ސިވިލް ސާވިސްގެ ގަވާއިދަށް އިސްލާހު ގެންނަން ހިޔާލު ހޯދަނީ
ސިވިލް ސާވިސްގެ ގަވާއިދަށް އިސްލާހު ގެނައުމަށް އާންމުންގެ ހިޔާލު ހޯދުމަށް ހުޅުވާލައިފި އެވެ.
ސިވިލް ސާވިސް ކޮމިޝަން (ސީއެސްސީ) އިން ގެޒެޓުގައި އިއްޔެކުރި އިއުލާނެއްގައި ބުނީ ސިވިލް ސާވިސް މެދުވެރިކޮށް ދައުލަތުން ރައްޔިތުންނަށް ފޯރުކޮށްދެމުންދާ ހިދުމަތުގެ ފެންވަރު ރަނގަޅުކޮށް، ޒަމާނީ ޓެކްނޮލޮޖީގެ ޒަރީއާއިން އެ ހިދުމަތްތައް އަވަސްކަމާ އެކު ރައްޔިތުންނަށް ފޯރުކޮށްދިނުމަކީ ކޮމިޝަނުގެ އަމާޒެއް ކަމަށެވެ. މުވައްޒަފުންގެ ހައްގުތައް ކަށަވަރުކޮށްދިނުމާއި އިދާރާތައް ހިންގުމަށް ފަސޭހަ ގޮތްތައް ހޯދައިދިނުމާ އަދި މުވައްޒަފުންގެ ކަންކަން ބެލެހެއްޓޭނެ ފަސޭހަ ނިޒާމުތައް ގާއިމުކުރުމަކީ ސީއެސްސީން އަބަދުވެސް ކުރަމުންދާ މަސައްކަތަކެވެ.
އެ ކޮމިޝަނުން އެކަށައަޅާފައިވާ ލަނޑުދަނޑިތައް ހާސިލުކުރުމަށް ސިވިލް ސާވިސްގެ ގަވާއިދު އިސްލާހުކުރުމުގެ މަސައްކަތް ދަނީ ކުރަމުންނެވެ. އެ މަސައްކަތް ކުރުމުގައި އާންމު ރައްޔިތުންނާއި ސިވިލް ސާވިސްގެ މުވައްޒަފުންގެ ހިޔާލާއި މަޝްވަރާ ބޭނުން ވާތީ، އެ ފުރުސަތު ކޮމިޝަނުން އާންމުކޮށް ވަނީ ހުޅުވާލާފަ އެވެ.
ދިވެހި ސިވިލް ސާވިސްގެ ގަވާއިދަށް ގެންނަން ފެންނަ ހިޔާލެއް އޮތް ނަމަ، އެފަދަ ހިޔާލެއް ކޮމިޝަނުގެ އީމެއިލް އެޑްރެހަށް ނުވަތަ ކޮމިޝަނަށް އަންނަ މަހުގެ 31 ވަނަ ދުވަހުގެ ކުރިން ފޮނުވަން ވަނީ އެދިފަ އެވެ. ދިވެހި ސިވިލް ސާވިސްގެ ގަވާއިދު 2014 އަދި އެ ގަވާއިދަށް ގެނެވިފައިވާ އިސްލާހުތައް ކޮމިޝަނުގެ ވެބްސައިޓުން ލިބެން ހުންނާނެ އެވެ.
Ads by STO
