މާލޭގައި މީހަކު ރަހީނުކުރި މައްސަލައެއްގައި ދެ މީހަކު ހައްޔަރުކޮށްފި
މާލޭގައި މީހަކު ރަހީނުކޮށްގެން ގެންގުޅުނު މައްސަލައެއްގައި ދެ މީހަކު ހައްޔަރުކޮށްފިއެވެ.
މި މައްސަލާގައި ހައްޔަރުކޮށްފައިވަނީ 40 އަހަރުގެ ދިވެހި ފިރިހެނަކާއި 39 އަހަރުގެ ދިވެހި އަންހެނެކެވެ. މި ދެ މީހުން ވެސް ނިސްބަތްވަނީ ފ. ނިލަންދޫއަށެވެ.
މި ދެ މީހުންގެ މައްޗަށް ވެސް ކުރަނީ ރަހީނުކުރުމާއި ބްލެކްމެއިލްކުރުމާއި ފޭރުމުގެ ކުށުގެ ތުހުމަތު ކުރެއެވެ.
މި ދެ މީހުންގެ ބަންދާ މެދު ގޮތެއް ނިންމުމަށް މިއަދު ކްރިމިނަލް ކޯޓަށް ހާޒިރުކުރުމުން އަންހެން މީހާގެ ބަންދަށް 10 ދުވަސް އަދި ފިރިހެން މީހާގެ ބަންދަށް 15 ދުވަސް ކޯޓުން ވަނީ ޖަހައިފަ އެވެ.
އެ ދެ މީހުންގެ ބަންދު އަމުރުން އެނގޭ ގޮތުގައި އެ ދެ މީހުން ވެސް ހައްޔަރުކޮށްފައިވަނީ މީހާ ރަހީނުކޮށްގެން ގެންގުޅުނު ހ. ހޯގުޅާ މަންޒިލް އިންނެވެ.
އެ ގެއިން ލަކުޑި ބުރިތަކާއި ދަނޑިބުރިތަކެއް ފެނިފައިވާ ކަމަށް ވެސް ފުލުހުން ކޯޓުގައި ބުނެފައިވެ އެވެ.
މި ދެ މީހުން ބަންދުން ދޫކޮށްލައިފިނަމަ, މައްސަލައިގެ ހެކިތަކަށް ނުފޫޒު ފޯރުވުމުގެ ބިރު އޮތް ކޯޓު އަމުރުގައި ބުނެފައިވެއެވެ.
މި ފަހުން އަންހެނުން ފިރިހެނުން ހައްލާލައިގެން ގެގެއަށް ގެންގޮސް ރަހީނުކޮށް ފޭރޭ މައްސަލަތައް ވަނީ އިތުރުވެފަ އެވެ.
