އޭޑީބީ މަޝްރޫޢު އާއި ގުޅިގެން އަމީރުއާއި އޭސީސީއަށް ނަޝީދުގެ ތުހުމަތުތަކެއް
އޭޝިއަން ޑެވެލޮޕްމެންޓް ބޭންކު (އޭޑީބީ) ފަންޑުކޮށްގެން އިކޮނޮމިކް މިނިސްޓްރީ އާއި އެތަނާ ގުޅުން ހުރި ހުރިހާ އިދާރާތަކެއް އެއްވިއުގަ އަކުން ގުޅާލަން ފެށި މަޝްރޫޢު އާއި ގުޅިގެން ރައްޔިތުން މަޖިލީހުގެ ރައީސް މުހައްމަދު ނަޝީދު، ރާއްޖޭގެ ފިނޭންސް މިނިސްޓަރު އަމީރަށާއި، އެންޓި ކޮރަޕްޝަން ކޮމިޝަނަށް ތުހުމަތު ތަކެއް ކުރައްވައިފިއެވެ.
އޭޑީބީގެ އެހީއާއިއެކު ދެވޭ އިމްޕޯޓް އަދި އެކްސްޕޯޓުގެ މަރުހަލާގެ ޚިދުމަތްތައް އެއްވިއުގައަކުން ފޯރު ކޮށްދިނުމަށް ގާއިމު ކުރެވުނު ސިންގަލް ވިންޑޯ މަޝްރޫޢު އަކީ ވެބްފޮންޓެއިންއޭޝިއާ އިންކް- ފިލިޕީންސް އާއި ހަވާލުކުރެވި އެފަރާތާއި ދިވެހި ސަރުކާރާއި ދެމެދު އެއްބަސްވުމުގައި ސޮއި ކުރެވި، މިދިޔަ އަހަރުގެ ޑިސެމްބަރު މަހުގައި އަމަލީ މަސައްކަތް ފެށިފައިވާ މަޝްރޫޢުއެކެވެ.
މި މަޝްރޫޢު ތެރޭގައި އޮޅުވާލުން ހިމެނޭ ކަމަށް ބުނެ ފެތުރޭ ވާހަކައަކީ ދޮގު ވާހަކަތަކެއް ކަން ފިނޭންސް މިނިސްޓްރީން އިއްޔެ ހަވީރު ބޭއްވި ނޫސް ކޮންފަރެންސެއްގައި ވަނީ ބުނެފައެވެ.
އޭޑިބީގެ އެހީގެ ދަށުން ކުރިޔަށް ގެންދިޔަ މި މަޝްރޫޢު އެވޯޑުކުރުމުގެ ކުރިން އެ މައްސަލަ އޭސީސީއަށް ހުށަހެޅި ކަމަށާއި، އެހެން ނަމަވެސް އޭސީސީންް އެ މައްސަލަ ނުބަލާ ދޫކޮށްލުމުން އޭރު އެ މައްސަލަ ނުބަލައި އެވޯޑުކުރީ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ ވިދާޅުވެފައެވެ.
މިމަޝްރޫޢު އާއި ގުޅިގެން ފިނޭންސް މިނިސްޓަރަށް ކުރި ތުހުމަތުތަކުގައި އަމީރު ވިދާޅުވަނީ، ފިލިޕިންސް ކުންފުންޏަށް އެ މަޝްރޫ އެވޯޯޑް ކުރިކަންވެސް އޭނާއަށް އެނގުނީ މީޑިއާއިން ކަމަށާއި ފިނޭސް މިނިސްޓްރީން ޓެންޑާ އިވަލުއޭޝަން މަރުހަލާގައި ބައިވެރިވެފައި ނުވާ ކަމަށެވެ. އަދި އެ މަރުހަލާއަކީ މިނިވަން ވަކި މަރުހަލާއެއް ކަމަށެވެ.
ރައީސް ނަޝީދު ވަނީ، އަމީރު އޭޑީބީ މަޝްރޫއު އެގޮތަށް ކުރިއަށް ގެންދެވީ އިކޮނޮމިކް މިނިސްޓަރު ފައްޔާޒު އެގޮތަށް ބޭނުންވެގެން ކަމަށް ވިދާޅުވެފައެވެ. އެހެން ނަމަވެސް މިކަމަށް ރައްދު ދެއްވައި ފިނޭންސް މިނިސްޓަރު، އަމީރު ވިދާޅުވަނީ، އެ މަޝްރޫއު އެވޯޑް ކުރުމުގައި ބަލަން ޖެހޭ ކަންކަން ނުބަލައި އޮތްކަން އެނގުނު ހިސާބުން ފިނޭންސް މިނިސްޓްރީން އެ މަޝްރޫއު ސަސްޕެންޑް ކުރަން އެންގި ކަމަށާއި، އޭޑީބީގެ ބައިވެރިވުމާއެކު އިވަލުއޭޝަން މަރުހަލާ ކުރިއަށް ގެންދިޔަ ކަމަށެވެ.
Ads by STO
