ޝާހިދު ކަޕޫރު "ޖަރޒީ" ގައި މިމަހު މަސައްކަތް ފަަށަނީ
އިންޑިއާގައި ކޮވިޑް-19 ހަލުވިކަމާއެކު ފެތުރެމުން ދިޔަ ނަމަވެސް، ފުރަބަންދުން މިހާރު އެޤައުމު ނަގާފައިވާތީ ފިލްމު އިންޑަސްޓްރީގެ މަސައްކަތް ވަނީ އަލުން ފަށާފައެވެ. ބޮލީވުޑްގެ ފިލްމުތަކުގެ މަސައްކަތްތައް އަލުން ފެށިފައިވީ ނަމަވެސް، އެމަސައްކަތްތައް ކުރަމުން ދަނީ ރައްކާތެރިކަމުގެ ފިޔަވަޅުތަކާއެކުގައެވެ.
އެގޮތުން ބޮލީވުޑްގެ މަޝްހޫރު އެކްޓަރ ޝާހިދު ކަޕޫރު ވެސް ވަނީ އޭނާ އެންމެ ފަހުން ކުޅުމަށް ސޮއި ކޮށްފައިވާ ފިލްމު "ޖާރޒީ" ގެ މަސައްކަތް އަލުން ފަށާފައެވެ.
ޝާހިދު ކުޅޭ ހިންދީ މިފިލްމަކީ ޓެލުގޫ "ޖަރޒީ" ފިލްމުގެ ރީމޭކެކެވެ.
ރިޕޯޓުތަކުން ބުނާގޮތުގައި "ޖާރޒީ" ގެ މަސައްކަތް ޝާހިދު މިމަހުގެ ފަހުކޮޅު ފަށާނެއެވެ. ޝޫޓިންގ ފެށުމަށް ހަމަޖެހިފައިވަނީ ޗަންދިގަރް ގައެވެ.
ކޮވިޑްގެ ހާލަތާއި ގުޚިގެން އިންޑިއާ ފުރަބަންދު ކުރުމުގެ ކުރިން ވެސް ވަނީ "ޖާރޒީ" ގެ މަސައްކަތް ފަށާފައެވެ. އެގޮތުން މިހާރު އެފިލްމުގެ ޝޫޓިންގެ ދެން ބާކީ އޮތީ 15 ވަރަކަށް ދުވަހުގެ މަސައްކަތް ކަމަށް ވެސް ރިޕޯޓުތަކުން ބުނެއެވެ.
ނަމަވެސް "ޖާރޒީ" ގެ ބާކީ ހުރި މަންޒަރުތަކަށް ޝާހިދު ކަޕޫރު ރަނގަޅަށް ޓްރެއިން ވުމުގެ ގޮތުން، ޝޫޓިންގ ފެށުމުގެ ކުރިން ކްރިކެޓް ކުޅެން ރަނގަޅަށް ދަސްކުރަން ފިލްމުގެ ޕްރޮޑިއުސަރުން ވަނީ ޝާހިދު ކަޕޫރަށް އަންގާފައެވެ.
