ހުސައިން މުހައްމަދުގެ ހިދުމަތުގެ އަގު ވަޒަން ކުރަން މަޖިލިހުގައި ސުކޫތެއް
ހުކުރު ދުވަހު އަވަހާރަވި ރައްޔިތުންގެ މަޖިލީހުގެ ކުރީގެ މެންބަރު ހުސައިން މުހައްމަދުގެ ހިދުމަތްތަކުގެ އަގު ވަޒަން ކުރުމުގެ ގޮތުން މަޖިލީހުގެ މިއަދުގެ ޖަލްސާގައި ހަމަހިމޭން ކަމުގެ ސުކޫތެއް ގެނެސްފިއެވެ.
އެގޮތުން މަޖިލީހުގެ އެޖެންޑާގެ ބައިތަކާއި އެކު ކުރިއަށް ދިއުމުގެ ކުރިން ޖަލްސާގައިި ތިއްބެވި ހުރިހާ މެމްބަރުންވަނީ މެމްބަރު ހުސެއިންގެ ހަނދާނުގައި ސުކޫތެއް ގެނައުމުގެ ގޮތުން ކޮޅަށް ތެދުވެވަޑައިގެން ފައެވެ.
ހުސައިން މުހައްމަދުގެ ހަނދާނުގައި މަޖިލީހުގެ އިދާރާގައި ތައުޒިޔާގެ ދަފްތަރެއް ހުޅުވާލުމަށް ވެސް ވަނީ ނިންމާފައެވެ. އަދި އެ ދަފްތަރުގައި ސޮއި ކުރުމުގެ ފުރުސަތު އާންމު ކޮންމެ މީހަކަށް ވެސް ހުޅުވާލެވިފައިވާ ކަމަށް މަޖިލީހުގެ ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވިދާޅުވިއެވެ.
އީވާ އިތުރަށް ވިދާޅުވީ ހުސެއިން އަކީ އާއްމު ހިދުމަތުގައި ސަރުކާރަށާއި ދައުލަތަށާއި ގައުމަށް ހިދުމަތް ކުރެއްވުމުގައި އެތައް އަހަރެއް ހޭދަކުރެއްވި ބޭފުޅެއް ކަމަށެވެ.
އަދި އޭނާވެސް މެމްބަރު ހުސެއިން އާއި އެކު 10 ވަރަކަށް އަހަރު ރައްޔިތުންގެ މަޖިލީހުގައި މަސައްކަތް ކުރެއްވި ކަން ފާހަގަކުރައްވައި، އީވާ ވިދާޅުވީ ހުސެއިން އަކީ ކިތަންމެ ހަލަބޮލި ވެގެންދާ ހާލަތްތަކުގައި ވެސް ރަހުމަތްތެރިކަމާއި ކެތްތެރިކަމާއި ހިތްހެޔޮކަން އިސްކުރެއްވި ބޭފުޅެއް ކަމަށާއި އަދި އެއީ ހުރިހާ ބަހުސެއްގައި ވެސް ތެދުބަސް ވިދާޅުވި ބޭފުޅެއް ކަމަށެވެ. ހުސައިން އަކީ މައުލޫމާތު ފުން ބޭފުޅެއްގެ ގޮތުގައި އީވާ ވަނީ ސިފަ ކުރައްވާފައެވެ.
ރައްޔިތުންގެ މަޖިލީހުގެ އިތުރުން ނޫސްވެރިކަމުގެ ދާއިރާގައި ވެސް ގިނަ މަސައްކަތެއް ކުރެއްވި ޙުސައިން މުޙައްމަދުގެ ކުއްލި ވަކިވުމާއި ގުޅިގެން ގިނަ ބަޔަކު ދަނީ ހިތާމަ ފާޅުކޮށް އާއިލާއަށް ތައުޒިޔާ ރައްދު ކުރަމުންނެވެ.
