ވަކީލުކުރަން ޖެހުމަކީ ހިޖުރައިގެ ހާދިސާއިން ލިބޭ އެންމެ މުހިންމު ފިލާވަޅު: ހުތުބާ
ކަންކަމުގައި الله އަށް ވަކީލުކުރަން ޖެހުމަކީ ހިޖުރައިގެ މަތިވެރި ހާދިސާއިން އަހަރެމެންނަށް ލިބޭ އެންމެ މުހިންމު އެއް ފިލާވަޅު ކަމަށް މިއަދުގެ ހުކުރު ހުތުބާގައި ބުނެފި އެވެ.
ހިޖުރައިގެ ދަރުސްތަކުގެ މައްޗަށް އަލިއަޅުވާލައި ހުކުރު ހުތުބާގައި ބުނީ އަންނަ އާދީއްތަ ދުވަހަކީ ހިޖުރީ އާ އަހަރެއް ފެށޭ ދުވަސް ކަމުން ކީރިތި ރަސޫލާ މައްކާއިން މަދީނާއަށް ކުރެއްވި ހިޖުރަ އާ މެދު ފުންކޮށް ވިސްނާލުމަކީ މިއަދު ކުރަން ވެއްޖެ ކަމެއް ކަމަށެވެ.
ކީރިތި ރަސޫލާ މައްކާއިން މަދީނާއަށް ކުރެއްވި ހިޖުރައިގައި ތަފާތު އެތައް އިބުރަތްތަކަކާއި ދަރުސްތަކެއްވާކަން ފާހަގަކޮށް ހުތުބާގައި ބުނެފައި ވަނީ ހިޖުރައިން ލިބޭ އަގުހުރި އެއް ފިލާވަޅަކީ ދީނަށް ޓަކައި ގުރުބާންވުމުގެ މަތިވެރި ފިލާވަޅު ކަމަށެވެ.
ހިޖުރައިން ލިބޭ އަނެއް ފިލާވަޅަކީ ކަމެއް ކާމިޔާބުވުމުގެ އެންމެ މުހިންމު ބަޔަކީ ކަމެއް ފެށުމުގެ ކުރިން އެ ކަމެއް ފުރިހަމައަށް ރޭވުމާއި ކަންކަން ކުރާނެ ފަރާތްތައް ކަނޑައަޅައި ފުރިހަމައަށް ހަމަޖައްސާފައިވުން ކަމަށް ހުކުރު ހުތުބާގައި ވަނީ ބުނެފަ އެވެ. އަދި ދަތި އުނދަގޫ ވަގުތުގައި އީމާންކަމުގެ އަހުލުވެރީން ސާބިތުކަމާ އެކު ތިބޭނެ ކަމާއި ކަންކަމުގައި الله އަށް ވަކީލުކުރަން ޖެހުމަކީ ވެސް ހިޖުރައިން ލިބޭ ދަރުސްތައް ކަމަށެވެ.
"ކަންކަމުގައި الله އަށް ވަކީލުކުރާން ޖެހޭކަމީ، ހިޖުރައިގެ މި މަތިވެރި ހާދިސާއިން އަޅަމެންނަށް ލިބޭ އެންމެ މުހިންމު އެއް ފިލާވަޅެވެ. الله އަށް ވަކީލުކުރުމަކީ އެއްވެސް ހާލެއްގައި، ވަކީލުކޮށްފީމޭ ބުނެ ދެއަތް އުރައިލައިގެން ތިބުމެއް ނޫނެވެ،"
ވަކީލުކުރުމަކީ ކަންކަން ކުރުމަށްޓަކައި ހުރި ވަސީލަތްތަކުގެ ބޭނުން ހިފުމާ އެކު، اللهގެ ހަޒުރަތުން ރައްކާތެރިކަން ލިބޭނެ ކަމަށް ޔަގީންކޮށްގެން ތިބުން ކަމަށް މިއަދުގެ ހުތުބާގައި ވަނީ ބުނެފަ އެވެ.
