މިމަހުން ފެށިގެން އިންޑިއާ މުދާ އައްޑޫއަށް ދާއިމީކޮށް ގެންނާނެ، ފުރަތަމަ ބޯޓު މިރޭ
އައްޑޫ ސިޓީއަށް ދާއިމީ ގޮތެއްގައި އިންޑިއާ ބޯޓު ފަހަރު މެދުވެރިކޮށް ޕެރިޝެބަލް ކާގޯ ގެނައުމާއި، ހިތަދޫ ޕޯޓުގެ ހިދުމަތާއި ގުޅޭގޮތުން އައްޑޫ ސިޓީގެ ބައެއް ވިޔަފާރިވެރިންނާއި ވިޔަފާރި ކުންފުނިތަކުގެ އިސް ފަރާތްތަކާއި އެމްޕީއެލްއިން ބައްދަލުކޮށްފި އެވެ.
މޯލްޑިވްސް ޕޯޓްސް ލިމިޓެޑު، އެމްޕީއެލްއިން ބުނީ ވިޔަފާރިވެރިންގެ މި މަޝްވަރާ ބައްދަލުވުމުގައި ބައިވެރިވެވަޑައިގެންނެވީ އެކުންފުނީގެ ސީއީއޯ މުހައްމަދު ވަޖީހު ކަމަށެވެ.
މީގެ ކުރިން އައްޑޫ ސިޓީއަށް އިންޑިއާގެ ޓުޓިކޮރިން އިން ޕެރިޝަބަލް ކާގޯ އުފުލަނީ ލަކުޑި ބޯޓުފަހަރު މެދުވެރިކޮށެވެ. އެ ބޯޓުތަކަށް ދަތުރު ކުރެވެނީ އަހަރުގެ ވަކި ދުވަސްތަކެއްގަ އެވެ. އެހެންނަމަވެސް މިމަހުން ފެށިގެން އައްޑޫ ސިޓީއަށް ދާއިމީ ގޮތެއްގައި އިންޑިއާ މުދާ އުފުލޭނެ އިންތިޒާމު އެމްޕީއެލްއިން ވަނީ ހަމަޖައްސައިފަ އެވެ.
ޕެރިޝަބަލް ކާގޯ އަކީ މުއްދަތު ހަމަވާ ޒާތުގެ އުފެއްދުންތަކެވެ. މީގެ ތެރޭގައި ހިމެނެނީ ބަންދުކުރި ދަޅު ކާނާއާއި، މޭވާ އަދި ތަރުކާރީ ފަދަ ބާވަތްތަކެވެ.
އެމްޕީއެލްއިން ބުނީ އިންޑިއާގެ ފައިނެސް ގްރޫޕު މެދުވެރިކޮށް މިމަހުން ފެށިގެން އިންޑިއާގެ ޓުޓިކޮރިން އިން ދަގަނޑު ބޯޓު ފަހަރުގައި ދަތުރުތައް ފަށާނެ ކަމަށެވެ. އެގޮތުން ފުރަތަމަ ބޯޓު މިރޭ އައްޑޫއަށް ދާނެ ކަމަށްވެސް އެމްޕީއެލްއިން ބުންޏެވެ.
އައްޑޫގެ ވިޔަފާރިވެރިންނާއި ވިޔަފާރި ކުންފުނިތަކުގެ އިސްވެރިންނާއެކު މިއަދު ބޭއްވި ބައްދަލުވުމުގައި އެމްޕީއެލްގެ ސީއީއޯ ވަޖީހު ވަނީ އިންޑިއާގެ ޓުޓިކޮރިން އިން ދާއިމީ ގޮތެއްގައި އައްޑޫއަށް ދަތުރުތައް ކުރިއަށް ގެންދިއުމަށް، ވިޔަފާރިވެރިންގެ އެއްބާރުލުން ލިބުމުގެ މުހިންމުކަން ފާހަގަކުރައްވައިފަ އެވެ. އަދި މިކަމުގައި ވިޔަފާރިވެރިންނަށް ދިމާވާ ދަތިތަކާއި ގުޅޭގޮތުންވެސް މިބައްދަލުވުމުގައި ވާހަކަ ދެއްކެވި އެވެ.
"އަޅުގަނޑުމެންނަކީ މެދުވެރިން. އަޅުގަނޑުމެން ބޭނުންވަނީ ހިތަދޫ ޕޯޓަށް އަންނަ ބޯޓުފަހަރު އިތުރުކުރަން. އޭރުން ހިތަދޫ ޕޯޓުގެ އާމްދަނީވެސް އިތުރުވެ ކުރިއެރުން ލިބޭނީ. މިއީ އައްޑޫގެ ވިޔަފާރިވެރިންވެސް ބޭނުންވާ ކަމެއްކަމަށް އަޅުގަނޑުމެންނަށް ގަބޫލު ކުރެވޭ"
އައްޑޫ ސިޓީއަށް އިންޑިއާއިން މުދާ އުފުލޭނެ ދާއިމީ އިންތިޒާމުތަކެއް ހަމަޖެއްސިއިރު އައްޑޫގެ އިގްތިޞާދު ފުޅާކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.
Ads by STO
