ސަރުކާރުން ނެރުނު ބަޔާނުގައި އިޒްރޭލުގެ ނަން ނެތުމުން ޔާމީން ފާޑުވިދާޅުވެއްޖެ
ޔަހޫދީން އަތްގަދަ ކޮށްގެން އުޅޭ ފަލަސްތީނުގައި މިނިވަން ދައުލަތެއް ގާއިމްކުރުމަށް އިޒްރޭލާ ދެކޮޅަށް ހަނގުރާމަ ކުރަމުންދާ ހަމާސް ޖަމާއަތުގެ ލީޑަރު, އިސްމާއީލް ހަނިއްޔާ ޝަހީދުކޮށްލުން ކުށްވެރިކޮށް ދިވެހި ސަރުކާރުން ނެރުނު ބަޔާނުގައި އިޒްރޭލުގެ ނަން ނެތުމުން ކުރީގެ ރައީސް އަބްދުﷲ ޔާމީން ފާޑުވިދާޅުވެއްޖެ އެވެ.
މިރޭ ޕީއެންއެފްގެ ހަރުގޭގައި ކުރިއަށްދާ ޖަލްސާގައި އޯޑިއަންސްގައި އިންނަވައި ވާހަކަފުޅު ދައްކަވަމުން ޔާމީން ވިދާޅުވީ ކޮންމެ ކަމެއްގައި ވެސް މި ސަރުކާރުގައި ފެންނަނީ ދެފުށް ދެގޮތް ސިފަތަކެއް ކަމަށެވެ. ހާރިޖީ ސިޔާސަތު މިނިވަން ނުވާ ކަން ވެސް ސަރުކާރުގެ އަމަލުތަކުން ފެންނަ ކަމަށް އެމަނިކުފާނު ވިދާޅުވި އެވެ.
ރާއްޖެއަކީ ސައްތައިން ސައްތަ އިސްލާމީ ދައުލަތަކަށް ވެފައި، އަބަދުވެސް ދިވެހި ސަރުކާރުން ފަލަސްތީނު-އިޒްރޭލު މައްސަލާގައި ގެންގުޅެފައިވަނީ ފަލަސްތީނާ އެއްކޮޅު ސިޔާސަތެއް ކަން ޔާމީން ފާހަގަ ކުރެއްވި އެވެ. އެކަމަކު ފަލަސްތީނުގެ ކުރީގެ ބޮޑު ވަޒީރު އަދި ފަލަސްތީނު އަސްކަރީ ޖަމާއަތް ހަމާސްގެ ލީޑަރ ހާނިއްޔާ ޝަހީދުކޮށްލައި ޖަނާޒާ ވެސް ބޭއްވި ފަހުން ބަޔާނެއް ނެރުމަކީ ވަރަށް ދެރަވަރު ކަމަށް ވިދާޅުވި އެވެ.
"ދެން އެ ނެރުނު ބަޔާނުގައި. އެ ބަޔާނުގައި ނެތޭ ހާނިއްޔާ ޝަހީދުކޮށްލީ ކޮން ބަޔަކު ކަމެއް ވެސް ލިޔެލާފައި. ދުނިޔެ ހިމޭން ވާށޭ އޮތީ. އާދެ. އެ މައްސަލައަށް ސުލްހައެއް ގެނައުމަށް ދުނިޔެ ފެއިލްވެފަ މި އޮތީ. އެކަމަކު ދުނިޔެއަކުން ނޫނޭ އޭނާ ޝަހީދުކޮށްލީއެއް. އެ އިޒްރޭލުގެ ޔަހޫދީ ދައުލަތުންނޭ،" ޔާމީން ވިދާޅުވި އެވެ.
"އިޒްރޭލުގެ ނަން ވެސް ނުކެރުނު މިހާ ފަހުން ނެރުނު ބަޔާނުގައި ޖަހައިލަން، ދެން ކޮން މިނިވަން ކަމެއްގެ ވާހަކަތޯ، މިނިވަން ދުވަހުގެ ރަސްމީ ޖަލްސާގައި، އަޅުގަނޑުމެންގެ ރައީސް [ޑރ. މުހައްމަދު މުއިއްޒު] މި ދައްކަވަނީ، ހާރިޖީ ސިޔާސަތުގައި އެއްވެސް މިނިވަންކަމެއް ނެތް ކަމެއް ނޫން ތޯ މި ފެންނަނީ،" ޔާމީން އިތުރަށް ވިދާޅުވި އެވެ.
އިޒްރޭލުން ފަލަސްތީނުގެ އާންމުންނާ ދެކޮޅަށް ހިންގާ ގަތުލްއާންމަކީ، ޒަމާނުއްސުރެން ދިވެހި ސަރުކާރުން ވަރަށް ކެރިގެން ބަސް ބުނަމުން އައި މައްސަލައެއް ކަމަށް ޔާމީން ވިދާޅުވި އެވެ. ރައީސް އިބްރާހިމް މުހައްމަދު ސޯލިހުގެ ސަރުކާރުގައި ވެސް މި ސަރުކާރަށް ވުރެ ކެރިގެން އެ މައްސަލާގައި ބައިނަލްއަގުވާމީ މައިދާންތަކުގައި ބަސް ބުނެފައި އެބަ ހުރި ކަމަށް ޔާމީން މިރޭ ވިދާޅުވި އެވެ.
