ރައްޔިތުންގެ ދުޅަހެޔޮކަން ޔަގީންކުރުމަށް ދުންފަތުގެ އިތުރުން ހަކުރު އެކުލެވޭ ބާވަތްތަކުން ޓެކްސްނަގަންޖެހޭ: ނާޒިމް

ރައްޔިތުންގެ ދުޅަހެޔޮކަން ޔަގީންކުރުމަށްޓަކައި ދުންފަތުގެ އިތުރުން ހަކުރު އެކުލެވޭ ބާވަތްތަކުން ޓެކްސްނަގަން ޖެހޭ ކަމަށް ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމް މިއަދު ވިދާޅުވެއްޖެ އެވެ.

Ads by STELCO

ސަރުކާރުގެ ފަރާތުން މަޖިލީހަށް ހުށަހަޅާފައިވާ އިމްޕޯޓްް އެކްސްޕޯޓް ގާނޫނުގެ އިސްލާހުގެ ބަހުސްގައި ނާޒިމް ވިދާޅުވީ ވޭޕް މަނާކުރާ ހިސާބަށް ދިޔައީ ދުންފަތް ކޮންޓްރޯލް ކުރާ ގާނޫނު ވުޖޫދުގައި އޮވެ, އެ ގާނޫނުގެ ދަށުން ވޭޕް ރެގިއުލޭޓްކުރުމަށް އަޅަން ޖެހޭ ފިޔަވަޅުތައް އެޅުމަށް ކުރީގެ ސަރުކާރުތަކުން ފަސްޖެހިފައިވާތީ ކަމަށެވެ.

ނާޒިމް ވިދާޅުވީ 2010 ވަނަ އަހަރު އެ ގާނޫނު ފާސްކުރެވުނުއިރު ވޭޕަކީ ރާއްޖޭގައި އާއްމު އެއްޗެއް ނޫން ކަމަށެވެ. ތަފާސް ހިސާބުތަކަށް އިޝާރާތް ކުރައްވާ ނާޒިމް ވިދާޅުވީ ރާއްޖޭގައި މިހާރު ކަންބޮޑުވާ މިންވަރަށް ވޭޕްގެ މައްސަލަ އިތުރުވެފައިވާ ކަމަށެވެ.

"އެގޮތުން 2021 ވަނަ އަހަރު ރާއްޖެއަށް މިވަނީ 250,000 ވޭޕިން ޑިވައިޒް އެތެރެކޮށްފައި. މިދިޔަ އަހަރު ވަނީ 394,000 ޑިވައިޒް އެތެރެކޮށްފައި. އަދި މި އަހަރުގެ މިހާތަނަށް 253,000 ވޭޕިން ޑިވައިޒް އެތެރެކޮށްފައިވޭ. އެހެންވީމާ އަޅުގަނޑުމެންގެ ތެރޭގައި މިކަންތައް އަށަގަންފައި އޮތް މިންވަރު މިވަނީ އެނގެން"

ނާޒިމް ވިދާޅުވީ ވޭޕް ރާއްޖޭގައި ފުޅާވެގެން, ފެތުރިގެން ދިޔައީ ޓެކްސްއަށް މަކަރު ހަދާ ހެޔޮ އަގުގައި ވޭޕް ލިބޭނެ ގޮތް މަގުފަަހިވެގެން ދިޔުމުން ކަމަށެވެ.

"އަޅުގަނޑަކީ ސިނގިރޭޓް ބޯމީހެއް ނޫން ވޭޕް ކުރާ މީހެއް ވެސް ނޫން އަދި ދުންފަތް ކާ ވެސް މީހެއް ނޫން"

ވިދާޅުވީ އެ ބަދަލާއެކު ސިނގިރޭޓް ފޮއްޓަކުން ދެވަނަ އަށް އެންމެ ބޮޑުކޮށް ޓެކްސްނަގާ ގައުމަކަށް ރާއްޖެ ވެގެންދާނެ ކަމަށާއި، ޓެކްސް ބޮޑުކުރުމުން ސިނގިރޭޓް ފޮއްޓެއްގެ އަގު 250 ރުފިޔާއަށް ބަދަލުވެގެންދާނެ ކަމަށްވެސް ވިދާޅުވި އެވެ.

ނާޒިމް ވިދާޅުވީ ސިނގިރޭޓްގެ އަގު ބޮޑުވުން އަގުހެޔޮ ސިނގިރޭޓްތައް މާރުކޭޓަށް ނިކުމެގެން ދިއުމަކީ ކަންބޮޑުވާން ޖެހޭނެ ކަމަށާއި އެގޮތަށް ބާޒާރަށް އަގުހެޔޮ ސިނގިރޭޓު ނުގެނެވޭނެ ގޮތަށް ކަންކަން ރާވަން ޖެހޭ ކަމަށެވެ.

އިޖްތިމާއީ ސިއްހީ ނިޒާމުގެ ކަންކަން ހަމަޖެހިފައި އޮންނަ ގޮތުން ގިނަ ބަޔަކު ބަރޯސާވެފައިވަނީ އާސަންދައަށް ކަމަށް ވިދާޅުވި އެވެ.

"އާސަންދައިގެ ހިސާބުތަކަށް ބަލާއިރުވެސް އަޅުގަނޑުމެން ދޮށީ އުމުރުގެ މީހުން ސޭފްޓީ ނެޓެއްގެ ގޮތުގައި ބޭނުންކުރަނީ އާސަންދަ. އެކަމު ދިރިއުޅުމުގެ އާދަތައް ބޭނުންހާ ގޮތަކަށް ބަހައްޓާފައި, އުމުރުގެ ބޮޑުބައި ސިނގިރޭޓް ބޮއެފައި, ދުންފަތް ބޭނުންކޮށްފައި, އަދި އެނާޖީ ޑްރިކްސް ފަދަ އަދި ހަކުރު އެޅި އެހެން ބުއިންތައް ބޭނުންކޮށްފައި."

އެ އިސްލާހުގެ ނަތީޖާއަަކަށް އާމްދަނީއަށް އެއް ބިލިއަން ލިބުނު ނަމަވެސް ސިއްހީ ނިޒާމަށް 3 ބިލިއަނާ ގާތަށް މިހާރު ހަަރަދުކުރަން ޖެހޭ ކަމަށް އޭނާ ވިދާޅުވި އެވެ. ދައުލަތުގެ އާމްދަނީ 34 ބިލިއަންގައި މި އަހަރު ހުރި އިރު 8 ޕަސެންޓަކީ އާސަންދައިގެ ހަރަދެވެ.

ހަމައެކަނި އިންޕޯޓް ޑިއުޓީން މައްސަލަ ހައްލު ނުވާނެ ކަމަށާއި ރާއްޖޭގައި އުފައްދާ ބުއިންތަކުން އިމްޕޯޓް ޑިއުޓީ ނުނެގޭނެތީ ކަމަށާއި އަދި އެ ބުއިންތައް އުފައްދާ މިންވަރުން ޓެކްސް ނެގޭނެ ސިސްޓަމަކީ އެކްސައިޒް ޑިއުޓީ ސިސްޓަމް ކަމަށް ނާޒިމް ވިދާޅުވި އެވެ.

"އެނާޖީ ޑްރިންކްގެ ޑިއުޓީ ބޮޑުކުރި ނަމަވެސް އޭގެ ނަތީޖާ ނުފެނުނީ ރާއްޖޭގައި އެނާޖީ ޑްރިންކްސް އުފައްދަން ފެށީމަ. ކޮކާކޯލާ ކުންފުނިން އެނާޖީ ޑްރިންކްސް ރާއްޖޭގައި އުފައްދަން ފެށުމުގެ ނަތީޖާއަކަށް ވީ އިންޕޯޓް ޑިއުޓީ ބޮޑުކުރުމުން ދައުލަތަށް ލިބޭނެ ކަމަށް ލަފާކުރި އާމްދަނީ ނުލިބުން. އަދި ހަމައެއާއެއްކޮށް އެކަމުން ހާސިލްކުރަން ބޭނުންވި މަގްސަދު ހާސިލު ނުވުން"

ނާޒިމް ވިދާޅުވީ ހަކުރު ހިމެނޭ ބާވަތްތަކުން ޓެކްސް ނެގުމަކީ ބޭރު ގައުމުތަކުގައި ކުރާ ކަމެއް ކަމަށާއި މިދިޔަ ހަފްތާގައި މެލޭޝިއާގައި ތައާރަފްކުރެވުނު ބަޖެޓުގައިވެސް ހަކުރު ހިމެނޭ ބާވަތްތަކުން ޓެކްސް ބޮޑުކޮށްފައިވާ ކަމަށެވެ. އަދި އިނގިރޭސިވިލާތުގައިވެސް ހަކުރު ހިމެނޭ ބާވަތްތަކުން ޓެކްސް ނަގާ ކަމަށެވެ.

"އަޅުގަނޑުމެންގެ ރައްޔިތުންގެ ދުޅަހެޔޮކަން ޔަގީންކުރުމަށްޓަކައި ހަމައެކަނި ދުންފަތުގެ ބާވަތްތަކަށް ފޯކަސް ކުރުމުގެ ބަދަލުގައި ހަކުރުގެ ބާވަތްތަކަށް ޓެކްސް ނެގުމުގެ ކަންތައް އަޅުގަނޑުމެން އެބަ ޖެހޭ ތައާރަފްކުރަން މިހާރަށްވުރެ ފުރިހަމަ ގޮތެއްގައި. މިހާރަށްވުރެ ފުޅާކޮށް"

މިހާރު ހުށަހަޅުއްވާފައިވާ ބިލަށް ތާއީދުކުރައްވާ ނާޒިމް ވިދާޅުވީ ކުރިއަށް އޮތް 4 ދުވަސް ތެރޭގައި އެ ބިލުގެ މަސައްކަތް ސަރުކާރުން އެދޭ ގޮތަށް ނިންމައިދެއްވުމަށް އެދޭ ކަމަށެވެ.