ޔާމީނަށް ވެރިކަން މަގުމަތިން ވައްޓައެއް ނުލެވޭނެ، އެކަމެއް ނުވާނެ: އަބްދުއްރަހީމް

އަބްދުއްރަހީމް ވިދާޅުވީ މުޒާހަރާއަކަށް ނިކުންނަ އުޅެފިނަމަ ރައީސް ޔާމީން އެންމެ އަރިހުގައި އުޅުއްވާ ކުރީގެ ކޮމިއުނިކޭޝަން މިނިސްޓަރު މުހައްމަދު މަލީހް ޖަމާލާއި ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދާއި ކުރީގެ ސީޕީ ހުސައިން ވަހީދު ނުފެންނާނެ ކަމަށެވެ.

"ރައީސް ޔާމީނަކީ އާންމުކޮށް މިހެން މަގުމައްޗަށް ނުކުމެ ސިޔާސީ ކަންކަމުގައި އުޅުއްވާ ބޭފުޅެއް ނޫނޭ. އަޅުގަނޑުމެންނަށް ނޫންތޯ އެނގޭނީ، ސޯޓުބުރި ލައްވައިގެން ގޭގައި އިންނާނީ" - އަބްދުއްރަހީމް ވިދާޅުވިއެވެ.

އަބްދުއްރަހީމް އިތުރަށް ވިދާޅުވީ ދިވެހި ލޭ ހިނގާ ދިވެހި ދަރިން ތިއްބާ ބަންގްލަދޭޝްއަށް ހެދިހެން މި ގައުމަށް ނުހެދޭނެ ކަމަށެވެ.

"ދެން އެހެންވީމަ އަޅުގަނޑު މިދަންނަވަނީ ބަންގްލަދޭޝްއަށް ހެދިހެން މި ގައުމަށް ހަދަން ދިމާނުކުރައްވާށޭ. އެކަމެއް ނުކުރެވޭނެ، ދިވެހި ލޭ ހިނގާ ދިވެހި ދަރިން އެބަތިބި މީގެ ތެރޭގައި" - އަބްދުއްރަހީމް ވިދާޅުވިއެވެ.

އަބްދުއްރަހީމް ވިދާޅުވީ މި ގައުމުގެ މިނިވަންކަމާއި އަމާންކަމާއި ރައްކާތެރިކަމާއި އިސްތިގުލާލު އަދި ރައްޔިތުންގެ ފުދުންތެރިކަމާ ހިސާބަށް ދިއުމުން މަޑުން ނުތިއްބަވާނެ ކަމަށެވެ. އަދި ކުރިމަތިލައްވަން ކެރިވަޑައިގަންނަވާނެ ކަމަށާއި ބުނަން ޖެހުނު ކޮންމެ ބަހެއް ވިދާޅުވާނެ ކަމަށް އަބްދުއްރަހީމް ވިދާޅުވި އެވެ.

ބަންގްލަދޭޝްގެ ސަރުކާރު ވަޒީފާތަކަށް މީހުން އައްޔަން ކުރުމުގައި އަމަލު ކުރަމުންދާ ކޯޓާ ނިޒާމާ ދެކޮޅަށް ދަރިވަރުން ފެށި މުޒާހަރާގައި ހިނގާދިޔަ ކުރިމަތިލުންތަކުގައި ގިނަ ބަޔަކު މަރުވެ, ގިނަ އަދަދެއްގެ ބަޔަކު ވަނީ ހައްޔަރުކޮށްފަ އެވެ.

އެ ހަމަނުޖެހުމުގައި މަޖުބޫރުވެވަޑައިގެން ޝައިހު ހަސީނާ މަގާމުން އިސްތިއުފާ ދެއްވުމަށްފަހު މިހާރު ހުންނެވީ އިންޑިއާގެ ހިމާޔަތުގައި އެ ގައުމުގަ އެވެ. އަދި ހަސީނާ އިންޑިއާގައި ހުންނަވަނިކޮށް ރިޔާސީ ގަނޑުވަރަށް އާންމުންގެ ގިނަ ބަޔަކު ވަދެ އެތަނުގައި ހުރި ގިނަ އަދަދެއްގެ ތަކެތި ނެރެގެން ގެންގޮސްފައިވާތަން ވީޑިއޯތަކުން ފެނެ އެވެ.