ހުޅުމާލެ އެކްސިޑެންޓު: ކާރު ދުއްވި އިކްރާމް އަލުން ހައްޔަރުކުރަން މަސައްކަތް ފަށައިފި

ޅުމާލޭގައި ބާރަށް ދުއްވި ކާރެއް، ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހި ހިނގި ނުރައްކާތެރި އެކްސިޑެންޓުގެ މައްސަލައިގައި ކާރު ދުއްވަން އިން އިބްރާހިމް އިކްރާމް އަލުން ހައްޔަރުކުރުމުގެ މަސައްކަތް ފުލުހުން ފަށައިފި އެވެ.

Ads by Sosun Fihaara

ހޯމް މިނިސްޓަރު އަލީ އިހުސާން "އެކްސް" އެކައުންޓުން ކުރެއްވި ޕޯސްޓެއްގައި ވިދާޅުވީ އިކުރާން ދޫވެގެން ދިޔަ ގޮތް ތަހުގީގުކޮށް އިހުމާލެއް ވެފައިވާނަމަ އެ މީހަކަށް ނުވަތަ ބަޔަކަށް އެންމެ ހަރުކަށި ފިޔަވަޅު ވެސް އަޅާނެ ކަމަށެވެ.

"ދޫކޮށްލި މީހާ ކޯޓު އަމުރެއްގެ ދަށުން އަލުން ހައްޔަރު ކުރުމަށް ފުލުހުން ދަނީ މަސައްކަތް ކުރަމުން،" އިހުސާން ލިޔުއްވާފައިވެ އެވެ.

އިކްރާމް ދޫވެގެން ދިޔައީ ވަކީލަކު ނެތި ކްރިމިނަލް ކޯޓުން ބަންދުގެ މުއްދަތު ޖެހުމުން އެއީ ގޯހެއް ކަމަށް ހައި ކޯޓުން ކަނޑައެޅުމުންނެވެ. ހައި ކޯޓުގެ ޝަރީއަތުގައި، ދަށު ކޯޓުން ވަކީލަކު ހަމަޖެއްސުމާ ގުޅޭ ގޮތުން ސުވާލުނުކުރާ ކަމަށް ބުނެ ފުލުހުންގެ ފަރާތުން ހެދީ ދޮގެއް ކަމަށް ވެސް ހައި ކޯޓުން ބުންޏެވެ.

މި އަހަރުގެ ޖުލައި މަހުގެ 31 ގައި ހިނގި މި އެކްސިޑެންޓަށްފަހު ކާރު ތެރޭގައި ތިބި ތިން މީހުން ނުކުމެގެން ދިޔަ އެވެ. އެމީހުން ހައްޔަރު ކުރީ ޖެހިގެން އައި ދުވަހު އެވެ. އަދި އެއަށްފަހު ޝަރީއަތް ނިމެންދެން އެމީހުން ބަންދު ކުރި އެވެ.

މި މައްސަލާގައި ހައްޔަރުކުރި ތިން މީހުނަކީ ވެސް ކުށުގެ ރެކޯޑު އޮތް ބަޔެކެވެ.