ކަމަށް އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިޔަމް ޖައިޝަންކަރު ވިދާޅުވެއްޖެއެވެ.
އިންޑިއާގެ މިއަހަރުގެ ބިޒްނަސް ސަމިޓުގައި ވާހަކަ ދައްކަވަމުން ޖައިޝަންކަރު ވިދާޅުވީ، ރާއްޖެއާ އިންޑިއާއާއި ދެމެދު ސިޔާސީ ގޮތުން ހަލަބޮލިކަމެއް ކުރިމަތިވި ނަމަވެސް، ޖައިޝަންކަރުގެ ބައިވެރިވުން ހިމެނުންފަހުން، މިހާރު ކަންތައްތައް ހަމައަކަށް އެޅެމުންދާ ކަމަށެވެ. އަދި އުންމީދުކުރަނީ ވެސް ހަލަބޮލިކަން ނެތި، މެނޭޖް ކުރުން ކަމަށް ވެސް ވިދާޅުވިއެވެ.
"ރާއްޖޭގެ ތަރައްގީގެ މަޝްރޫއުތައް ދަނީ ރަނގަޅަށް. ސިޔާސީ ހަލަބޮލިކަން ކުރިމަތިވި ނަމަވެސް، އުންމީދުކުރަނީ މެނޭޖް ކުރެވޭނެ ކަމަށް،" ޖައިޝަންކަރު ވިދާޅުވިއެވެ.
މީގެއިތުރުން، ރާއްޖޭގެ ތަރައްގީގެ މަޝްރޫއުތައް ވެސް ހިނގަމުންދަނީ ރަނގަޅަށް ކަމަށް އޭނާ ވިދާޅުވިއެވެ.
މިދިޔަ އަންގާރަ ދުވަހުވެސް ޖައިޝަންކަރު ވަނީ ރާއްޖެއާއި އޮންނަ އަވައްޓެރިކަމުގެ ގުޅުން ދުވަހަކުވެސް ނުކެނޑޭނެ ކަމަށް ވިދާޅުވެފައެވެ.
ރާއްޖޭގެ ހާލަތަށް ބަލާނަމަ އެކި ސަރުކާރު ތަކުގައި ބޭރުގެ ގައުމުތަކާއި ގުޅުން ބޭއްވުމުގައި ގެންގުޅޭ ސިޔާސަތުތައް ބަދަލުވާ ކަމަށާއި ބައެއް ފަހަރު އިންޑިއާ ސަރުކާރަށް އުނދަގޫ ހާލަތްތައްވެސް ރާއްޖޭގެ ސަރުކާރުތަކުން ކުރިމަތިވެފައި ހުރިކަމަށް ޖައިޝަންކަރު ވިދާޅުވިއެވެ. އެހެންނަމަވެސް އެ އުނދަގޫތަކާއި އެކުވެސް އެކުވެރިކަމާއި އަވައްޓެރިކަމުގެ ގުޅުން އަބަދުވެސް ދެމި އޮންނާނެ ކަމަށް އޭނާ ވަނީ ވިދާޅުވެފައެވެ.
ރައީސް ޑރ. މުހައްމަދު މުއިއްޒުގެ ސަރުކާރުން، ރާއްޖޭގައި ތިބި އިންޑިއާ ސިފައިން ބޭލުމުން އިންޑިއާއާއިއެކު އޮތް ގުޅުން ހީނަރުވެފައިވާކަމަށް ބައެއް ފަރާތްތަކުން ވާހަކަ ދައްކައެވެ. އެހެންނަމަވެސް ދާދި ފަހުން ރާއްޖޭގެ ފޮރިން މިނިސްޓަރު އިންޑިއާއަށް ކުރެއްވި ރަސްމީ ދަތުރުފުޅަށްފަހު އެގައުމާއެކު އޮތް ގާތް ގުޅުން އިތުރަށް ބަދަހިކުރަން މަސައްކަތް ކުރާނެކަމަށް ދިވެހި ސަރުކާރުންވެސް ވަނީ ބުނެފައެވެ.
