ރައީސްގެ އިލްތިމާސް: ގޮތް ހުސްވެ މައިދާން ދޫކޮށްލާ މީހަކަށް ނުވާތި
ގޮސް ހުސްވެގެން މައިދާން ދޫކޮށްލާފައި ދާ މީހަކަށް ނުވާން އަޒުމް ކަނޑައަޅަން ރައީސް ޑރ. މުހައްމަދު މުއިއްޒު އިލްތިމާސްކުރައްވައިފި އެވެ.
މަޖީދިއްޔާ ސްކޫލްގެ އަހަރީ ގުޅުވައިގެން ބޭއްވި ހާއްސަ ޖަލްސާގައި މިރޭ ވާހަކަފުޅުދައްކަވަމުން ރައީސް ވިދާޅުވީ ނުގުޑާފަދަ އަޒުމެއްގައި ކަންކަން ކުރަން ނިކުތުމުން ގިނަ ކަންތައްތަކެއް ހާސިލުކުރެވޭނެ ކަމަށާއި ކޮންމެ މީހެއްގެ ހިތުގައި ބިންވަޅު ނަގާ އަޒުމަކަށް ވާންވީ މި އަޒުމް ކަމަށެވެ.
"ތިމަންނާ ކުރަން އޮތް ކަންތައްތަކުގައި ފަހަތަކަށް ނުޖެހޭނަމޭ. ތިމަންނާ ނުވާނަމޭ ގޮސް ހުސްވެގެން މައިދާން ދޫކޮށްލާފައި ދާ މީހަކަށް. އެއާ ހިލާފަށް ކުރިމަތިވާ ހުރިހާ ޗެލެންޖުތަކާ ކުރިމަތިލައިގެން، ހުރިހާ ހުރަސްތަކެއް ގިރާ ކުރުމުގެ އަޒުމުގައި ކުރިއަށްދާންށޭ ތިމަންނަ މިހުރީ،" ރައީސް ވިދާޅުވި އެވެ.
ރައީސް ވިދާޅުވީ ވިސްނުންތައް ބަދަލުކޮށްލަންޖެހޭ ކަމަށާއި އެގޮތުން ކޮންމެ ދިވެއްސަކު ވެސް އެމީހެއްގެ ހަޔާތުގައި އެމީހަކު ކުރަން އޮތް ކަމެއްގައި ކުރިއަށް ދިޔުމުގައި މި އަޒުމް ކަނޑައަޅަންޖެހޭ ކަމަށެވެ. އޭރުން ކަންތައްތަކުގައި ކާމިޔާބު ލިބޭނެ ކަމަށާއި ގުރުއާނާއި ސުންނަތުގައި ވެސް މިކަން އޮތީ މިގޮތަށް ކަމަށް ރައީސް ވިދާޅުވި އެވެ.
"އެމީހަކު ކުރާ ކަމެއް، އެމީހަކާއި މަތިވެފައި އޮތް ކަމެއްގައި އެންމެ ފުރިހަމައަކަށް އެމީހެއްގެ ގާބިލިއްޔަތުކަން ތަންދޭ އެންމެ ފުރިހަމަ އަކަށް މަސައްކަތް ކުރުން. މި އަޒުމް ކަނޑައެޅުމަށް އިލްތިމާސްކުރަން،" ރައީސް ވިދާޅުވި އެވެ.
މީގެއިތުރުން ރައީސް ވަނީ މަޖިދީއްޔާ ސްކޫލަށް ދިމާވެފައިވާ ޖާގައިގެ ދަތިކަން ހައްލުކުރަން 40 ކްލާހުގެ އާ އިމާރާތެއް އެޅުމުގެ މަސައްކަތް އަންނަ އަހަރު ފަށަން ނިންމާފައިވާ ކަމަށްވެސް ވިދާޅުވެފަ އެވެ. އޭގެތެރެއިން ބައެއް ކްލާސްތައް ހަމަޖައްސާނީ ސްމާޓް ކްލާސްތަކެއްގެ ގޮތުގައި ކަމަށްވެސް ވިދާޅުވި އެވެ.
