ކުދި ރަށްތަކުގެ ކައުންސިލަށް ރައީސަކާއި, އަންހެނެއް އަދި ޒުވާނަކުން ފުދޭ: ރައީސް
އާބާދީ މަދު ރަށްރަށުގައި ތިން ކައުންސިލަރުން ތިބޭ ގޮތަށް ލާމާޒުކަޒީ ޤާނޫނަށް ބަދަލު ގެންނަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚިޔާލެއް ހުށަހަޅުއްވައިފިއެވެ.
މިހާރު ލާމަކަޒީ ޤާނޫނު އޮންނަ ގޮތުން ކިތަންމެ ކުޑަ އާބާދީއެއް އޮންނަ ރަށެއް ނަމަވެސް ފަސް ކައުންސިލަރަކު އިންތިޚާބު ކުރެއެވެ. އެގޮތަށް އަމަލު ކުރަން ފަށާފައިވަނީ 2021 ވަނަ އަހަރުއެވެ.
މިރޭ ދާޚިލީ ވުޒާރާއިން ބޭއްވި ހަފްލާއެއްގައި ދެއްކެވި ވާހަކަފުޅުގައި ރައީސް ވަނީ މި ސަރުކާރުން ގެންގުޅެމުން އަންނަ ޚަރަދު ކުޑަ ކުރުމުގެ ސިޔާސަތުތަކާ ގުޅޭ ގޮތުން ވާހަކަފުޅު ދައްކަވާފައެވެ. އެގޮތުން ކައުންސިލަރުންގެ އަދަދު މަދުކޮށް, ކައުންސިލްތަކަށް ސަރުކާރުން ގެންނަން ބޭނުންވާ ބަދަލުތަކާ ގުޅޭ ގޮތުން ރައީސް ވަނީ ވާހަކަފުޅު ދައްކަވާފައެވެ.
"އެންމެ ކުޑަ ރަށެއްގައި ވެސް, އެއީ ދެތިން ސަތޭކަ މީހުންގެ އާބާދީގައި ވެސް, ފަސް ކައުންސިލަރުން އެބަތިބޭ. މިގޮތަށް އާބާދީ ކިތަންމެ ކުޑަ ރަށެއްގައި ވެސް, ވަރަށް ގިނަ މީހުން އިންތިޚާބުކޮށްގެން ވަރަށް ގިނަ ޚަރަދުތަކެއް އެބަދޭ. އެއަށްވުރެ މާ އެފިޝިއަންޓްކޮށް, އަދަދު މަދުކޮށް ރަނގަޅު ޚިދުމަތެއް ދެވޭނެ" ރައީސް ވިދާޅުވިއެވެ.
ކައުންސިލްތަކުގެ ހިންގުން ހަރުދަނާ ކުރަން ކުރެވިދާނެ ކަންކަމާ ގުޅޭ ގޮތުން ކައުންސިލްތަކުގެ ބެލެނިވެރި ވުޒާރާއިން ދަނީ އިލްމީ ދިރާސާއެއް ކުރަމުންނެވެ. ރައީސް މިރޭ ވަނީ އެމަނިކުފާނުގެ ޚިޔާލުފުޅު މިކަމުގައި ގެންގުޅުއްވާ ގޮތް ހިއްސާކުރައްވާފައެވެ.
"އަޅުގަނޑު ހިތުން ތިން ހާސް މީހުންނަށްވުރެ ގިނަ ނޫން މީހުން އުޅޭ ރަށްރަށުގައި ތިން މީހަކު އިންތިޚާބު ކުރީމަ ފުދޭނެ, ކައުންސިލް ރައީސަކާ އިތުރު ދެ ބޭފުޅުންނާ. އޭގެ ތެރެއިން އެއް ބޭފުޅަކީ އަންހެނުންގެ ފަރާތުން އިންތިޚާބު ކުރާ އަންހެނުންގެ ރައީސާއަކަށްވުމާ, އަނެއް ބޭފުޅާއަކާ ޒުވާނުންގެ ފަރާތުން ޒުވާނުންގެ ރައީސަކަށް ހޮވޭނެ" ރައީސް ވިދާޅުވިއެވެ.
ރައީސް ވިދާޅުވީ, މިކަމުގައި ގޮތް ނިންމާނީ ގިނަ ބައެއްގެ ޚިޔާލު ހޯދުމަށްފަހުގައި ކަމަށާއި, ގޮތް ނިންމާނީ ރައްޔިތުން ބޭނުންވާ ގޮތަށް ކަމަށެވެ.
