ތާރީހީ ދުވަހެއް؛ އަންހެން އިލްމުވެރިއަކު ލިޔުއްވި ފުރަތަމަ ހުތުބާ އާއެކު ޓީވީ ލައިވްއަށް އިނގިރޭސި ސަބްޓައިޓަލް

ހުކުރު ހުތުބާ ޓީވީން ލައިވް ކުރަމުންދާއިރު، އިނގިރޭސި ބަހުން ސަބްޓައިޓްލް އަރުވަން ފަށައިފި އެވެ.

Ads by Sosun Fihaara

އިސްލާމިކް މިނިސްޓްރީން މާލެ ސަރަހައްދުގެ ކޮންމެވެސް އެއް މިސްކިތެއްގައި އިނގިރޭސި ބަހުން ހުތުބާ ކިޔުމާ ގުޅޭގޮތުން އާންމުންގެ ހިޔާލު ހޯދުމަށް ހުޅުވާލި އެވެ.

އެހެންނަމަވެސް، ފަހުން އެ މިނިސްޓްރީން ނިންމާފައި ވަނީ ދިވެހި ބަހުން ހުތުބާ ކިޔަމުންދާއިރު، ޓީވީ ލައިވްއަށް އިނގިރޭސި ސަބްޓައިޓަލް އެރުވުމަށެވެ.

އެގޮތުން މިއަދު ފެށި މިކަމަކީ ރާއްޖޭގައި ގިނަ ބިދޭސީ މުސްލިމް މަސައްކަތްތެރިން ދިރިއުޅެމުން އައުމާ އެކު، އެފަދަ ފަރާތްތަކަށް ހާއްސަކޮށްގެން އިސްލާމިކް މިނިސްޓްރީން ފެށި މަސައްކަތެކެވެ.

މި ކަމާ ގުޅިގެން އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ވިދާޅުވީ އަންނަ ހަފުތާގައި ހުރިހާ ޓީވީތަކަށް ތަރުޖަމާގެ ފީޑް ދެވޭނެ ކަމަށެވެ.

"ފުރަތަމަ ފަހަރަށް އަންހެން އިލްމުވެރިޔަކު ހައްވާ ލަތީފް ލިޔުއްވި ހުތުބާއެއް. އަދި އަލަށް ލައިވް ޓްރާންސްލޭޝަން ސަބްޓައިޓަލް އަރަން ފެށި އިސްލާމީ މަރުކަޒު ޓީވީތަކަށް. އަދި މިނިސްޓްރީގެ ޕޭޖަށް،" ޝަހީމް ވިދާޅުވި އެވެ.

ހުކުރު ހުތުބާ ލިޔުއްވި އަލްއުސްތާޒާ ހައްވާ ލަތީފަކީ އިސްލާމިކް މިނިސްޓްރީގެ ޑެޕިއުޓީ މިނިސްޓަރެކެވެ.

މިދިޔަ އަހަރުގެ ބޯހިމެނުމުގެ ނަތީޖާތައް ދައްކާ ގޮތުން ރާއްޖޭގައި 97،164 ބިދޭސީން އުޅެ އެވެ.