އަޅުގަނޑު ނުކުމެ މިހުރީ ވޯޓުގެ އަދަދެއް ހޯދާކަށް ނޫން: ރައީސް ނަޝީދު
އެމްޑީޕީގެ ރައީސް މުޙައްމަދު ނަޝީދު ނިކުމެ ހުންނެވީ ވޯޓުގެ އަދަދެއް ހޯއްދަވާކަށް ނޫން ކަމަށާއި އެމަނިކުފާނު މަސައްކަތް ކުރައްވަނީ އެމްޑީޕީގެ ޒަމާންވީ ތަސައްވަރު ޙަޤީޤަތަކަށް ހެދުމަށް ކަމަށް، ރައީސް ނަޝީދު ވިދާޅުވެއްޖެއެވެ.
ރައީސް ނަޝީދު މިފަދައިން ވިދާޅުވެފައި ވަނީ އިކޮނޮމިކް މިނިސްޓަރ ފައްޔާޒް އިސްމާއިލް އަމިއްލަފުޅަށް މަގާމުން އެކަހެރިވެ ވަޑައިގަންނަވަން ފެންނަ ކަމަށް ވިދާޅުވެ، އެމްޑީޕީގެ ޗެއާޕަރސަން ޙަސަން ލަތީފު އަށް ފޮނުއްވި ސިޓީއެއްގައެވެ.
އެސިޓީގައި ރައީސް ނަޝީދު ވިދާޅުވެފައިވަނީ އެމްޑީޕީގެ އެއްވެސް މެންބަރަކާއި އަދި އެހެން އެއްވެސް ފަރާތަކާއި ވެސް އެމަނިކުފާނުގެ އެއްވެސް ޒާތީ މައްސަލައެއް ނެތް ކަމަށެވެ. އެހެން ނަމަވެސް އެމްޑީޕީ އަކީ "ސާފު ޕާޓީ" އެއް ކަމަށާއި އެޕާޓީގެ އެންމެ ސާފު އެއް ސިފައަކީ މަޤާމުތައް ފުރުއްވާ ބޭފުޅުންގެ ކޮރަޕްޝަންގެ މައްސަލަތައް މަދުކަން ކަމުގައި ވެސް ރައީސް ނަޝީދު ފާހަގަ ކުރައްވާފައިވެއެވެ.
އިކޮނޮމިކް މިނިސްޓަރަށް ކުރައްވަނީ ކޮރަޕްޝަންގެ ތުހުމަތުތަކެއް ކަމަށް ދޭހަވާފަދަ މޭރުމަކުން ވާހަކަ ދައްކަވަމުން ރައީސް ނަޝީދު ވިދާޅުވެފައިވަނީ ފައްޔާޒު ކޮރަޕްޝަންގެ ޢަމަލެއް ހިންގެވިތޯ ނުވަތަ ނޫންތޯ ޖިނާއީ މިންވަރަށް ބެލުމަކީ ސިޔާސީ ކަމެއް ނޫން ކަމުގައެވެ.
އެމްޑީޕީން އެމަނިކުފާނާއި ހަވާލުވެފައިވަނީ ސިޔާސީ މަސައްކަތެއް ކަމަށާއި ސިޔާސީ ނަޒަރަކުން ދެކޭނަމަ ރައީސް ނަޝީދު ފާހަގަ ކުރައްވަނީ މިނިސްޓަރ ފައްޔާޒަކީ އެމްޑީޕީ ގެ ޒިންމާއެއް ކަމުގައި ވެސް އެމަނިކުފާނު ވިދާޅުވެފައިވެއެވެ. އެހެންކަމުން މިނިސްޓަރ މަގާމުން އަމިއްލަފުޅަށް އެކަހެރިވެ ވަޑައިގަތުމަށް ރައީސް ނަޝީދު ވަނީ އިލްތިމާސް ކުރައްވާފައެވެ.
