މަސްއޫލިއްޔަތު އަދާ ނުކުރައްވާ ކަމަށް ބުނެ ކުޅުދުއްފުށީ މެޖިސްޓްރޭޓްގެ މައްސަލައެއް ބަލަނީ
ހދ. ކުޅުދުއްފުށީ މެޖިސްޓްރޭޓް ކޯޓުގެ މެޖިސްޓްރޭޓް އިބްރާހިމް ޝާހިދު މަގާމުގެ މަސްއޫލިއްޔަތު އަދާ ނުކުރައްވާ ކަމަށްބުނެ، އޭނާގެ މައްސަަލައެއް ޖުޑީޝަލް ސާވިސް ކޮމިޝަން (ޖޭއެސްސީ) އިން ބަލަން ފަށައިފިއެވެ.
އެގޮތުން ޖޭއެސްސީން މިއަދު ނެރުނު ބަޔާނެއްގައި ބުނެފައިވަނީ ފަނޑިޔާރު އިބްރާހިމް ޝާހިދުގެ މައްސަލަ ބެލުމަށް ކޮމިޓީއެއް އެކުލަވާލުމަށް އިއްޔެ ބޭއްވި އެކޮމިޝަނުގެ 63 ވަނަ ބައްދަލުވުމުގައި ނިންމާފައިވާ ކަމަށެވެ.
ޖޭއެސްސީން ބުނެފައިވަނީ ފަނޑިޔާރު އިބްރާހިމް ޝާހިދު ގެ މައްސަލަ ބަލަން ނިންމާފައިވަނީ މަގާމުގެ މަސްއޫލިއްޔަތާއި ވާޖިބު އަދާ ނުކުރައްވާ ކަމަށް ތުހުމަތު ކުރެވޭތީ ކަމަަށެވެ.
އެކި ކަހަލަ ތުހުމަތުތައް ހިމެނޭ ފަނޑިޔާރުންގެ މައްސަލަަތައް ޖޭއެސްސީން ދަނީ ބަލައި، ފިޔަވަޅު އަޅަމުންނެވެ. އެގޮތުން ބައެއް ފަނޑިޔާރުން ސަސްޕެންޑު ކުރަން ނިންމާފައިވާއިރު، އަނެއްބައި ފަނޑިޔާރުން މަގާމުން ވަކި ކުރަން ނިންމާފައިވެ އެވެ.
މިހާތަނަށް ޖޭއެސްސީން އެފަދައިން ފިޔަވަޅު އަޅާފައިވާ ފަނޑިޔާރުންގެ ތެރޭގައި ބައެއް ކޯޓުތަކުގެ އިސް ފަނޑިޔާރުން ވެސް ހިމެނެއެވެ. އެގޮތުން ކްރިމިނަލް ކޯޓުގެ ކުރީގެ އިސް ފަނޑިޔާރަކާއި ސުޕްރީމް ކޯޓުގެ ކުރީގެ ފަނޑިޔާރުން ތަކެއް ވެސް ހިމެނެއެވެ.
