ޚާއްސަ އެހީއަށް ބޭނުންވާ މީހަކަށް ޖިންސީ ގޯނާ ކުރި މީހަކު ޝަރީއަތް ނިމެންދެން ބަންދަށް
ޚާއްސަ އެހީއަށް ބޭނުންވާ މީހަކަށް ޖިންސީ ގޯނާ ކުރި މީހަކު ޝަރީއަތް ނިމެންދެން ބަންދު ކުރަން ކޯޓުން އަމުރުކޮށްފިއެވެ.
މިމައްސަލަ ފެންމަތިވީ މިހިނގާ އަހަރުގެ އޭޕްރީލް މަހުގެ 14 ވަނަ ދުވަހުއެވެ. މިމައްސަލަ ތަހްގީގު ކުރަމުން ގޮސް, މިމަހު 11 ވަނަ ދުވަހު ކޯޓު އަމުރެއްގެ ދަށުން ތުހުމަތު ކުރެވޭ މީހާ ވަނީ ހައްޔަރުކޮށްފައެވެ. އޭނާގެ ބަންދާމެދު ގޮތެއް ނިންމަން މިމަހު 12 ވަނަ ދުވަހު ކޯޓަށް ހާޒިރު ކުރުމުން ޝަރީއަތް ނިމެންދެން ބަންދުގައި ބަހައްޓަން ކޯޓުން ވަނީ އަމުރެއް ނެރެދީފައެވެ.
މި މައްސަލައިގައި އަނިޔާ ލިބުނުފަރާތަކީ ޚާއްސަ އެހީއަށް ބޭނުންވާ މީހަކަށް ވާތީ, މި މައްސަލަ ފުލުހުން ބަލަމުންދަނީ ކުޑަ ކުއްޖަކަށް ޖިންސީ ގޯނާ ކުރި މައްސަލައެއްގެ ގޮތުގައެވެ.
މިކަމެއް ހިނގާފައިވަނީ ގއ, ގދ, ޏ އަދި ސ ހިމެނޭ ސަރަހައްދުގައެވެ. އަނިޔާ ލިބުނު ކުއްޖާގެ އައިޑެންޓިޓީ ރައްކާތެރިކުރުމަށް ކަން ހިނގި ރަށާއި އަތޮޅު ހާމައެއް ނުކުރެއެވެ.
