ޔޫޓިއުބް ވީޑިއޯ ހަދާ މީހުންނަށް ފައިސާ ލިބޭ ގޮތް ފަހިކުރަން ވައިޓް ހައުސްއާ މަޝްވަރާކޮށްފި
ޔޫޓިއުބުގައި ކޮންޓެންޓް ހަދާ ރާއްޖޭގެ ކްރިއޭޓަރުންނަށް ފައިސާ ލިބޭނެގޮތް ފަހިކުރަން އެމެރިކާގެ ރިޔާސީ ގަނޑުވަރު، ވައިޓް ހައުސް އާއެކު ސަރުކާރުން މަޝްވަރާކޮށްފި އެވެ.
ރޭ ދައުލަތުގެ މީޑިއާއިން ގެނެސްދިން "ރާއްޖެ މިއަދު" ޕްރޮގްރާމުގައި ކްރީއޭޓާ އިކޮނޮމީއެއް ގާއިމުކުރުމަށް ކުރަމުން އަންނަ މަސައްކަތްތަކާ ގުޅޭގޮތުން ވާހަކަ ދައްކަވަމުން އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވީ އެކި ކަހަލަ ކަންކަން ކުރާ ގިނަ އަދަދެއްގެ އުފެއްދުންތެރިން ރާއްޖޭގައި އެބަތިބި ކަމަށެވެ. އެގޮތުން ޔޫޓިއުބާއި އިންސްޓަގްރާމާއި ފޭސްބުކާ އަދި ޓިކްޓޮކް ފަދަ ސޯޝަލް ޕްލެޓްފޯމްތަކަކީ މިއަދު ވިޔަފާރި ކުރެވޭ ގޮތަށް ފަހިވެފައިވާ ޕްލެޓްފޯމްތައް ކަމުގައި ސަޢީދު ވިދާޅުވި އެވެ.
މި ޕްލެޓްފޯމްތަކަކީ ގައުމުތަކުން ވިޔަފާރީގެ ތެރެއަށް ވަދެގެން ވަަރަށް ބޮޑަށް ހަރަކާތްތެރިވާ ޕްލެޓްފޯމްތަކެއްކަން ފާހަގަކުރައްވާ މިނިސްޓަރު ވިދާޅުވެފައި ވަނީ ރާއްޖޭގައި އެކަން ކުރެވެން ނެތީ މިހާރު އޮތް ނިޒާމުގެ ތެރެއިން ޕޭމަންޓް ރިސީވް ކުރެވޭނެ ފަސޭހަގޮތްތަކެއް ނެތުމުން ކަމަށެވެ. އަލަށް އުފެދިގެން އަންނަ ކްރިއޭޓިވް މަސައްކަތްކުރާ ފަރާތްތަކުން އޮންލައިންކޮށް އެކި ވިޔަފާރިތައް ކުރަމުން އަންނަ ކަމަށް ސަޢީދު ވިދާޅުވި އެވެ.
ސަޢީދު ވިދާޅުވި ގޮތުގައި ޑިޖިޓަލް އީ-ކޮމާސް ވިޔަފާރީގައި ހަރަކާތްތެރިވާ ފަރާތްތަކަށް ރާއްޖޭގައި ވަރަށް ބޮޑެތި ގޮންޖެހުންތައް އެބަހުރި ކަމުގަ އެވެ. އެކަންކަން ހައްލު ކުރުމަށް ވަރަށް ގިނަ މަސައްކަތްތަކެއް ކުރަމުން އަންނަ ކަމަށް އޭނާ ވިދާޅުވި އެވެ.
ސަރުކާރުގެ އިގުތިސޯދީ ސިޔާސަތާ ގުޅޭގޮތުން ވާހަކަ ދައްކަވަމުން މިނިސްޓަރު ވިދާޅުވީ ޕޭޕަލްގެ ހިދުމަތް ރާއްޖެއަށް ގެނައުމަށް ރައީސް ޑރ. މުޙައްމަދު މުޢިއްޒުގެ އެދިވަޑައިގަތުމަށް ވަރަށް ގިނަ ފަރާތްތަކާ ބައްދަލު ކުރެވިފައިވާ ކަމަށެވެ.
"ޕޭޕަލްގެ ރީޖަނަލް ޕްރެޒިޑެންޓާ ވެސް އަޅުގަނޑު ސިޓީއަކުން އެ ވާހަކަ ދެންނެވި އަދި މިހާރު އެމެރިކާ ސަރުކާރުގެ އެހީތެރިކަން އަޅުގަނޑުމެން އެދިގެން އެ މަސައްކަތް މި ދަނީ ކުރަމުން،" ސަޢީދު ވިދާޅުވި އެވެ.
މިނިސްޓަރު ވިދާޅުވެފައި ވަނީ މަސައްކަތް ކުރުމުގައި އެ ހިސާބަށް ދާން ޖެހެނީ މާކެޓް ކުޑަވުމުން ބައެއް ޕޭމަންޓް ޕްލެޓްފޯމްތަކުގައި ރާއްޖެ ނުހިމެނޭތީ ކަމަށެވެ. އެފަދަ ޕްލެޓްފޯމްތައް ރާއްޖެއަށް ގެނައުމުގައި ގާނޫނީ ގޮތުން ބައެއް ގޮންޖެހުންތައް ހުރިކަން ވެސް މިނިސްޓަރު ފާހަގަކުރެއްވި އެވެ.
އެމެރިކާއަށް މިފަހުން ކުރެއްވި ދަތުރަށް އަލިއަޅުއްވާލައްވާ މިނިސްޓަރު ވިދާޅުވީ ސްޓޭޓް ޑިޕާޓްމަންޓުގެ ކަމާ ގުޅުންހުރި ބައެއް ފަރާތްތަކާ މަޝްވަރާ ކުރެއްވި ކަމަށެވެ.
"ޔޫއެސްއަށް އަޅުގަނޑު ދާދި މިދާކަށް ކުރި ދަތުރުގައި ވެސް ސްޓޭޓް ޑިޕާޓްމަންޓުގެ ހަމަ މިކަމާ ގުޅޭ ބައެއް ފަރާތްތަކާ، މާނައަކީ ޔޫއެސްގެ ހަމަ ވައިޓް ހައުސްގެ ވެސް މަސައްކަތްކުރާ އެންމެ އިސް ބައެއް ފަރާތްތަކާ އެކުގައި އަޅުގަނޑުމެން ރައީސްގެ އެދިވަޑައިގަތުމަށް،" ސަޢީދު ވިދާޅުވި އެވެ.
މިނިސްޓަރު ވިދާޅުވި ގޮތުގައި ޔޫޓިއުބްގައި އެކައުންޓް ހުޅުވުނު ނަމަވެސް ރާއްޖޭގައި މަނިޓައިޒް ނުކުރެވޭ ކަމުގަ އެވެ. އަދި ގޫގުލް ޕޭ އާއި އެޕަލް އާ ގުޅުންހުރި ކަންކަން ފަހިކުރަން ސަރުކާރުން ގިނަ މަސައްކަތްތަކެއް ކުރަމުން އަންނަކަން ސަޢީދުގެ ވާހަކައިގައި ފާހަގަކުރެއްވި އެވެ.
Ads by STO
