އެއްވެސް ދިވެހި ރައްޔިތަކަށް އަނިޔާ ދިނުމަށް ގޮވައި ހިތްވަރު ދީގެން ނުވާނެ: ގާސިމް
ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙުގެ ހަށިކޮޅުގައި ހުޅުޖަހަން ގޮވާލުމުން ޖުމްހޫރީ ޕާޓީ (ޖޭޕީ) ގެ ލީޑަރު ޤާސިމް އިބްރާހިމް ކުށްވެރި ކުރައްވައިފިއެވެ.
ޗެނަލް 13 އިން ގެނެސްދިން ޕްރޮގްރާމެއްގައި ބައިވެރިވި އާންމު މީހަކު، ރައީސް ސޯލިހުގެ ހަށިކޮޅުގައި ހުޅުޖަހަން ގޮވާލި ގޮވާލުން ކުށްވެރި ކުރައްވައި ގާސިމް ކުރެއްވި ޓްވީޓެއްގައި ވިދާޅުވީ އެއްވެސް ބޭނުމެއްގައި ދިވެހި އެއްވެސް ރައްޔިތަކަށް ގެއްލުމެއް ދިނުމަށް ގޮވާލައި، އެކަމަށް ހިތްވަރު ދީގެން ނުވާނެ ކަމަށެވެ.
"ރައީސް އިބްރާހިމް މުހައްމަދު ސޯލިހްގެ ހަށިކޮޅުގައި ހުޅު ޖެހުމަށް އާންމު ޓީވީއެއްގައި ގޮވާލި ގޮވުން ހަރުކަށި އިބާރާތުން ކުށްވެރިކުރަން." ރައްޔިތުންގެ މަޖިލީހުގައި މާމިގިލި ދާއިރާ ތަމްސީލު ކުރާ ގާސިމް ވިދާޅުވިއެވެ.
ރައީސްގެ ހަށިކޮޅުގައި ހުޅު ޖަހަން ގޮވާލި މައްސަލައަކީ ޓެރަރިޒަމްގެ މައްސަލައެއްގެ ގޮތުގައި ފުލުހުން ބަލަމުން އަންނައިރު، ރައީސް ސޯލިހްގެ ހަށިކޮޅުގައި އަލިފާން ޖަހަން ގޮވާލި މީހާ މިއަދު ވަނީ ހައްޔަރުކޮށްފައެވެ.
މިމައްސަލާގައި ކޯޓުއަމުރެއްގެ ދަށުން ހައްޔަރު ކޮށްފައި ވަނީ އުމުރުން 47 އަހަރުގެ ފިރިހެނެކެވެ. މި މީހާއަކީ ތ. ވިލިފުށްޓަށް އުފަން ނިސްބަތްވާ މީހެއް ވެސް މެއެވެ.
ރައީސްގެ ހަށިކޮޅަށް ގެއްލުން ދިނުމަށް ގޮވާލި ގޮވާލުން، ޗެނަލް 13 ގައި ގެންދިޔަ ލައިވް ޕްރޮގްރާމެއްގައި ބްރޯޑްކާސްޓް ކުރެވިފައިވާތީ އެ ޗެނަލްއިން ވަނީ އެކަމަށް މަޢާފަށް ވެސް އެދިފައެވެ.
