ސީދާ ހަރަކާތަށް ނިކުންނަން އެމްޑީޕީން ގަރާރެއް ފާސްކޮށްފި
އިދިކޮޅު މައި ޕާޓީ، އެމްޑީޕީން ސީދާ ހަރަކާތަށް ނިކުންނަން އެ ޕާޓީގެ ގައުމީ މަޖިލީހުން ރޭ ގަރާރެއް ފާސްކޮށްފި އެވެ.
މިދިޔަ 5 އަހަރު ވެރިކަންކުރި އެމްޑީޕީގެ ގައުމީ މަޖިލީހުން ގ. ނިއުޝާގައި ރޭ ބޭއްވި 4 ވަނަ ދައުރުގެ 13 ވަނަ ޖަލްސާގައި ތިމަރަފުށީ ދާއިރާގެ ރައީސް އިބްރާހިމް އަންވަރު ހުށަހެޅީ ސަރުކާރުން އެއްވެސް އިންސާފެއް ނެތި ވަޒީފާއިން ވަކިކުރަމުންދާ މީހުންނަށް އިންސާފު ހޯދައި ދިނުމަށް މަސައްކަތްކުރުމަށެވެ.
އެ މަސައްކަތް ކުރުމަށް އަންވަރު ހުށަހެޅީ ފަސް މެންބަރުންގެ މައްޗަށް އެކުލެވޭ ކޮމިޓީއެއް އެކުލަވާލުމަށެވެ.
އެ ކޮމިޓީއަށް އަންވަރު ހުށަހެޅި ނަންތަކަކީ:
- ނައިބު ރައީސް ހިސާން ހުސައިން
- ލީގަލް ޑިރެކްޓަރު މަހްފޫޒް ސައީދު
- ކެންދޫ ދާއިރާގެ މެމްބަރު މައުރޫފް ޒާކިރު
- އަލިފުށީ ދާއިރާގެ ރައީސް މުހައްމަދު ހުސައިން ރަޝީދު (ބިގޭ)
- ކުޑަހުވަދޫ ދާއިރާގެ ރައީސް ޝާތިރު އަބްދުއްރަހީމް
އަންވަރުގެ އެ ގަރާރު ފާސްކޮށްފައިވަނީ ގައުމީ މަޖިލީހުގެ ބައްދަލުވުމުގައި ބައިވެރިވެވަޑައިގެންނެވި ހުރިހާ މެމްބަރުންގެ އިއްތިފާގުންނެވެ.
މި ސަރުކާރުން ނުހައްގުން މީހުން ވަޒީފާއިން ވަކިކުރަމުންދާ ކަމަށް ބުނެ އެމްޑީޕީން ދަނީ ކަންބޮޑުވުން ފާޅުކުރަމުންނެވެ. އެމްޑީޕީން ތުުހުމަތުކުރާ ގޮތުންނަމަ ސަރުކާރާ ހިޔާލު ތަފާތުވާ މީހުންނަށް ވަޒީފާގެ ބިރުވެސް ދައްކަ އެވެ. އެކަމަކު އެ ވާހަކަތައް ސަރުކާރުގެ ވެރިން ދޮގުކުރެ އެވެ.
