އުސޫލުތައް ހަރުކަށި ކުރަން ޖެހެނީ ގިނަ ފަރާތްތަކުން ގަވައިދާ ހިލާފުވާތީ: ވިސާމް
އިކޮނޮމިކް މިނިސްޓްރީގެ އުސޫލުތައް ހަރުކަށި ކުރަން ޖެހެނީ ގިނަ ފަރާތްތަކުން ހެދިފައި ހުންނަ ގަވައިދުތަކަށް ބޯނުލަނބާތީ ކަމުގައި އިކޮނޮމިކް މިނިސްޓްރީގެ ރެޖިސްޓްރާ އޮފް ކޮމްޕެނީޒް، މަރިޔަމް ވިސާމް ވިދާޅުވެއްޖެއެވެ.
"ރާއްޖެ ޓީވީ" އިން ގެނެސްދިން ޕްރޮގްރާމެއްގައި ވާހަކަދައްކަވަމުން ވިސާމް ވިދާޅުވީ މިނިސްޓްރީ އިން އުސޫލުތައް އެކުލަވާލާއިރު، ހިޔާރު ކުރަން ޖެެހެނީ މެދު މިންގަނޑެއް ކަމަށެވެ. ނަމަވެސް މެދު މިންގަނޑުގައި ހިފަހައްޓައިގެން ކަންކަން ކުރަން ބަލާއިރު، އާންމު ގޮތެއްގައި ގިނަ ފަރާތްތަކުން އެގޮތަށް އަމަލު ނުކުރާތީ އުސޫލުތައް ހަރުކަށި ކުރަން ޖެހެނީ ކަމުގައި ވިސާމް ފާހަގަކުރެއްވިއެވެ.
އަދި މިގޮތުން ރާއްޖޭގައި ބިދޭސީން ވަޒީފާ އަދާކުރުމުގެ ގަވައިދު ވެސް އަމަލު ކުރަންޖެހޭ ގޮތް ތަފްސީލު ކުރުމަށް ފަހު އެކުލަވާލާ އާންމުކޮށްފައިވާނެ ކަމަށް ވިސާމް ވިދާޅުވިއެވެ.
މީގެ އިތުރުން ރާއްޖޭގެ އާބާދީގެ ބޮޑު އިންސައްތައަކީ ޒުވާނުން ކަން ފާހަގަކޮށް ވިސާމް ވިދާޅުވީ ޒުވާނުން ވިޔަފާރީގެ ދާއިރާއަށް ނެރުމަކީ ވަރަށް ބޮޑު އިސްކަމެއްދޭ ކަމެއް ކަމަށެވެ. އަދި ޒުވާނުން ވިޔަފާރީގެ ދާއިރާ އަށް ނެރެވޭނީ ކަންކަން ވީހާވެސް ބޮޑަކަށް ސާފު ކޮށްދީގެން ކަމުގައި ވެސް ވިސާމް ފާހަގަ ކުރެއްވިއެވެ.
