އިންފްރާސްޓްރަކްޗާ މަޝްރޫއުތަކަށް އެއްބާރުލުން ހޯދަން ޗައިނާއާއެކު މަޝްވަރާކޮށްފި
ރާއްޖޭގައި ކުރިއަށްގެންދާ އިންފްރާސްޓްރަކްޗާ މަޝްރޫއުތަކަށް އެއްބާރުލުން ހޯދުމަށް ޗައިނާ އިންޓަނޭޝަނަލް ޑިވެލޮޕްމެންޓް ކޯޕަރޭޝަން އޭޖެންސީ (ސިޑިކާ) އާއެކު މަޝްވަރާކޮށްފި އެވެ.
މިމަޝްވަރާ ބައްދަލުވުން ބާއްވާފައިވަނީ ފޮރިން މިނިސްޓަރު މޫސާ ޒަމީރު މިހާރު ޗައިނާއަށް ކުރައްވަމުން ގެންދަވާ ދަތުރުފުޅުގަ އެވެ. މިނިސްޓަރު ޒަމީރު މަޝްވަރާކުރައްވާފައިވަނީ ސިޑިކާގެ ޗެއާމަން ލުއޯ ޒާއުހޫއާ އެވެ.
މިނިސްޓަރު ޒަމީރު ވަނީ ރާއްޖެ އާއި ސިޑްކާގެ ގުޅިގެން މަސައްކަތް ކުރުމުގެ މުހިންމުކަމަށް އަލިއަޅުއްވާލައްވައި، ރާއްޖޭގައި މިހާރު ކުރިއަށްދާ އިންފްރާސްޓްރަކްޗާ މަޝްރޫއުތަކަށް އަލިއަޅުވާލައްވައިފަ އެވެ. އެގޮތުން މިނިސްޓަރު ވަނީ އެއްބާރުލުން ދިނުމަށް ހުރި އާ ފުރުސަތުތަކާއި ގުޅޭގޮތުންވެސް ވާހަކަފުޅު ދައްކަވައިފަ އެވެ.
ރާއްޖޭގެ އިންފްރާސްޓްރަކްޗަރ ރަނގަޅުކޮށް، އިގްތިސާދީ ކުރިއެރުން އިތުރުވެ، މިކަމުގެ ސަބަބުން ރާއްޖޭގެ ރައްޔިތުންނަށް ބޮޑެތި ފައިދާތަކެއް ލިބިގެންދާނެ މަޝްރޫއުތައް ވަގުތުން ހިންގުމުގެ މުހިންމުކަމާ މެދު ދެފަރާތުންވެސް މަޝްވަރާ ކުރި އެވެ.
މި ބައްދަލުވުން ނިންމާލާފައިވަނީ ދެ ގައުމަށް ވެސް ފައިދާ ކުރާނެގޮތަށް ކުރިއަށް އޮތް ތަނުގައި ކުރިއަށް ގެންދާނެ ކަންތައްތައް ކާމިޔާބުކަމާއެކު ހިންގޭނެ ގޮތް ކަށަވަރުކޮށްދީ، ގާތް ގުޅުމެއް ބާއްވަން އެއްބަސްވެގެންނެވެ.
މިއަދު ބޭއްވި މަޝްވަރާ ބައްދަލުވުމުގައި މިނިސްޓަރު ޒަމީރުގެ އަރިހުގައި މިނިސްޓަރ އޮފް ފިނޭންސް ޑރ.މުޙައްމަދު ޝަފީޤާއި، މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ފަޒީލް ނަޖީބްގެ އިތުރުން ސަރުކާރުގެ އިސް ވެރިންނާއި ޗައިނާ އެމްބަސީގައި މަސައްކަތް ކުރައްވާ ބޭފުޅުންވެސް ބައިވެރިވެވަޑައިގެންނެވި އެވެ.
