ކޮވިޑް-19: ރާއްޖެއިން ސްރީލަންކާއަށް ދިޔަ 10 މީހަކު ފައްސިވެއްޖެ
ރާއްޖެއިން އަވައްޓެރި ސްރީލަންކާއަށް ދިޔަ 10 މީހަކު ކޮވިޑް-19 އަށް ފައްސިވެއްޖެ އެވެ.
ލަންކާގެ ޑިޕާޓްމެންޓް އޮފް ގަވާމެންޓް އިންފޮމޭޝަން އިން ހާމަކޮށްފައިވާ ގޮތުގައި މިހާތަނަށް ރާއްޖެއިން އެގައުމަށް ދިޔަ 10 މީހުން ވަނީ ކޮވިޑް-19 އަށް ފައްސި ވެފައެވެ.
އެ އިދާރާއިން ހާމަކޮށްފައިވާ ތަފާސް ހިސާބުތަކަށް ބަލާއިރު މިއަދު 6:30 އާ ހަމައަށް އެ ގައުމުން ކޮވިޑް-19 އަށް ފައްސި ވެފައިވާ 5 މީހުންނަކީ ވެސް ރާއްޖެއިން ލަންކާ އަށް އެތެރެވެފައިވާ 5 މީހުންނެވެ.
މީގެ އިތުރުން ރޭ 9:10 ހަމައަށް ފައްސިވި 8 މީހުންގެ ތެރޭގައި ވެސް ރާއްޖެއިން ދިޔަ 5 މީހުން ހިމެނެއެވެ. ދެން ބާކީ ތިބި ތިން މީހުންނަކީ ޔޫއޭއީ، ކުވެއިތު އަދި ސިންގަޕޫރުން ދިޔަ ތިން މީހުނެވެ.
ރާއްޖެއިން ލަންކާއަށް ދިޔަ 10 މީހަކު ފައްސިވެފައިވާ ކަން ހާމަކޮށްފައިވީ ނަމަވެސް، ފައްސި ވެފައިވަނީ ކޮން ގައުމެއްގެ ބައެއްކަން ހާމަކޮށްފައެއް ނުވެއެވެ.
