މޫސުން ގޯސްވުމުގެ ސަބަބުން މާދަމާ ސަރުކާރު ބަންދު ކުރަން ނިންމައިފި
ރާއްޖެއަށް މިހާރު ކުރަމުންދާ ވިއްސާރައާއި މޫސުން ގޯސްވުމުގެ ސަބަބުން މާދަމާއަކީ ސަރުކާރު ބަންދު ދުވަހެއްގެ ގޮތުގައި ރައީސް ޑރ. މުހައްމަދު މުއިއްޒު ހަމަޖައްސަވައިފި އެވެ.
ރައީސް އޮފީހުގެ ތަރުޖަމާނު ހީނާ ވަލީދު 'އެކްސް' ގައި ކުރެއްވި ވިދާޅުވީ މާދަމާ ސަރުކާރު ބަންދު ދުވަހެއްކަމުގައި ރައީސުލްޖުމްހޫރިއްޔާ ހަމަޖެއްސެވީ، ރާއްޖޭގެ ވަރަށް ގިނަ ރަށްތަކަށް ބޯކޮށް ވާރޭވެހި މޫސުން ގޯސްވުމުގެ ސަބަބުން، ކިޔަވާ ކުދީންނާ ވަޒީފާ އަދާކުރާ ފަރާތްތަކަށްވެސް ދަތުރުފަތުރުކުރުމާ ހިނގާބިނގާވާން ދަތިވުމާއި ގުޅިގެން ދެއްވާ ލުޔެއްގެ ގޮތުން ކަމަށެވެ.
މިހާރު ކުރަމުންދާ ވިއްސާރައިގާ ގޯތިގެދޮރަށާ އާއިލާތަކަށް ލިބޭ ގެއްލުން ކުޑަކޮށްދިނުމަށާ، ރައްޔިތުންނަށް އެހީތެރިކަން ފޯރުކޮށްދިނުމަށް، ސަރުކާރުން ހާއްސަ އިސްކަމެއްދީގެން ރޭގަނޑާއި ދުވާލު މަސައްކަތް ކުރަމުން ގެންދަވާނެކަމުގެ ޔަގީންކަން ދިވެހި ރައްޔިތުންނަށް ރައީސް ދެއްވައިފަ އެވެ. މާލެ ސަރަހައްދުގެ ސްކޫލުތައް މާދަމާ ބަންދުކުރަން ސަރުކާރުން ވަނީ ނިންމާފަ އެވެ.
މިއަދު ހެނދުނުން ފެށިގެން މާލެއަށް ބޯކޮށް ވާރޭވެހި ފެންބޮޑުވުމުގެ ސަބަބުން ހިނގާބިނގާވެ އުޅެން ދަތިތަކެއް ވަނީ ކުރިމަތިވެފަ އެވެ. އާދަޔާ ހިލާފަށް ބޯކޮށް ވެހުނު ވާރޭގައި ބޮޑުވި ފެންގަނޑު ހިންދުމުގައި ސިފައިންނާ ފުލުހުން ދަނީ ހަރަކާތްތެރިވަމުންނެވެ. ފެންވަދެގެން 200 އަށްވުރެ ގިނަ ގެއަކުން ރިޕޯޓްކޮށްފައިވާ ކަމަށް ނޭޝަނަލް ޑިޒާސްޓަ މެނޭޖްމެންޓުން މައުލޫމާތުދެ އެވެ.
މޫސުމަށް ބަލާލިއިރު, މެޓް އޮފީހުން ބުނެފައިވަނީ, އޮތް 5 ދުވަހު ވެސް ރާއްޖޭގެ ބޮޑު ބަޔަކަށް ގުގުރާ ވާރޭ ވެހުމާއެކު ވައިގަދަވާނެ ކަމަށެވެ.
Ads by STO
